អនុទិនទស្សនជីវិត ១៦

ប្រសិនបើយើងព្យាយាមហាត់រៀនអត់ធន់រឿងតូចៗបាន ក៏មិនចាំបាច់ទៅទ្រាំអត់ធន់ជាមួយរឿងៗធំៗអ្វីដែរ តែជារឿងគួរឲ្យចម្លែកណាស់ក្នុងពួកមនុស្សលោកនេះ គឺមានមនុស្សជាច្រើន អត់ធ្មត់ចំពោះពាក្យស៊កសៀតប្រមាថមើលងាយពីមនុស្សដទៃមិនបាន ដល់មានអ្នកខ្លះត្រូវទៅវាយដំច្រំធាក់កាប់សម្លាប់គេ តែខ្លួនអាចទ្រាំរស់នៅក្នុងគុក ១០ -២០ ឆ្នាំបាន ឬខ្លះទៀតដល់អស់មួយជីវិតក៏មាន ។

អ្នកខ្លះមិនដល់ទៅវាយដំកាប់សម្លាប់គេទេ ប៉ុន្តែបែរជាយកពាក្យស៊កសៀតចាក់ដោតទាំងនោះ មកសម្លាប់សេចក្ដីសុខខ្លួនឯងទៅវិញ ។ គិតៗទៅ វាគ្មានន័យអ្វីទាល់តែសោះ ប្រសិនបើយើងមិនធ្វើទុកក្នុងចិត្តរបស់យើង ។