គ្រាន់តែស្រឡាញ់

មនុស្សក្នុងលោកនេះមានច្រើនណាស់ ហើយមនុស្សដែលព្រមរួមដំណើរជីវិត រួមសុខរួមទុក្ខ សើចយំសព្វគ្រប់បែបយ៉ាងជាមួយយើងបាន។ តើអាចមានប៉ុន្មាននាក់ទៅ? ។ អ្នកខ្លះមានសំណាងបានចួបមនុស្សល្អហើយបែរជាមិនចេះថែរក្សា ហើយអ្នកខ្លះទៀត ខ្លួនឯងល្អគ្រប់គ្រាន់តែបែរជាស្រឡាញ់មនុស្សខុស បំផ្លាញឆាកជីវិតខ្លួនឯង ។

ជីវិតពិតជាមានរឿងប្រថុយច្រើនមែន តែការប្រថុយខ្លះបានធ្វើឱ្យយើងចាញ់អស់ពីខ្លួន គ្មានសូម្បីកម្លាំងដើរទៅមុខបន្ដ ។ ឆាកជីវិតពិតជាលេងសើចណាស់ ឱ្យយើងចួបអតីតកាលមិនល្អឈឺចាប់ហើយ ទើបឱ្យយើងចួបមនុស្សល្អតាមក្រោយ តែអ្នកខ្លះគ្មានកម្លាំងលេងសើចនឹងជីវិត ក៏បោះបង់ខ្លួនឯងចោលដោយគ្មានអាឡោះអាល័យ ។ មនុស្សម្នាក់ៗសំណាងមិនដូចគ្នាមែន ហើយអ្នកខ្លះគ្មានសូម្បីតែសំណាង ។ មនុស្សក្នុងលោកនេះគ្មាននរណាល្អលើសគេទេ ហើយមនុស្សខ្លះគ្មានសូម្បីតែសំណាងបានស្គាល់មនុស្សល្អ ។

ទម្រាំរកឃើញមនុស្សល្អម្នាក់ អ្នកខ្លះចាយពេលអស់ស្ទើរតែពាក់កណ្ដាលជីវិត ។ អ្នកខ្លះបានឆ្លងកាត់មនុស្សមិនល្អជាច្រើនចូលក្នុងជីវិត ហើយពេលខ្លះអតីតកាលទាំងនោះបានបន្សល់ស្នាមរបួសរហូតមិនហ៊ានសូម្បីតែគិតម្ដងទៀត ។ ស្រឡាញ់មនុស្សម្នាក់មិនបាច់ទាមទារច្រើនពេកទេ សំខាន់ឱ្យតែជីវិតគូ ចេះស្រឡាញ់គ្នា ចេះមេត្ដា ចេះតស៊ូ និងមានក្ដីសុខមានសុភមង្គលទៅបានហើយ ។

ក្ដីស្រឡាញ់គឺបរិសុទ្ធណាស់ ។ ស្រឡាញ់មនុស្សម្នាក់ពិតប្រាកដ យើងពុំគួរខ្វល់នឹងអតីតកាលគេទេ ។ នរណាៗក៏ធ្លាប់មានអតីតកាលដែរ គ្រាន់តែវាល្អ និងមិនល្អប៉ុណ្ណោះ ប៉ុន្ដែវាមិនសំខាន់ទេ ដ្បិតយើងបានដើរចេញពីអតីតទាំងនោះទៅហើយ អ្វីដែលយើងគួរធ្វើ គឺធ្វើបច្ចុប្បន្នឱ្យបានល្អ សម្លឹងទៅមុខឱ្យបានឆ្ងាយ ។ មិនសំខាន់ថាពីមុនគេជាមនុស្សបែបណាទេ សំខាន់គឺបច្ចុប្បន្នរបស់គេល្អប្រសើរសម្រាប់យើងដែរឬយ៉ាងណា ? ជួនកាលយើងអាចជាមនុស្សចុងក្រោយនៃជីវិតគេក៏ថាបាន ។ ស្រឡាញ់មនុស្សខុសគួរឱ្យខ្លាច តែការដើររំលងមនុស្សល្អ ទើបជាសោកនាថកម្មជីវិត ៕

Cr. Sun Veasna