តើអ្នកកំពុងស្រឡាញ់ខ្លួនអ្នកដែរឬទេ?

តើអ្នកកំពុងស្រឡាញ់ខ្លួនអ្នកដែរឬទេ?  

ជីវិតនេះកើតមកបានត្រឹមតែម្ដងគត់ ព្រោះហេតុដូច្នោះ កុំបណ្ដោយឲ្យអ្នកណាមួយចូលមកធ្វើបាប ទាល់តែអ្នកក្លាយជាមនុស្ស ដែលលែងស្រឡាញ់ខ្លួនឯង” បានជាដាច់ខាត ។ ព្រោះយើងម្នាក់ៗ មិនប្រាកដបានទេថា  យើងត្រូវបាត់បង់អ្វី ឬត្រូវចំណាយពេលយូរប៉ុនណា ទម្រាំនឹងបានរីកធំធាត់លូតលាស់ឡើង គង់នៅបានដូចសព្វថ្ងៃនេះ ។ ដូចនេះ កុំសុខចិត្តឲ្យអ្វីមួយចូលមកធ្វើឲ្យអ្នកត្រូវក្លាយជាមនុស្សព្រមលើកទង់ស ឬលែងស្រឡាញ់ខ្លួនឯង ។

ផ្ដល់ភាពសំខាន់ចំពោះអ្នកដទៃច្រើនហួសហេតុពេក

ការដែលមនុស្សម្នាក់ៗ នឹងផ្ដល់ភាពសំខាន់ចំពោះអ្នកដទៃខ្លះ មិនថាក្នុងឋានៈជាអ្វី គឺជារឿងធម្មតា និងជាប្រពៃណីទូទៅរបស់មនុស្សក្នុងសង្គម ប៉ុន្តែការឲ្យភាពសំខាន់ក្នុងកម្រិតដែលគេហៅថា “ជ្រុលហួសហេតុពេក” រហូតដល់លែងចាប់អារម្មណ៍លើខ្លួនឯង លែងខ្វល់ពីខ្លួនឯង និងលែងរក្សាចិត្តខ្លួនឯង ប្រហែលជាមិនអាចចាត់ទុកថា ជារឿងសាមញ្ញសមគួរប៉ុន្មានដែរ ។ ការប្រគល់កាយ ការប្រគល់បេះដូង ដួងចិត្តមួយនេះទៅឲ្យអ្នកណាមួយ ដែលគេអាចមើលឃើញពីគុណតម្លៃរបស់អ្នកក្នុងមួយគ្រា ចាត់ទុកថា ជាការធ្វើបាបចិត្តកាយខ្លួនឯង ទៅដោយមិនដឹងខ្លួន។

កប់នៅជាមួយអារម្មណ៍ពិបាកៗ ដែលក្លំមើលចាំតែធ្វើបាប

តាំងឈ្មោះថា “អារម្មណ៍ពិបាកៗ” ប្រហែលមិនមានអ្នកណាចង់នៅជាប់គាំជាមួយវាយូរឡើយ ហើយក្នុងពេលខ្លះ យើងក៏មិនអាចគេចវេស ឬលបគេចចេញពីវាឲ្យផុតបាន ព្រោះរឿងខ្លះក៏មានឥទ្ធិពលយ៉ាងខ្លាំងក្លាចំពោះចិត្ត ។ ជាមធ្យោបាយដ៏ល្អបំផុតនោះ មិនគួរយកចំណុចរសើបចំណុចខ្សោយខ្លួនឯង ដោយការលិចកប់ជាមួយអារម្មណ៍ពិបាកនោះយូរពេកទេ ហើយគួរចាប់ផ្ដើមដោះស្រាយបញ្ហាពីតួខ្លួនយើងសិន ។ ព្រោះរឿងដែលកំពុងដឹងនេះ ច្រើនតែមានប្រភពចេញពីគំនិតរបស់ខ្លួនយើងទាំងអស់ ទោះបីថា មូលហេតុចម្បងនឹងកើតឡើងមកពីអ្នកដទៃក៏ដោយចុះ។

សំរក់ទឹកភ្នែកលើក្ដីស្នេហាហួសពេកដល់ធ្វើអ្វីលែងកើត

ជឿទេថា មនុស្សជាច្រើនអាចលើកយកក្ដីស្រឡាញ់ ធ្វើជាហេតុផលសំខាន់លេខមួយក្នុងជីវិត ដែលអាចប្រកាន់ថា មិនមែនជារឿងអ្វីត្រូវខុសឆ្គង ព្រោះស្នេហាជាវត្ថុស្រស់ស្អាត ប៉ុន្តែកុំភ្លេចឲ្យសោះថា គ្រប់យ៉ាងនៅលើលោកសន្និវាសមួយនេះ វាមានច្រើនមុំច្រើនជ្រុងទុកឲ្យសំឡឹងមើលជានិច្ច ។ កាលបើបានជួបប្រទះជាមួយផ្នែកជ្រុងណាល្អហើយ ច្រើនតែជួបជ្រុងមួយផ្សេងទៀត ដែលមានភាពអាក្រក់ដូចគ្នា ។ ដោយហេតុនេះ អ្នកខ្លះថ្នាក់ដល់បាត់បង់ម្ចាស់ការលើខ្លួនឯងទៅ ក្នុងពេលជួបប្រឈមមុខជាមួយការខកចិត្ត ខូចចិត្ត អស់សង្ឃឹម លែងរំពឹងបាន ទាល់តម្រិះសុញគំនិត ដល់លែងមានសតិសម្បជញ្ញៈ ក្នុងការប្រើប្រាស់ខ្សែជីវិតមួយតទៅមុខទៀត និងគិតតែពីរឿងចាស់ អនុស្សាវរីយ៍ដែលកន្លងផុតទៅ វិលវល់រកទីបញ្ចប់គ្មាន។

មិនព្រមបើកចិត្តទទួលយករឿងថ្មីៗ

មនុស្សខ្លះអាចធ្លាប់ជួបប្រទះរឿងរ៉ាវដែលធ្វើឲ្យមានអារម្មណ៍ថា ពិភពលោកទាំងមូល បែកធ្លាយរលាយទៅមួយប៉ព្រិចភ្នែក រហូតដល់កើតមានអារម្មណ៍ភ័យខ្លាច ក្រែងរអាក្នុងការចាប់ផ្ដើមរឿងថ្មីៗ ព្រោះខ្លាចធ្លាក់ចូលទៅក្នុងស្ថានការណ៍បែបដើមទៀត ប៉ុន្តែការដែលមិនព្រមបើកចិត្តទទួលយករឿងថ្មីៗ ក៏ប្រកាន់ថា ជាការរារាំងឃុំឃាំងធ្វើជាគុកគ្មានជញ្ជាំងដាក់ខ្លួនឯង ហើយជាការបំផ្លាញឱកាសល្អៗ ដែលកំពុងរត់ចូលមកក្នុងជីវិត លទ្ធផលត្រូវជួបតែភាពរៀងចាល ភាពបាក់ស្បាតដែលមានស្រាប់ មិនមានសមត្ថភាពក្នុងការស្ថាបនាអភិឌ្ឍចេញទៅណារួចឡើយ ។

រត់ដេញរឿងដែលកំពុងរត់ពួនគេចចេញពីខ្លួន

ការរត់ដេញតាមរឿងដែលកំពុងរត់គេចចេញពីអ្នកទៅ មានតែធ្វើឲ្យអ្នកបង់ខាតពេលវេលា និងហត់នឿយដោយឥតបានប្រយោជន៍អ្វីទាល់តែសោះ ហើយអាចជាការចង្អុលបង្ហាញប្រាប់បានយ៉ាងច្បាស់លាស់ថា របស់នោះមិនមែនជារបស់អ្នកតាំងពីគ្រាដំបូងមកម្ល៉េះ ព្រោះបើវាជារបស់អ្នកដោយពិតមែន អ្នកប្រហែលជាមិនត្រូវអស់អារម្មណ៍នឿយហត់ ឬប្រើសេចក្ដីព្យាយាមក្នុងការបានវាមកដល់ថ្នាក់នោះទេ កុំគិតរវល់តែខាតបង់ពេលវេលាទៅជាមួយរឿងទាំងអស់នោះទៀតអី ។

កាត់ផ្ដាច់ពីការតូចចិត្តក្នុងជោគជតា

ការនិយាយកាត់ផ្ដាច់គឺដើម្បីទាមទារចំណាប់អារម្មណ៍ មិនធ្លាប់ជួយអ្វីឲ្យមានភាពប្រសើរឡើងសោះ មិនតែប៉ុណ្ណោះសោត ថែមទាំងត្រូវសង្គម និងមនុស្សដែលនៅជិតខាងខ្លួន មើលឃើញពីភាពកំសោយរបស់ខ្លួនទៀតផង ព្រោះការបានកើតមកនេះមានតែម្ដងគត់ បើមិនធ្លាប់បានជួបប្រទះជាមួយឧបសគ្គទេ ប្រហែលជាគ្មានពាក្យថា “ជីវិត” ទេមើល៍ទៅ ។ មធ្យោបាយដ៏ល្អបំផុត គួរគិតលៃលករកពេលវេលាក្នុងការកាត់ផ្ដាច់ពីភាពតូចចិត្តតូចថ្លើម ក្នុងជោគជតាកម្ម ផ្លាស់ប្ដូរមកជាកម្លាំងជម្រុញ ធ្វើឲ្យអនាគតមានការរីកចំរើនលូតលាស់វិញ ប្រសើរជាង។

រអ៊ូរទាំឲ្យអ្នកដទៃដឹងពីភាពទន់ជ្រាយរបស់ខ្លួន

ភាពទន់ជ្រាយកើតមានឡើងត្រឹមតែកំឡុងពេលណា ដែលជួបប្រទះជាមួយបញ្ហាប៉ុណ្ណោះ វាមិនមែនជារឿងតាមជាប់ខ្លួន ជាប់ជីវិតយើងទៅរហូតនោះទេ ។ ដូចនោះ កាលណាមានអារម្មណ៍ទន់ជ្រាយ ទន់ខ្សោយ ក៏គួរតែរកពេលមកស្ដាប់មតិយោបល់របស់គេប្រកបដោយការយល់ មានភាពប្រសើរជាងការទៅរអ៊ូរទាំបន្ធូអារម្មណ៍ក្នុងពិភពសង្គម ដែលយើងមិនអាចទទួលដឹងឮសព្វគ្រប់បានថា តើនឹងមានមនុស្សប៉ុន្មាននាក់មានចេតនាល្អ និងមានចិត្តស្មោះស្ម័គ្រភត្ដីភាពជាមួយយើងពិតនោះ ហើយក៏មិនប្រាកដទេថា មួយក្នុងចំណោមក្រុមមនុស្សទាំងនោះ នឹងអាចកំពុងរង់ចាំតាមចាក់បំពេញបំណងប្រាថ្នារបស់យើងក៏ថាបាន?

ផ្ដោតអារម្មណ៍តែរឿងណាសំខាន់ តិចជាងរឿងអនាគត

អាចមានមនុស្សខ្លះ កំពុងសម្លឹងរំពៃរែងគិតតែរឿងក្នុងពេលបច្ចុប្បន្ន ទាល់តែភ្លេចអស់រលីងឈឹងថា ថ្ងៃស្អែកនេះ គឺជាអនាគត ជាលទ្ធផលមួយឲ្យលះបង់រឿងរ៉ាវចំពោះមុខ ដែលខ្លួនត្រូវធ្វើ ព្រោះរវល់តែច្របូកច្របល់ត្រាំត្រែងក្នុងរឿងដែលកំពុងកើត កំពុងមាន ប៉ុន្តែចាំទុកថា មិនមានអ្វីសំខាន់ទៅជាង ការត្រៀមលក្ខណៈ និងដាក់គំរោងការអនាគត ឲ្យរត់លើវិថីដ៏ល្អមួយរួចជាស្រេចនោះទេ ។ ដូចនេះ រឿងណាដែលមិនមានសំខាន់ដល់ជីវិតច្រើន ឈប់គិត ឈប់ខ្វល់ខ្លះទៅក៏បាន។ 

ធ្វើបាបរូបរាងកាយ ដោយខ្វះការមើលថែ

កាលបើដល់គ្រាមួយ ត្រូវប្រឈមមុខជាមួយនឹងការឈឺចាប់ ពីការខកចិត្ត ខូចចិត្ត ។ មនុស្សជាច្រើនបានជ្រើសរើសរកវត្ថុជំនួយ ក្នុងការព្យាបាលរបួសដួងចិត្ត ខ្ទេចខ្ទាំបេះបូង ប្រែះឆាពីមនុស្សសំណព្វចិត្ត ដោយការ “ការផឹក ចូលក្លឹប បារីស្រីស្រាកំដរចិត្ត កំដរអារម្មណ៍ខ្លួន ដោយមិនដឹងសោះថា វាទាំងអស់ហ្នឹងជាវត្ថុមួយ ដែលអាចជួយសង្រ្គោះអ្នកបានតែមួយរយៈពេលខ្លី ប៉ុន្តែឥទ្ធពលនៃផលប៉ះពាល់របស់វាចំពោះសុខភាព មានរយៈពេលយូរ ។ ក្រៅពីនេះ ថែមទាំងអ្នកប្រព្រឹត្តក្នុងរឿងនោះ គេមើលមកឃើញក្នុងផ្លូវអវិជ្ជមាន  ។ វិធីដ៏ល្អ គួររកវិធីកែខៃស្ថាបនាក្នុងការរក្សាខ្លួនឯង ឲ្យសក្ដិសមជាងវិធីបែបនេះ ហើយអាចជួយឲ្យខ្លួនអ្នកមើលទៅ ហាក់ដូចជាមានតម្លៃណាស់ និងមានអារម្មណ៍ស្រឡាញ់ខ្លួនឯងខ្លាំងជាងដើម ។

ដង្ហោយហៅតែរឿងដែលអាចជួយចាក់បំពេញឲ្យខ្លួន

បើសិនរវល់តែសម្លឹងរកមើលវត្ថុដែលចូលមកជួយចាក់បំពេញក្នុងខ្លួនអ្នកបាន ហ៊ានភ្នាន់បានថា ជីវិតនេះមុខជាមិនបានជួបជាមួយសេចក្ដីសុខដ៏ពិតប្រាកដឡើយ ម្យ៉ាងទៀត អ្នកអាចត្រូវគេមើលឃើញដូចជាពួកមនុស្សដង្ហោយហៅរកសេចក្ដីស្រឡាញ់ ដែលមិនអាចឈររឹងប៉ឹងបានដោយខ្លួនឯង ហើយក៏ប្រហែលជាគ្មានអ្នកណាមួយចង់នៅរួមរស់ជាមួយមនុស្ស ដែលគិតតែពីទទួលសេចក្ដីស្រឡាញ់របស់អ្នកដទៃ តែខ្លួនមិនធ្លាប់បានឲ្យអ្វីដល់អ្នកដទៃសោះនោះ ពិតមែនទេ?

ដោយ៖ sineenow

រូបភាព៖ ហ្វេសប៊ុក

ប្រែ.ចាន់

ប្រិយមិត្តអ្នកអាន អាចបញ្ចេញមតិយោបល់ក្នុងអត្ថបទដែលចុះផ្សាយនេះបាន បើមានត្រង់ចំនុចណាមួយមិនសមស្រប មិនសូវទំនង មិនសូវស៊ីសេចក្ដី ឬខុសឆ្គាំឆ្គង ឃ្លោងឃ្លា ល្បះប្រយោគណាមួយនោះ ស្មេរសូមទទួលយកការរិះគន់ កែលំអរនេះ ដោយក្ដីរីករាយបំផុត។