និទានធម្មៈ រឿងការផ្លាស់ប្តូរ

ការផ្លាស់ប្ដូរនេះ មានមនុស្សតិចណាស់ ដែលហ៊ានគិតផ្លាស់ប្តូរជីវិតខ្លួន ផ្លាស់ប្ដូរទីកន្លែង ផ្លាស់ប្តូរការងារ។ ការផ្លាស់ប្ដូរនេះ ពិតជាមានការខាតបង់អ្វីមួយហើយ ក៏ប៉ុន្តែការផ្លាស់ប្ដូរនេះ ក៏អាចមានរឿងថ្មីៗ ប្លែកៗ ចូលមកក្នុងជីវិតយើងជំនួសមកវិញផងដែរ។ ដូចនេះ គោលគំនិតល្អដើម្បីជីវិត សូមនាំមកនូវនិទានធម្មៈ ក្នុងការផ្លាស់ប្ដូរ ដូចមានខ្លឹមសារខាងក្រោម៖

មានរឿងដំណាលថា ស្រ្តីម្នាក់អាស្រ័យនៅក្នុងទីក្រុងមួយ ផ្ទះរបស់នាងមានដើមឈើធំមួយដើម បែកមែកសាខាត្រឈុំត្រឈៃ ធ្វើឲ្យបរិវេណនោះមើលទៅត្រជាក់ត្រជុំ ប៉ុន្តែពេលដំណាលគ្នានេះដែរ មែកឈើក៏បានបាក់ធ្លាក់ត្រូវផ្ទះអ្នកជិតខាងជាញឹកញាប់ ក៏កើតមានបញ្ហាដល់ថ្នាក់ត្រូវឲ្យកាប់ដើមឈើធំនោះចោល។ នាងមានការព្រួយកង្វល់ក្នុងចិត្តថា ថ្ងៃមុខលែងមានម្លប់ជ្រកបាំងពន្លឺថ្ងៃ ភ្លៀង លែងមានបក្សាបក្សីមកយំខ្ញៀវខ្ញារឲ្យស្ដាប់ទៀតហើយ។ នាងកាន់តែគិត កាន់តែមានចិត្តសោកស្ដាយជាពន់ពេក និងមានការតានតឹងអារម្មណ៍ខ្លាំងឡើងជាលំដាប់។ ដល់ពេលថ្ងៃត្រូវកាប់ដើមឈើនោះចោល នាងត្រូវបានលួងលោមចិត្តពីមិត្តភក្ដីថា “កុំទៅសោកស្ដាយចំពោះវត្ថុដែលបានបាត់បង់ទៅនោះ ចូរត្រេកអរជាមួយរឿងថ្មីដែលកំពុងចូលមកជំនួសវិញ”។ 

ក្រោយពីដើមឈើនោះត្រូវគេកាត់ចោលទៅមិនយូរ នាងបានយល់ពីសភាពផ្លាស់ប្តូរដែលបានកើតឡើងពោលគឺ ជារៀងរាល់ព្រឹកនាងបានទទួលពន្លឺរស្មីព្រះអាទិត្យចូលមកក្នុងបរិវេណបន្ទប់ ធ្វើឲ្យនាងមានអារម្មណ៍កក់ក្ដៅស្រស់ថ្លាឡើងភ្លាម នាងបានឃើញរូបភាពក្មេងៗរត់ឡើងចុះរថយន្តជូនសិស្សសាលាយ៉ាងសប្បាយរីករាយ ហើយលែងមានបក្សាបក្សីមកជុះអាចម៍ឲ្យគគ្រិចបរិវេណនោះតទៅទៀត។ មកដល់ពេលនេះ នាងទើបយល់ពីពាក្យថា “កុំសោកស្ដាយចំពោះរឿងដែលបានបាត់បង់ទៅហើយ តែចូរត្រេកអរជាមួយរឿងដែលកំពុងចូលមកថ្មីជំនួសវិញ”។

មនុស្សមួយចំនួនធំ ច្រើនតែខ្លាចពីការផ្លាស់ប្ដូរ ដែលបានកំពុងកើតឡើង។ ភាពខ្លាចនេះភាគច្រើនកើតឡើងពីគំនិតក្រោមឥទ្ធិពលស៊ាំ ទម្លាប់ ដែលជាការនាំឲ្យមិនចង់សម្របខ្លួន សូម្បីតែក្នុងរឿងដែលនាំទៅរកភាពរីកចំរើនលូតលាស់ក៏ដោយ ការពេញចិត្តនៅជាមួយរឿងចាស់ៗ មុនៗនេះ ទោះបីនឹងមានអារម្មណ៍ថា សប្បាយស្រួលមិនចំបាច់ប្រឹងននៀលក្រាញក៏ដោយ ប៉ុន្តែមួយផ្នែកទៀត គឺជាការបិទឱកាសរបស់ជីវិត មិនឲ្យជួបជាមួយរឿងថ្មីៗ ហើយមានរឿងខ្លះ ក៏បានជាប្រយោជន៍យ៉ាងមហាសាលដល់ខ្លួនឯងផងដែរ។

ដូចនេះ បើសិនត្រូវប្រឈមមុខជាមួយនឹងការផ្លាស់ប្ដូរ មិនថាផ្លាស់ប្ដូរទៅក្នុងផ្លូវណាក៏ដោយ ក្រៅពីធ្វើចិត្តឲ្យមាំមួយរឹងប៉ឹងហើយ ក៏ត្រូវស្វែងរកឲ្យជួបផ្លូវវិជ្ជមានដែលកើតឡើងពីការផ្លាស់ប្តូរនោះ ព្រោះការផ្លាស់ប្ដូរម្ដងៗធ្វើឲ្យជីវិតមានឱកាសក្នុងផ្លូវណាមួយជាមិនខាន។ កាលបើដល់ពេលដ៏គួរ ក៏គួរដើរទៅជាមួយវាប្រកបដោយថាមពលដែលមានស្រាប់ ទោះបីជាខំប្រឹងក្រាញននៀលយ៉ាងណា ក៏មិនអាចញែកច្បាប់នៃការផ្លាស់ប្ដូរទៅបាន គិតបានបែបនេះហើយ មិនថាផ្លាស់ប្ដូរ រុះរើកន្លែងការងារ រុះរើផ្ទះសម្បែង ប្ដូរទៅទទួលតំណែងកន្លែងថ្មី ក៏“កុំសោកស្ដាយចំពោះរឿងដែលបានបាត់បង់ទៅ ប៉ុន្តែចូរត្រេកអរជាមួយរឿងដែលកំពុងចូលមកជំនួសវិញ”។

                                                                             

ប្រភព៖ http://tammastory.blogspot.com/2015