ស្ដីបន្ទោសស្ងាត់ៗ

ក្សត្រិយ៍នៃចក្រភពរុស្ស៊ីមួយអង្គ ព្រះនាម ខាធើរីនទី២ (១៧២៩-១៧៩៦) បានលើកឡើងនូវព្រះរាជទស្សនៈមួយឃ្លាថា «ខ្ញុំសរសើរខ្លាំងៗ តែស្ដីបន្ទោសស្ងាត់ៗ»។

ប្រសិនបើសម្ដីរបស់យើងវាគ្មានសោភ័ណភាពទេ យើងគួរនិយាយគ្នាដោយស្ងាត់ៗ ។ មនុស្សម្នាក់ៗមិនចូលចិត្ដស្ដាប់ពាក្យស្ដីបន្ទោសទេ ប៉ុន្ដែពួកគេនឹងសប្បាយចិត្ត នៅពេលពួកគេទទួលបានការណែនាំប្រកបដោយកិត្តិយស ។ ក្នុងភាពជាអ្នកដឹកនាំ ការស្ដីបន្ទោសថ្នាក់ក្រោម គឺជៀសមិនផុតឡើយ ប៉ុន្ដែសិល្បៈនៃភាពជាអ្នកដឹកនាំ គឺបញ្ឆេះតាមពេល ពន្លត់តាមកាល គឺមានន័យថា ដឹងពេលស្ដី ដឹងពេលស្ងាត់ ។ សម្ដីដែលមានសោភ័ណ វាធ្វើឱ្យមនុស្សសប្បាយចិត្តនឹងស្ដាប់ សម្ដីដែលមិនពីរោះ វាបានធ្វើឱ្យមនុស្សបាក់ទឹកចិត្ត ។ អ្នកដឹកនាំល្អ ពុំដែលយកកំហឹងមកដាក់មុខទេ ដ្បិតគោលការណ៍នៃភាពជាអ្នកដឹកនាំ គឺដើម្បីប្រយោជន៍រួម ។ ហើយដើម្បីប្រយោជន៍រួម មេដឹកនាំត្រូវដើរតាមមាគ៌ាសន្ដិភាព ហើយដើម្បីទទួលបានសន្ដិភាពជាមួយថ្នាក់ក្រោម មេដឹកនាំគួរតែទទួលស្គាល់កិត្តិយសថ្នាក់ក្រោមជាមុន ។

លោកឧកញ្ញាបណ្ឌិត ម៉ុង រិទ្ធី មានប្រសាសន៍ថា " បុគ្គលិកប្រៀបដូចស្រូវក្នុងស្រែ " ត្រង់ន័យនេះគាត់ចង់រម្លឹកថា បើប្រើបច្ចេកទេសដឹកនាំត្រឹមត្រូវបុគ្គលិកនឹងធ្វើការបានល្អ តែបើប្រើបច្ចេកទេសខុស នោះប្រៀបដូចស្រូវក្នុងស្រែដែលគ្មានកសិករថែទាំ ដែលស្របទៅនឹងការទូន្មានរបស់ព្រះចៅអធិរាជ ណាប៉ូឡេអុង ត្រង់ន័យថា " អ្នកដឹកនាំគឺជាអ្នកដែលផ្ដល់ក្ដីសង្ឃឹម " អ្នកដឹកនាំជាគំរូភាព ជាក្ដីសង្ឃឹមរបស់អ្នកដើរតាម ៕

Cr. Sun Veasna