ជីវិតមិនមាននិមិត្ត៥ប្រការ

បទថា អនិមិត្តតោ គឺមិនមានការកំណត់ អធិប្បាយថា ព្រោះមិនមានព្រំដែន។

ពិតហើយ ធម៌​ ៥ប្រការ គឺជីវិត ព្យាធិ កាល ទីកន្លែងដាក់ចុះសាកសព និងគតិ របស់សត្វទាំងឡាយក្នុងជីវលោកមិនមាននិមិត្ត ដឹងមិនបាន។

ក្នុងធម៌ ៥ ប្រការនោះ ជីវិត ឈ្មោះថា មិនមាននិមិត្ត ព្រោះមិនមានការកំណត់ថា និងរស់នៅត្រឹមប៉ុណ្ណេះ មិនរស់នៅបន្ទាប់ពីនេះទៅ ព្រោះថា សត្វទាំងឡាយរមែងស្លាប់ក្នុងកាលនៅជាកលលៈក៏មាន ក្នុងកាលនៅជាអម្ពុទៈក៏មាន ជាបេសិ ជាឃនៈ នៅក្នុងគភ៌បាន១ខែ បាន២ខែ បាន៣ខែ បាន៤ខែ បាន៥ខែ ក៏មាន ក្នុងសម័យដែលចេញចាកផ្ទៃក៏មាន បន្ទាប់ពីនោះ ស្លាប់ក្នុងរវាង ១០០ឆ្នាំក៏មាន ជាង ១០០ឆ្នាំក៏មាន។

ព្យាធិ ឈ្មោះថា មិនមាននិមិត្ត ព្រោះមិនមានការកំណត់ថា សត្វទាំងឡាយត្រូវស្លាប់ដោយជំមឺនេះប៉ុណ្ណេះ មិនស្លាប់ដោយជំងឺដទៃ ព្រោះថាសត្វទាំងឡាយ ស្លាប់ដោយរោគភ្នែកក៏មាន ដោយរោគក្រៅពីនោះ មានរោគត្រចៀកជាដើម យ៉ាងណាមួយក៏មាន។

កាល ឈ្មោះថា មិនមាននិមិត្ត ព្រោះមិនមានការកំណត់យ៉ាងនេះថា ត្រូវស្លាប់ក្នុងកាលនេះប៉ុណ្ណេះ មិនស្លាប់ក្នុងកាលដទៃ ព្រោះថាសត្វទាំងឡាយ រមែងស្លាប់ក្នុងពេលព្រឹកក៏មាន ក្នុងពេលដទៃ មានថ្ងៃត្រង់ជាដើម ក្នុងពេលណាមួយក៏មាន។

ទីកន្លែងដាក់ចុះសាកសព ឈ្មោះថា មិនមាននិមិត្ត ព្រោះមិនមានការកំណត់យ៉ាងនេះថា សត្វទាំងឡាយត្រូវតែស្លាប់ក្នុងទីនេះប៉ុណ្ណេះ មិនស្លាប់ក្នុងទីដទៃ ព្រោះថារាងកាយរបស់បុគ្គលទាំងឡាយ កើតក្នុងស្រុក ស្លាប់នៅក្រៅស្រុកក៏មាន រាងកាយរបស់បុគ្គលកើតនៅក្រៅស្រុក ស្លាប់ក្នុងស្រុកក៏មាន, ដោយន័យដូចគ្នាដែរ បណ្ឌិតអធិប្បាយឲ្យពិស្តារគ្រប់ប្រការ ជាដើមថា រាងកាយរបស់សត្វទាំងឡាយ កើតលើគោក អាចស្លាប់ក្នុងទឹក ឬថា កើតក្នុងទឹក អាចស្លាប់លើគោក...។

គតិ ឈ្មោះថា មិនមាននិមិត្ត ព្រោះមិនមានការកំណត់យ៉ាងនេះថា សត្វដែលចុតិចាកគតិនេះ នឹងកើតក្នុងគតិនេះ ព្រោះថាសត្វទាំងឡាយ ដែលចុតិចាកទេវលោក កើតក្នុងមនុស្សលោកក៏មាន ចុតិចាកមនុស្សលោក កើតក្នុងលោកដទៃ មានទេវលោកជាដើម ទីណាមួយក៏មាន ព្រោះហេតុនេះ លោកទើបវិលទៅក្នុងគតិ ៥ ដូចគោដែលគេចងនឹងបង្គោលស្នឹង ក៏ដើរវិលជុំវិញទៅ។

ព្រះយោគាវចរ គប្បីរឭកដល់សេចក្ដីស្លាប់ ព្រោះជីវិតមិនមាននិមិត្ត ដូចពោលមកដូច្នេះចុះ៕ [edit]

.........................

ស្រង់ចេញពីសៀវភៅ៖ មរណស្សតិ

ទំព័រ  ២២-២៤

បោះពុម្ព ព.ស ២៥៥៦ គ.ស ២០១២

រៀប. ង៉ែត សុផាន់

រូបភាពហ្វេកប៊ុកផេក