កុំឲ្យរឿងខ្លះធ្វើបាបចិត្តយើង

គ្មានអ្នកណាអាចដឹងបានមុនទេថា ជីវិតនឹងជួបប្រទះបញ្ហាអ្វីខ្លះ ?ត្រូវបរាជ័យអ្វីខ្លះ ?ខ្លួនបានត្រឹមតែត្រៀមចិត្ត ដើម្បីទទួលរ៉ាប់រងនូវផលវិបាកដែលតាមមកប៉ុណ្ណោះ ។

រឿងខ្លះ ប្រការខ្លះ វាពិតជាធ្វើឲ្យយើងស្មុគស្មាញ និងមានកង្វល់ច្រើនណាស់ បើខ្លួនអាចកាត់ ទម្លាក់ចោលវាបាននោះ គឺជារឿងប្រសើរមួយ ដូចពំនោលមួយពោលទុកថា “កាត់ចិត្តមិនបាន វានឹងធ្វើឲ្យឈឺចិត្តខ្លាំង កាត់ចិត្តបានខ្លះ វាល្មមនៅអាចទ្រាំទ្របាន តែបើទំលាក់វាចុះបាន នឹងលែងមានអារម្មណ៍ឈឺចាប់អ្វីទាំងអស់ ។ ព្រោះថា ការឈឺចាប់ដែលខ្លួនយើងទទួលបានមកអំពីចិត្ត ។ ការកាត់ចិត្តបាន មានន័យថា យើងលែងឈឺចាប់ ។ ដូចពាក្យពំនោលមួយពោលថា បើចិត្តស្ងប់ អ្វីក៏ត្រូវអស់ អ្វីក៏ត្រូវចប់ដែរ " ។

បញ្ហាខ្លះ មិនខុសពីមនុស្សយើងដឹងហើយថា ដុំថ្មហ្នឹងធ្ងន់ ភ្លើងហ្នឹងក្ដៅ ទឹកសមុទ្រហ្នឹងប្រៃ អំបែងកែវហ្នឹងមុត ខ្លួននៅតែលើកទូល លើកលី នៅតែចាប់ នៅតែលូក នៅតែលេប នៅតែផឹក នៅតែក្ដោមក្ដាប់បាតដៃហ្នឹងយ៉ាងណែនទៀត ។ ផលវិបាកដែលខ្លួនទទួលរងគឺ ធ្ងន់ ក្ដៅ ប្រៃ មានរបួសឈឺចាប់តែប៉ុណ្ណោះ ។ បើតូចក៏ស្រាល បើធំក៏ធ្ងន់ខ្លាំង ប៉ះតិចរលាកតិច ប៉ះខ្លាំងរលាកខ្លាំង ផឹកតិចប្រៃតិច ផឹកច្រើនប្រៃខ្លាំង បើក្ដាប់តិចមុតតិច បើក្ដាប់ខ្លាំងមុតក៏ខ្លាំងទៅតាមនោះដែរ ។

បញ្ហាផ្លូវចិត្តនេះ តែងតែកើតឡើងក្នុងលក្ខណៈដូចៗគ្នាអ៊ីចឹង មិនថារឿងសិក្សា ការងារ យសសក្តិ លុយកាក់ សុខភាព ស្នេហា ឬបរិស្ថានជុំវិញខ្លួននោះទេ ។ ដូចយើងបានពោលខាងលើហើយថា អ្វីដែលធ្វើឲ្យយើងស្ងប់បានមានតែម្យ៉ាងទេគឺ ធ្វើចិត្ត ។ ការធ្វើចិត្ត ក្នុងន័យអប់រំ ហ្វឹកហាត់ឲ្យចិត្តរៀនទទួលយកការពិត​របស់យើងនេះឲ្យបាន ព្រោះថា គ្មានអ្វីដែលអាចនៅឋិតថេរជានិរន្តរ៍នោះទេ ។  ហើយការរង់ទទួលនេះ អាចកើតឡើងពីធាតុផ្សំជាច្រើន ដែលយើងមិនអាចដឹងបាន ជួនកាលមកពីអតីតកាល ជួនកាលមកការងារបច្ចុប្បន្ន ដែលយើងមានការធ្វេសប្រហែស ។ លោកថា ការមានសេចក្ដីប្រមាទ​ គឺជាសេចក្ដីស្លាប់ ។

រឿងខ្លះ ដាក់វាចុះទៅ វាក៏លែងធ្ងន់ បើនៅតែស្ពាយ វានៅតែធ្ងន់ ។ ដូចជារឿងអតីតកាលរបស់យើង វាបានធ្វើដំណើរមកហួសឆ្ងាយហើយ យើងលែងគិតអំពីវាមកយូរហើយៗ វាមិនសមនឹងឲ្យខ្លួនកកូរកកាយឡើងមកម្ដងទៀតទេ ។ នេះហើយដែលធ្វើឲ្យយើងមានការឈឺចាប់ ដែលខ្លួនទាញចិត្តឲ្យរើសរឿងហ្នឹងយកមកគិតទៀត ។ រឿងខ្លះក្នុងអនាគត ដែលយើងមិនត្រូវខ្វល់ មិនត្រូវគិត ព្រោះយើងគិត យើងខ្វល់ ក៏យើងមិនអាចទៅធ្វើរឿងទាំងហ្នឹងបានដែរ ដូចយើងបញ្ជាក់ខាងលើហើយ គ្មានអ្នកណាដឹងមុនថា យ៉ាងម៉េចនោះទេ សម្រាប់ថ្ងៃអនាគត ។ ដូចនេះកុំយករឿងទាំងពីរហ្នឹងមកពួនផ្ដុំក្នុងពេលបច្ចុបប្បន្នរបស់យើងនេះធ្វើអ្វី ។ ចុងបញ្ចប់គួរស្ពាយបន្ត ឬទំលាក់វាចុះ វាស្ថិតលើយើងខ្លួននេះឯង ជាអ្នកសម្រេចជ្រើសរើសយកថា មួយណាគួរ មួយណាមិនគួរប៉ុណ្ណោះ ៕

---------------------------------------

Cr. គោលគំនិតល្អដើម្បីជីវិត

រូបភាពហ្វេសប៊ុក