ហេតុនៃភាពជោគជ័យដ៏អស្ចារ្យ

ហេតុនៃភាពជោគជ័យដ៏អស្ចារ្យ

ចិត្តដែលមានសេចក្ដីស្ងប់ មានភាពបរិសុទ្ធផង មានសីលជាទីរ៉ាប់រង ឬជាបាតគ្រឹះផង លោកអ្នកប្រាជ្ញទើបប្រៀបសីលនេះ ដូចជាផែនដី  ដែលអាចទ្រទ្រង់បានអ្វីសព្វសារពើក្នុងលោក និងរបស់ទាំងឡាយទាំងពួង បើមានការប្រាសចាកសីលជាផែនដីជាទីរ៉ាប់រងនេះទៅហើយ កុសលធម៌ទាំងឡាយក៏កើតឡើងមិនបាន តាំងនៅមិនបានដូចគ្នា។

ក្នុងកិច្ចនេះ ត្រូវមានសីលធ្វើជាផែនដីជាទីរ៉ាបរង កុសលធម៌ទាំងឡាយ ទើបតាំងឡើងបាន លើសពីសីល ភាពបរិសុទ្ធរបស់ចិត្តនេះទៅ ត្រូវមានសមាធិជារឿងសំខាន់ផងដែរ ព្រោះសមាធិធ្វើឲ្យចិត្តបរិសុទ្ធពីនីវរណធម៌ទាំង៥។ ភាពបរិសុទ្ធប្រាសចាកពីនីវរណធម៌ទាំង៥នេះ គឺជាបាតបញ្ញា ។

លោកអ្នកប្រាជ្ញប្រៀបប្រដូចរាងកាយនេះថា សមាធិជាចំណែកជើង ជាទីតាំងទ្រជំហរដងខ្លួន និងក្បាល ។ ដូចនោះ ទើបត្រូវមានសមាធិជាជើងមុខ ជាទីរ៉ាប់រងទ្រដងខ្លួន បញ្ញាដើម្បីវិមុត្តិគឺការរួចផុត លោកអ្នកប្រាជ្ញ ប្រៀបទុកដូចជាក្បាល ។

សីល សមាធិ និងបញ្ញា ទាំងបីនេះជាមូលហេតុ ដែលនាំឲ្យមានវិមុត្តិ… ការរួចចាកផុតពីកិលេស ជាចំណែកផល ទើបត្រូវអាស្រ័យគ្នា  ទុកដូចជាផែនដី ជាជើង ជាដងខ្លួន ជាក្បាល។ ការប្រតិបត្តិ ទើបត្រូវប្រតិបត្តិឲ្យមានសីលផង មានសមាធិផង និងមានបញ្ញាប្រកបជាមួយគ្នាផង ទើបជាការសម្រេចបាននូវផ្លូវទៅកាន់ទីរំលត់ទុក្ខពោលគឺវិមុត្តិមគ្គ ៕

អប់រំដោយ

ព្រះញាណសំវរ