សុបិនចង់ក្លាយជាអ្នកមានទ្រព្យសម្បត្តិច្រើនជារឿងដែលអ្នកគ្រប់គ្នាប្រាថ្នាចង់បាន
ព្រោះក្លាយទៅជាអ្នកមានអាចជួយឲ្យមនុស្ស មានភាពងាយស្រួលក្នុងការរស់និងអាចធ្វើអ្វីដែលខ្លួនចង់ធ្វើ។
យ៉ាងណាក៏ដោយមិនមែនឲ្យតែចង់ក្លាយជាអ្នកមាន សុទ្ធតែសម្រេចតាមបំណងនោះឡើយ។ ដោយសារតែបែបនេះហើយបានជាចំនួនអ្នកក្រច្រើនជាងអ្នកមានឆ្ងាយណាស់។
មានមូលហេតុជាច្រើន ដែលនាំឲ្យមនុស្សមិនអាចក្លាយទៅជាអ្នកមានបាន ដូច្នេះ ហើយអ្នកគួរតែយល់ដឹង
និងជៀសវាងនូវបញ្ហាទាំងនោះ។ ខាងក្រោមនេះ គឺជាចំណុចសំខាន់ៗមួយចំនួន ដែលអ្នកគួរតែជៀសវាង
ប្រសិនបើចង់ក្លាយជាអ្នកមាន៖
១) ចាយច្រើនជាងចំណូល៖ វាជារឿងដែលទៅមិនរួចឡើយ ប្រសិនបើអ្នកចង់ក្លាយជាអ្នកមាន
តែចូលចិត្តចាយច្រើនទៅវិញ។ ការចំណាយពិតជាមានសារៈសំខាន់ខ្លាំងណាស់ ព្រោះបើទោះបីជាអ្នករកចំណូលបានច្រើនប៉ុណ្ណាក៏ដោយ
តែបើចាយច្រើនជាងចំណូលទៅហើយនោះ លទ្ធផលចុងក្រោយ គឺប្រាកដជាវេទនា។ ដូច្នេះហើយ
អ្នកគួរតែគិតគូរឲ្យបានម៉ត់ចត់ រាល់ការចំណាយប្រចាំថ្ងៃ ដើម្បីប្រាកដថា អ្នកអាចសល់ប្រាក់កាសខ្លះដើម្បីសន្សំទុក។
២) ទិញរបស់ប្រើប្រាស់ដែលមិនមែនជាតម្រូវការ៖ នៅលើទីផ្សារមានរបស់របរប្រើប្រាស់ច្រើនណាស់ ដូច្នេះត្រូវឲ្យប្រាកដថា
របស់ណាដែលចាំបាច់ និងរបស់ណាដែលមិនចាំបាច់។ មានន័យថា អ្នកគួរទិញរបស់របរទាំងឡាយដែលចាំបាច់សម្រាប់សេចក្តីត្រូវការ
និងមានប្រយោជន៍សម្រាប់ការប្រើប្រាស់ ជាជាងការទិញមក គ្រាន់តែដើម្បីបំពេញចំណង់របស់ខ្លួន
ព្រោះ អ្នកគ្មានថ្ងៃអាចបំពេញចំណង់របស់ខ្លួនបានឡើយ តែបែរជាត្រូវចាយលុយច្រើនអត់ប្រយោជន៍ទៅវិញ។
បើមិនដឹង ឬមិនអាចបែងចែកអ្វីដែលសំខាន់បាននោះទេ ប្រាកដណាស់ ការចំណាយរបស់អ្នក
គឺមិនចំខ្ទង់នោះទេ ឬអាចនិយាយបានម្យ៉ាងទៀតថា ចាយអត់ប្រយោជន៍។
៣) គ្មានគម្រោងច្បាស់លាស់៖ ជាទូទៅ មិនសូវមានមនុស្សច្រើនគិតគូរ ឬរៀបចំផែនការជីវិតច្បាស់លាស់នោះទេ
ជាហេតុធ្វើឲ្យពួកគេ តែងប្រឈមបញ្ហាជាច្រើន ហើយមិនដឹងរកវិធីណាដើម្បីដោះស្រាយឲ្យទាន់ពេលវេលា។
ការរៀបចំផែនការ ឬគម្រោង ពិតជាមានសារៈសំខាន់ខ្លាំងណាស់ ដើម្បីកំណត់ទិសដៅឲ្យច្បាស់
ថាអ្វីដែលអ្នកចង់សម្រេចនៅពេលខាងមុខ ហើយត្រូវប្រើយុទ្ធសាស្ត្រអ្វីខ្លះដើម្បីសម្រេចគោលដៅនោះ។
ដូច្នេះហើយ ដើម្បីក្លាយទៅជាអ្នកមានទ្រព្យសម្បតិ្តស្តុកស្តម្ភម្នាក់ ការរៀបចំគម្រោង
ឬផែនការ គឺជារឿងដែលមិនអាចមើលរំលង ហើយបើមិនទាន់ធ្វើទេ សូមចាប់ផ្តើមនៅពេលឥឡូវនេះ។
៤) មិនព្យាយាមបង្កើនប្រាក់ចំណូលរបស់ខ្លួន៖ បើទោះបីជា នាពេលបច្ចុប្បន្ននេះ ប្រាក់ចំណូលរបស់អ្នកច្រើនគួរសមហើយក៏ដោយ
តែត្រូវតែព្យាយាមធ្វើយ៉ាងណាឲ្យប្រាក់ចំណូលទាំងនោះ កើនឡើងកាន់តែច្រើនថែមទៀត។
បើអ្នកមិនខិតខំរិះរកវិធី ដើម្បីបង្កើតប្រាក់ចំណូលឲ្យបានច្រើននោះទេ វាពិតជាពិបាកសម្រាប់ការក្លាយទៅជាអ្នកមាន។
ដូច្នេះ ត្រូវចាប់ឱកាស ហើយប្រសិនបើមិនមានឱកាស គឺត្រូវតែចេះបង្កើតឱកាសដោយខ្លួនឯង
ដើម្បីអាចមានប្រាក់ចំណូលច្រើនឡើងៗ៕
ប្រភព thebnews
ប្រភពរូបភាព ហ្វេកប៊ុកផេក
No comments:
Post a Comment