ការស្គាល់ខ្លួនឯង

ការស្គាល់ខ្លួនឯង ៖ តើយើងអាចស្គាល់ខ្លួនឯងដោយវិធីណា? បញ្ហាដ៏ធំរបស់មនុស្សគឺការស្គាល់ខ្លួនឯង ។ មានមនុស្សជាច្រើនតែងអះអាងថាស្គាល់ខ្លួនឯង តែក្នុងសភាពពិតជាក់ស្តែងវាជាការកុហកខ្លួនឯងទៅវិញ ។ ការស្គាល់ខ្លួនឯងវាត្រូវតែឆ្លើយតបបានទៅលើកត្តាពីរគឺ កត្តាអត្តនោម័តិ ដែលឆ្លុះបញ្ចាំងតាមរយៈការគិតរបស់ខ្លួនឯង និងកត្តាសត្យានុម័តិ ដែលឆ្លុះបញ្ចាំងតាមរយៈមនុស្សជុំវិញនិងសភាពពិតជាក់ស្តែង ៖

១) កត្តាអត្តនោម័តិ គឺការវិនិច្ឆ័យអំពីខ្លួនឯងដោយខ្លួនឯង ពិចារណាទៅលើ ៖

ក) អារម្មណ៍ ៖ តើកិច្ចការអ្វីខ្លះដែលយើងមានអារម្មណ៍ចង់ធ្វើឱ្យបានល្អបំផុត? ធ្វើដោយមិនចេះធុញទ្រាន់ មិនថាជាពេលណាក៏ដោយ យើងហ៊ានលះបង់គ្រប់យ៉ាងដើម្បីរបស់នោះ ។

ខ) តើយើងមានការគិតដូចម្តេច? តើយើងឱ្យតម្លៃទៅលើអ្វីខ្ពស់បំផុត?

គ) សមត្ថភាព ៖ តើយើងមានសមត្ថភាពធ្វើកិច្ចការនោះក្នុងកម្រិតណា? តើយើងបានខិតខំអភិវឌ្ឍសមត្ថភាពនេះកម្រិតណា? បើប្រៀបធៀបនឹងអ្នកខ្លាំងលើផ្នែកនេះតើយើងនៅក្នុងកម្រិតណា? តើយើងមានរំពឹងថាអាចអភិវឌ្ឍដល់កម្រិតកំពូលឬយ៉ាងណា?

ឃ) លទ្ធផលដែលបានទទួល ៖ តើលទ្ធផលដែលយើងទទួលបានមកវាជួយឱ្យជីវិតយើងបានប្រសើរដែរឬទេ? ឬមួយបានត្រឹមតែល្អមើល តែមិនល្អស៊ី?

២) កត្តាសត្យានុម័តិ ៖ ត្រូវឆ្លុះបញ្ចាំងមើលខ្លួនឯងតាមរយៈការឆ្លើយតបពីមនុស្សជុំវិញនិងសភាពពិតជាក់ស្តែង អំពីអារម្មណ៍ ទស្សនៈ សមត្ថភាព និងលទ្ធផល ថាតើវាសមស្របទៅតាមអ្វីដែលយើងវិនិច្ឆ័យខ្លួនឯង ឬមួយវាខុសឆ្ងាយតិចច្រើនកម្រិតណា? ប្រសិនបើករណី ១ និងករណី ២ វាប្រហាក់ប្រហែលគ្នា នោះគឺជារឿងល្អ តែបើវាខុសគ្នាឆ្ងាយពេក យើងគួរដាក់ចិត្តទទួលស្គាល់ការពិត ។ សូមកុំចង់ធ្វើចេះតែម្នាក់ឯង, ការមិនទទួលស្គាល់ការពិតវាគ្មានផលល្អដល់ខ្លួនឡើយ ។ មនុស្សដើរផ្លូវខុសគឺជារឿងធម្មតា តែការដើរផ្លូវខុសហើយមិនព្រមទទួលស្គាល់ថាខុស នោះគឺជារឿងគួរឱ្យសង្វេគ គ្មានអ្វីអាចស្រោចស្រង់បានទេ ។

-----------------------------

Cr. Kim Chana

រូបភាព៖ហ្វេសប៊ុក