វិបាកកម្មរបស់បុគ្គលទ្រុស្ដសីល

ភិក្ខុទាំងឡាយ! បាណាតិបាត ដែលសេព(ប្រព្រឹត្ត)កន្លងហើយ ចម្រើនឡើងហើយ ធ្វើឲ្យច្រើនឡើងហើយ រមែងប្រព្រឹត្តទៅដើម្បីនរក ប្រព្រឹត្តទៅដើម្បីកំណើតសត្វតិរច្ឆាន ប្រព្រឹត្តទៅដើម្បីប្រេតវិស័យ។ វិបាកកម្ម (ផលនៃអំពើ) របស់បាណាតិបាត របស់បុគ្គលដែលកើតមកជាមនុស្សនៅស្រាលជាង វិបាកកម្មទាំងឡាយទាំងពួង គឺជាវិបាកកម្មប្រព្រឹត្តទៅដើម្បីអាយុខ្លី។

ភិក្ខុទាំងឡាយ! អទិន្នាទានៈ ដែលសេពកន្លងហើយ ចម្រើនឡើងហើយ ធ្វើឲ្យច្រើនឡើងហើយ រមែងប្រព្រឹត្តទៅដើម្បីនរក ប្រព្រឹត្តទៅដើម្បីកំណើតសត្វតិរច្ឆាន ប្រព្រឹត្តទៅដើម្បីប្រេតវិស័យ។ វិបាកកម្មរបស់អទិន្នាទានៈ របស់បុគ្គលដែលកើតមកជាមនុស្សនៅស្រាលជាងវិបាកកម្មទាំងឡាយទាំងពួង គឺជាវិបាកកម្មប្រព្រឹត្តទៅដើម្បីបង់ខាតភោគទ្រព្យ។

ភិក្ខុទាំងឡាយ! កាមេសុមិច្ឆាចារ ដែលសេពកន្លងហើយ ចម្រើនឡើងហើយ ធ្វើឲ្យច្រើនឡើងហើយ រមែងប្រព្រឹត្តទៅដើម្បីនរក ប្រព្រឹត្តទៅដើម្បីកំណើតសត្វតិរច្ឆាន ប្រព្រឹត្តទៅដើម្បីប្រេតវិស័យ។ វិបាកកម្មរបស់កាមេសុមិច្ឆាចារ របស់បុគ្គលដែលកើតមកជាមនុស្សនៅស្រាលជាងវិបាកទាំងឡាយទាំងពួង គឺជាវិបាកកម្មប្រព្រឹត្តទៅដើម្បីបង្កពៀរវេរាដោយសត្រូវ។

ភិក្ខុទាំងឡាយ! មុសាវាទ ដែលសេពកន្លងហើយ ចម្រើនឡើងហើយ ធ្វើឲ្យច្រើនឡើងហើយ រមែងប្រព្រឹត្តទៅដើម្បីនរក ប្រព្រឹត្តទៅដើម្បីកំណើតសត្វតិរច្ឆាន ប្រព្រឹត្តទៅដើម្បីប្រេតវិស័យ។ វិបាកកម្មរបស់មុសាវាទ របស់បុគ្គលដែលកើតមកជាមនុស្សនៅស្រាលជាងវិបាកកម្មទាំងឡាយទាំងពួង គឺជាវិបាកកម្មប្រព្រឹត្តទៅដើម្បីការត្រូវគេពោលមូលបង្កាច់ដោយពាក្យមិនពិត។

ភិក្ខុទាំងឡាយ! បិសុណាវាទ(ញុះញង់ឲ្យបែកបាក់គ្នា) ដែលសេពកន្លងហើយ ចម្រើនឡើងហើយ ធ្វើឲ្យច្រើនឡើងហើយ រមែងប្រព្រឹត្តទៅដើម្បីនរក ប្រព្រឹត្តទៅដើម្បីកំណើតសត្វតិរច្ឆាន ប្រព្រឹត្តទៅដើម្បីប្រេតវិស័យ។ វិបាកកម្មរបស់បិសុណាវាទ របស់បុគ្គលដែលកើតមកជាមនុស្សនៅស្រាលជាងវិបាកកម្មទាំងឡាយទាំងពួង គឺជាវិបាកកម្មប្រព្រឹត្តទៅដើម្បីជាការបែកចាកពីមិត្តសម្លាញ់។

ភិក្ខុទាំងឡាយ! ផុរុសវាទ (សម្តីត្រគោះបោះបោក) ដែលសេពកន្លងហើយ ចម្រើនឡើងហើយ ធ្វើឲ្យច្រើនឡើងហើយ រមែងប្រព្រឹត្តទៅដើម្បីនរក ប្រព្រឹត្តទៅដើម្បីកំណើតសត្វតិរច្ឆាន ប្រព្រឹត្តទៅដើម្បីប្រេតវិស័យ។ វិបាកកម្មរបស់ផរុសវាទ របស់បុគ្គលដែលកើតមកជាមនុស្សនៅស្រាលជាងវិបាកកម្មទាំងឡាយទាំងពួង គឺជាវិបាកកម្មប្រព្រឹត្តទៅដើម្បីជាការបានស្ដាប់សំឡេងដែលមិនជាទីរីករាយ។

ភិក្ខុទាំងឡាយ! សម្ផប្បលាបវាទ (សម្តីរោយរាយឥតប្រយោជន៍) ដែលសេពកន្លងហើយ ចម្រើនឡើងហើយ ធ្វើឲ្យច្រើនឡើងហើយ រមែងប្រព្រឹត្តទៅដើម្បីនរក ប្រព្រឹត្តទៅដើម្បីកំណើតសត្វតិរច្ឆាន ប្រព្រឹត្តទៅដើម្បីប្រេតវិស័យ។ វិបាកកម្មរបស់សម្ផប្បលាបវាទ របស់បុគ្គលដែលកើតមកជាមនុស្សនៅស្រាលជាងវិបាកកម្មទាំងឡាយទាំងពួង គឺជាវិបាកប្រព្រឹត្តទៅដើម្បីជាវាចាដែលគ្មានបុគ្គលណាមួយជឿស្តាប់។

ភិក្ខុទាំងឡាយ! ការក្រេបផឹកទឹកស្រវឹងគឺ សុរា និងមេរ័យ ដែលសេពកន្លងហើយ ចម្រើនឡើងហើយ ធ្វើឲ្យច្រើនឡើងហើយ រមែងប្រព្រឹត្តទៅដើម្បីនរក ប្រព្រឹត្តទៅដើម្បីកំណើតសត្វតិរច្ឆាន ប្រព្រឹត្តទៅដើម្បីប្រេតវិស័យ។ វិបាកកម្មរបស់បិសុណាវាទ របស់បុគ្គលដែលកើតមកជាមនុស្សនៅស្រាលជាងវិបាកកម្មទាំងឡាយទាំងពួង គឺជាវិបាកកម្មប្រព្រឹត្តទៅដើម្បីឆ្កួត ឬវិកលចរិត(ឧម្មត្តកៈ)៕

ប្រភព៖ ធម្មៈ ព្រះត្រៃរ័តន៍