ជីវិតគឺជាការផ្សងព្រេង

យើងអាចធ្វើឱ្យនាឡិការឈប់ដើរបាន តែយើងមិនអាចឃាត់ពេលវេលាឱ្យលែងទៅមុខនោះទេ ជួបរឿងល្អក៏ដោយ រឿងមិនល្អក៏ដោយ មួយថ្ងៃៗទៅមុខជានិច្ចមិនចាំអ្នកណាមួយឡើយ ។ ដូចនេះ អ្វីដែលខ្លួនគួរធ្វើ ដើម្បីក្លាយជាមនុស្សល្អ  មនុស្សមិនមានភាពស្ដាយក្រោយ សម្រាប់នោះ គឺអំពើដែលមានប្រយោជន៍ អំពើល្អនោះឯង ព្រោះថាខ្លឹមរបស់មនុស្សគឺអំពើល្អ ។

ស្អប់អ្នកណា ចូលចិត្តអ្នកណា ថ្ងៃមួយគង់នឹងបែកគ្នាព្រោះគ្មានអ្នកណាគេផុតពីសេចក្តីស្លាប់នោះបានទេ។ ព្រោះថា សេចក្ដីស្លាប់នេះយុត្តិធម៌ណាស់ សម្រាប់ជីវិតមនុស្សសត្វ ហើយក៏គ្មានអ្វីទៅសុកប៉ាន់ មេមច្ចុរាជនេះបានដែរ ។ ស្អប់និងស្រឡាញ់ គ្រាន់តែដុះក្នុងចិត្តយើងបណ្ដោះអាសន្នប៉ុណ្ណោះ ។ តែយ៉ាងណា ការបណ្ដុះសេចក្ដីស្រឡាញ់របស់យើងឲ្យបានច្រើន ព្រោះធាតុវិជ្ជមាន អាចនាំចិត្តយើងមានសេចក្ដីសុខច្រើនជាងធាតុអវិជ្ជមាន ព្រោះធាតុអវិជ្ជមាន មិនដែលនាំបុគ្គលណាឲ្យជួបរឿងល្អក្នុងជីវិតទេ ។

ខែនេះរកប្រាក់ចំណេញបានច្រើន ខែក្រោយក៏ស្រាប់តែឡុងចុងខាតដើម រកស៊ីមានឡើងមានចុះ មិនខុសពីជីវិតដែលមានឡើងមានចុះ ។ ពេលឡើងកុំវង្វេងក្នុងអ្វីដែលកើតឡើងចំពោះជីវិត ពេលចុះ កុំឲ្យអស់សង្ឃឹមចំពោះជីវិត ព្រោះថា សភាពទាំងពីរនេះ តែងមានគ្រប់ជីវិត ។ ពេលខ្លះសប្បាយចិត្តហើយពេលខ្លះទៀតក៏កើតទុក្ខ រស់ជីវិតគឺបែបនេះឯង។

វ័យម្នាក់ៗចេះតែកើនឡើងរហូត ។ កូនង៉ាថ្ងៃមុន ថ្ងៃនេះក៏ចូលរៀនវិទ្យាល័យហើយ ។ បងប្អូនក៏មានបន្ទុកការងារចិញ្ចឹមជីវិតរៀងៗខ្លួន ។ ឱពុកម្តាយក៏កាន់តែចាស់ទៅៗ កម្លាំងពលំក៏ខ្សោយៗ គ្មានអ្វីដែលអាចតាំងនៅមាំបានទេ ហើយយើងក៏មានការផ្លាស់ប្តូរច្រើនទៅដែរ មិនថាសភាពរាងកាយ សភាពចិត្តគំនិត វាបានផ្លាស់ប្ដូរទៅជាមួយពេលវេលាដែលបានកន្លងផុតទៅ ។

ចុងក្រោយទៅទើបយល់ថា ជីវិតកើតមកម្នាក់ឯង ទៅវិញក៏ម្នាក់ឯងដែរ ហេតុអ្វីពេលខ្លះយើងត្រូវ ចាំតែមើលទឹកមុខគេ ចាំតែខ្លាចគេថា និងមិនហ៊ានធ្វើអ្វីដែលខ្លួនឯងចង់ធ្វើ? ជីវិតគឺជាការផ្សងព្រេងដូចនេះត្រូវរីករាយនឹងដំណើរមួយនេះ! មិនថាក្នុងកាលៈទេសៈណានោះទេ ៕