បើកបេះដូងឱ្យទូលាយ

តាំងពីកើតមក ខ្ញុំមិនដែលស្ពាយគំនិតរើសអើងជាប់ខួរក្បាលទេ បើនិយាយគ្នាបានក៏និយាយ បើមិនបានក៏ដើរចេញ ។ អាចថាមកពីខ្ញុំមិនខ្ពង់ខ្ពស់ មិនលើលគេ ទើបមិនវាយឬកដូចគេ នោះប្រហែលជាច្រឡំធំហើយ ។ តាំងពីដើមមកដល់ពេលនេះ មានតែមនុស្សរើសអើងខ្ញុំ គ្មានទេមនុស្សដែលខ្ញុំរើសអើង ។ មិនមែនលើកខ្លួនឯងទេ ក៏មិនមានមិត្រច្រើន បក្ខពួកច្រើនដូចគេដែរ។ គ្រប់គ្នាយល់ថាមានមិត្ដច្រើនគឺជារឿងសប្បាយចិត្ដ តែខ្ញុំយល់ថាមានមិត្តច្រើនឬតិចមិនសំខាន់ទេ សំខាន់មានមិត្តល្អយល់ចិត្តគ្នា ចេះជួយគ្នា ទើបជារឿងសប្បាយចិត្ត ។

ជឿថានរណាៗក៏អាចក្លាយជាមិត្រយើងបានដែរ សំខាន់ឱ្យតែបេះដូងរបស់យើងទូលាយ ។ យើងរស់នៅលើលោកនេះស្គាល់មនុស្សច្រើនណាស់ អ្នកខ្លះចិត្តចង្អៀត អ្នកខ្លះចិត្ដទូលាយ អ្នកខ្លះផ្អែមក្រៅ អ្នកខ្លះផ្អែមក្នុង ហើយអ្នកខ្លះទៀតលេងចរិតតួឯក (មានតែអញ,រាប់តែគ្នាអញ) ។ ដ្បិតយើងមិនអាចទៅជជែកជាមួយមនុស្សមិនដែលស្គាល់ តែមនុស្សខ្លះស្គាល់ធ្វើមិនស្គាល់ ជួបធ្វើមិនឃើញ មិនដឹងថាគេធ្វើដើម្បីអ្វីទេ គ្រាន់តែថាមនុស្សប្រភេទនេះភាគច្រើនគឺឯកោ ។ ជីវិតដែលល្អប្រសើរ គួរផ្សាភ្ជាប់ខ្លួនឯងជាមួយសម្ពន្ធភាព ។ បើកបេះដូងឱ្យទូលាយទទួលយកមិត្រភាពថ្មីៗ ព្រោះមនុស្សក្នុងលោកមានច្រើនណាស់ ហើយពេលខ្លះពួកគេអាចក្លាយជាមិត្ដល្អរបស់យើង ហើយពេលខ្លះដោយសារតែវត្ដមានពួកគេ ទើបធ្វើឱ្យជីវិតយើងរីករាយ ។

Cr. ប្រាជ្ញាជីវិត