បាបមិត្ត គឺមិត្តអាក្រក់ (កាព្យ)

ថ្ងៃនេះក៏សូមទាញចំណាប់អារម្មណ៍ប្រិយមិត្តអ្នកអាន តែងតែចូលចិត្តអាន និងចុចលើគេហទំព័រ ក៏ដូចជាផេកគោលគំនិតល្អដើម្បីជីវិតរហូតមក ប្រិយមិត្តអ្នកអានធ្លាប់បានអានកំណាព្យពីការថ្វាយបង្គំទិសទាំង៦ តាមន័យទស្សនរបស់ព្រះពុទ្ធសាសនា ក្នុងការប្រតិបត្តិសង្គហៈសង្រ្គោះចំពោះគ្នានិងគ្នាហើយដែរ ប៉ុន្តែក្នុងទិសទី៤ ដែលលោកទុកជាទិសមិត្តសំឡាញ់ ដែលមានធម៌ ៥ ប្រការ ដែលត្រូវសង្រ្គោះគ្នា ។ ហើយឥឡូវនេះ សូមទាញលក្ខណៈរបស់មិត្តមកបរិយាយតាមពាក្យកាព្យជាបន្ត តើមិត្តសំឡាញ់ ដែលយើងរាប់អានសេពគប់យកធ្វើជាមិត្តដូចម្ដេចខ្លះ? ប្រិយមិត្តអាចវាស់វែងសង្កេតតាមដានពីទង្វើរបស់មិត្តយើង យកមកផ្ទៀងផ្ទាត់ជាមួយនឹងចំណុចដែលមានការរៀបរាប់ជាបន្តបន្ទាប់ដូចខាងក្រោម…

សំដែងអំពីបាបមិត្ត គឺមិត្តអាក្រក់ និងកល្យាណមិត្ត គឺមិត្តល្អ ឯបាបមិត្តគឺមិត្តអាក្រក់នោះ តាមគោលដើមមាន ៤ ពួកដូច្នេះ៖     

(បទពាក្យប្រាំពីរ)

១-     មិត្តគិតតែពីចង់បាន        

របស់ធនធានអំពីមិត្ត

ប្រយោជន៍ខ្លួនឯងចេះតែគិត

ប្រយោជន៍ខាងមិត្តឲ្យខាតបង់ ។

២-    មិត្តល្អត្រឹមតែវាចា

          បើពោលពាក្យណាឥតពិតត្រង់

          មាត់ឲ្យទ្រព្យមិត្តចិត្តឥតចង់

          គេចកែអែអង់ឥតបានឲ្យ ។

៣-     មិត្តបានខាងតែអែបអប

          ប៉ិននិយាយប្របចាក់បណ្ដោយ

          ប្រចុបឲ្យមិត្តមានថ្លស់ធ្លោយ

          ធ្លាក់យសសក្ដិដោយសំដីខ្លួន ។

៤-     មិត្តនាំឲ្យកើតអន្តរាយ

          ទ្រព្យធនទាំងឡាយបង់ជូន

          វិនាសត្រឹមទ្រព្យឬដល់ខ្លួន

          ដោយក្ដីជួបជួនគប់មិត្តបាប ។

          មិត្ត ៤ ពួកនេះមិនមែនមិត្ត

          ត្រូវកុំនៅជិតជាដរាប

          តែចូលទៅជិតនឹងជាប់បាប

          ខ្លួននឹងដុនដាបអន្តរធាន ៕

ដដ.ទំ៤០៤