ភាសិតអមរូបភាពទាំង ២៣ បានមកពីជុំវិញពិភពលោក

សុភាសិតទាំង២៣មកពីប្រទេសជុំវិញពិភពលោកបង្កប់អត្ថន័យឆ្លុះបញ្ចាំងពីសង្គមមនុស្សលើពិភពលោកត្រូវគ្មានខុសត្រង់ណាទេ ពីប្រទេសកេនយ៉ា ស៊ុយអែតរហូតដល់ប្រទេសអេត្យូពី និងរុស្ស៊ី ។ ខាងក្រោមនេះគឺជាសុភាសិតដ៏មានន័យនៅជុំវិញពិភពលោក ដែលអ្នករចនានៅទីក្រុងម៉ានឆេសស្ទើរឈ្មោះ James Chapman បានប្រែសម្រួលជារូបភាព ។

 

១) នៅពេលដំរីប្រយុទ្ធគ្នា ស្មៅឯណោះទេដែលជាអ្នករងគ្រោះ (កេនយ៉ា)

    មានន័យថា ៖ នៅពេលពួកមានអំណាចប្រយុទ្ធគ្នា អ្នកតូចតាចឯណោះទេដែលជាអ្នករងគ្រោះ ។ ខែ្មរយើងថា ដំរីជល់គ្នា ងាប់ស្រមោចសង្អារ ។ មួយទៀតថា ដំរីជល់គ្នា ងាប់ស្មៅចិញ្ចៀន ។

២) ខ្នើយគឺជាអ្នកផ្តល់ប្រឹក្សាល្អបំផុត (ស៊ុយអែត)

មានន័យថា ៖ ដេកនៅលើបញ្ហាហើយចាំមើលថាតើអ្នកមានអារម្មណ៍យ៉ាងណានៅពេលព្រឹក ។

៣) កន្លែងរអិលមិនស្គាល់សូម្បីតែស្តេច (កេនយ៉ា)

មានន័យថា ៖ បើទោះជាមនុស្សមានអំណាចកម្រិតណា ពួកគេក៏នៅតែជាមនុស្សធម្មតា ។

៤) ប្រសិនបើពិភពលោកទាំងមូលជន់លិច វាមិនមែនជាបញ្ហាសម្រាប់សត្វទាឡើយ (តួកគី)

មានន័យថា ៖ រឿងដែលអាក្រក់សម្រាប់អ្នក មិនមែនអាក្រក់សម្រាប់មនុស្សរាល់គ្នាឡើយ ។

៥) កង្កែបក្នុងអណ្តូងមិនបានដឹងពីសមុទ្រដ៏ធំល្វឹងល្វើយឡើយ (ជប៉ុន)

មានន័យថា ៖ មានរឿងជាច្រើនទៀតបានកើតឡើង សូមព្យាយាមមើលរូបភាពដែលធំ ។

៦) ដើម្បីរស់ជាមួយឆ្កែចចក អ្នកត្រូវតែលូឱ្យដូចពួកវា (រុស្ស៊ី)

មានន័យថា ៖ ក្នុងស្ថានភាពគ្រោះថ្នាក់ ត្រូវព្យាយាមបត់បែនតាមកុំបីខាន ។ ខ្មែរយើងថា ចូលស្ទឹងតាមបទ ចូលស្រុកតាមទេស ។

៧) មានដំឡូងស្អុយនៅគ្រប់ការ៉ុង (វែល)

មានន័យថា ៖ គ្រប់សង្គមមនុស្សតែងតែមានមនុស្សអាក្រក់ ។

៨) ធុងទទេគោះឮសំឡេងខ្លាំង (អ៊ីស្លង់)

មានន័យថា ៖ មនុស្សនិយាយប្រូកប្រាជ្ញច្រើនធ្វើដូចខ្លួនឯងដឹងគ្រប់អ្វីៗទាំងអស់ តាមពិតគ្មានដឹងអ្វីទេ ។

៩) នៅពេលសំណាញ់ពីងពាងសហការគ្នា ពួកវាអាចចងតោមួយក្បាលបាន (អេត្យូពី)

មានន័យថា ៖ ជាមួយការងារជាក្រុម អ្នកតូចអាចបង្ក្រាបអ្នកធំបាន ។ ខ្មែយើងថា ចង្កឹះមួយគេកាច់បាក់ ចង្កឹះមួយបាច់គេកាច់មិនបាក់ឡើយ ឬថាខ្សែអំបោះមួយសរសៃឆ្មារៗ រួមគ្នាអាចចងជាប់ខ្លាមួយបាន ។

១០) ពងមាន់គិតថា វាឆ្លាតជាងមេមាន់ (ប៉ូឡូញ)

មានន័យថា ៖ មនុស្សវ័យក្មេងគិតថា ពួកគេដឹងអ្វីៗគ្រប់យ៉ាង ។

១១) បើដួល ៧ ដង លើកទី ៨ ត្រូវងើបឡើង (ជប៉ុន)

មានន័យថា ៖ កុំទុកឱ្យបរាជ័យទាញអ្នកថយក្រោយ ។

១២) ផ្លែឈើចេញពីដើមតែមួយមានរសជាតិខុសគ្នា (ចិន)

មានន័យថា ៖ សមាជិកពីគ្រួសារតែមួយមានបុគ្គលិកលក្ខណៈខុសគ្នា ។

១៣) អ្នកព្យួរស្រែដ៏ពូកែអាចព្យួរបានសូម្បីជាមួយសត្វក្ងាន (លីទុយអានី)

មានន័យថា ៖ កម្មករល្អអាចធ្វើការងាររបស់ពួកគេ សូម្បីតែជាមួយជាមួយឧបករណ៍អន់ៗ ។

១៤) ខ្លាឃ្មុំនិងអ្នកប្រមាញ់ខ្លាឃ្មុំមានគំនិតខុសគ្នា (ន័រវែស)

មានន័យថា ៖ ការខ្វែងគំនិតគ្នាខ្លះមិនអាចដោះស្រាយបានទេ ។

១៥) ពុកចង្ការមិនអាចធ្វើឱ្យអ្នកក្លាយជាទស្សនវិទូទេ (អ៊ីតាលី)

មានន័យថា ៖ អ្នកមិនអាចវាយតម្លៃមនុស្សតែសំបកក្រៅបានទេ ។

១៦) ពួកបិសាចតែងយកកាដូរបស់ពួកវាទៅវិញ (អ៊ុយក្រែន)

មានន័យថា ៖ អ្វីដែលបានមកស្រួល ទៅវិញក៏ស្រួលដែរ ។ គ្មានអ្វីស្ថិតស្ថិរជានិរន្តរ៍ឡើយ ។

១៧) ភាពស្រេកឃ្លាន ទឹកជ្រលក់ល្អបំផុត (រមាំងបុរាណ)

មានន័យថា ៖ ពេលអ្នកឃ្លានអ្វីៗក៏ឆ្ងាញ់ទាំងអស់ ឬខ្មែរយើងថា ឃ្លានឆ្ងាញ់ស្រឡាញ់ស្អាត ។

១៨) ឆ្មាដែលពាក់ស្រោមដៃ មិនអាចចាប់កណ្ដុរបានទេ (Gaelic)

មានន័យថា ៖ ការប្រយ័ត្នប្រយែង និងសុភាព មិនបានជួយដោះស្រាយបញ្ហាគ្រប់យ៉ាងទេ ។

១៩) បោះចោលវាជាមួយបែតមែន (ហ្វីលីពិន)

មានន័យថា ៖ យើងមិនអាចចាត់ការអ្វីដោយខ្លួនឯងបានគ្រប់រឿងទេ បញ្ហាខ្លះ អាចត្រូវរកវីរបុរសឲ្យមកជួយដោះស្រាយហើយ ។

២០) ពោះដែលឃ្លានគ្មានត្រចៀកទេ (បារាំង)

មានន័យថា ៖ អ្នកគ្មានចិត្តសមាធិឡើយ បើមិនមានអាហាទ្រាប់ពោះ ។

២១) សៀវភៅក៏ដូចជាសួនដែលអាចយកដាក់កាបូបបាន (ចិន)

មានន័យថា ៖ មានពាក្យពេចន៍ល្អៗច្រើនណាស់ត្រូវបានសរសេរចូលទៅក្នុងសៀវភៅ ។

២២) បុគ្គលដែលជីកអន្លុងសម្រាប់អ្នកដទៃ ច្រើនតែខ្លួនឯងធ្លាក់ចូលទៅក្នុងនោះ (រ៉ូម៉ានៀ)

មានន័យថា ៖ ប្រសិនបើធ្វើមិនល្អដាក់អ្នកដទៃ វានឹងត្រឡប់មករកខ្លួនវិញ ឬខ្មែរយើងថា ឈាមស្រែកស្បែកហៅ ។

២៣) កូនជាងស្លាបព្រា ច្រើនបានស្លាបព្រាអាក្រក់ (អាយឡែន)

មានន័យថា ៖ អ្នកខ្លះលះបង់មនុស្សជិតស្និទ្ធ ក្នុងខណៈពេលដែលជួយអ្នកដទៃ ឬខ្មែរយើងថា របស់ល្អ របស់ធំ របស់ស្អាត ច្រើនតែទុកលក់ ចំណែករបស់អន់ របស់តូចតាច របស់អាក្រក់ ច្រើនតែទុកប្រើ ទុកហូបខ្លួនឯង ៕

------------------------------------
Cr.គោលគំនិតល្អដើម្បីជីវិត