អង្គប្រកបនៃក្ដីស្រឡាញ់
ត្រឹមតែពាក្យថា “ស្រឡាញ់”
ប្រហែលជាមិនទាន់មានន័យគ្រប់គ្រាន់ដែលអាចទប់ស្កាត់អ្នកណាមួយ
ឲ្យនៅរស់រួមជាមួយគ្នាបានអស់មួយជីវិតឡើយ ព្រោះថា បើមនុស្សម្នាក់ៗមិនមានអង្គប្រកបនៃក្ដីស្រឡាញ់នោះទេ ពិតណាស់ហើយថា អ្វីៗក៏ត្រូវមានលក្ខខណ្ឌ ច្រើនប្រការរបស់វាដែរ ។
លក្ខខណ្ឌនេះហើយ
ដែលជារឿងអាចជួយអបស្ទប់ គាំពារទ្រទ្រង់សម្ព័ន្ធភាពរវាងគ្នានិងគ្នាឲ្យឈានជើងឆ្លងផុតដល់ត្រើយនៃសុភមង្គលរបស់ខ្លួនបាន
និងជួបតែភាពផ្អែមល្ហែមល្អូកល្អើនដាក់គ្នានៃការមានជីវិតគូ ដោយម្នាក់ៗត្រូវមានអង្គប្រកបផ្សេងៗ
ដែលជាការចាំបាច់សម្រាប់មនុស្សក្នុងដំណើរការជីវិតគូមួយនេះ ។
ជាការពិតណាស់
មនុស្សគ្រប់រូប មិនថាចាស់ មិនថាក្មេងទេ សុទ្ធតែធ្លាប់បានឆ្លងកាត់ និងនឹងកំពុងឆ្លងកាត់ពាក្យមួយថា
“ស្រឡាញ់” នេះទាំងអស់ ។ ហើយប្រិយមិត្តអ្នកអាន ដែលកំពុងស្ថិតនៅក្នុងដំណាក់កាលនៃការមានក្ដីស្រឡាញ់នេះ
និងបម្រុងឈានទៅចាប់យកអ្នកណាម្នាក់ មកធ្វើជាគូអនាគតរបស់ខ្លួនក្នុងថ្ងៃអនាគត
ពិតជាចង់ដឹងថា អង្គប្រកបនៃក្ដីស្រឡាញ់នេះមានអ្វីខ្លះ ដែលខ្លួនត្រូវមាន
សម្រាប់សាងសុភមង្គលជីវិត ក៏ដូចជាអ្នកកំពុងមានបំណងចង់បានជីវិតគូមួយហ្នឹងគេដែរ ។
អង្គប្រកបនេះ គោលគំនិតល្អដើម្បីជីវិត
ធ្លាប់បានសរសេរគោលសង្ខេបខ្លីរួចមកហើយ ប្រហែលជាប្រិយមិត្តរបស់ផេកគោលគំនិតល្អដើម្បីជីវិតធ្លាប់បានអានរួចមកហើយដែរ
។ តែឥឡូវនេះ គេហទំព័រគោលគំនិតល្អដើម្បីជីវិត មានបំណងចង់លើកយកលក្ខខណ្ឌ
ឬអង្គប្រកបនេះមកសរសេរម្ដងទៀត ដើម្បីទុកជាប្រយោជន៍ដល់អ្នកអាន ដែលមានបំណងចង់ឈ្វេងយល់បន្ថែម
ទៅលើការបកស្រាយពន្យល់លើការយល់របស់ខ្លួនថែមទៀតនុ៎ះ ។ អង្គប្រកបនៃក្ដីស្រឡាញ់ តើមានអ្វីខ្លះ? ប្រិយមិត្តអ្នកអាន អាចនាំគ្នាអានកំសាន្តលេង កំសាន្តចិត្ត និងកំសាន្តអារម្មណ៍ ដូចតទៅ៖
១) ពេលវេលា
ការផ្ដល់ពេលវេលាដល់មនុស្សជាទីស្រឡាញ់របស់ខ្លួន
គឺជារឿងសំខាន់ណាស់ក្នុងជីវិតគូ ដើម្បីឲ្យចំណងស្នេហ៍នៅឋិតថេរបានយូរអង្វែង
បើសិនអ្នកម្ខាងទៀត មានពេលវេលាពេញលេញសម្រាប់ឲ្យភាគីដៃគូខ្លួនបាននោះជារឿងល្អ ។
បើផ្ទុយទៅវិញ បើសិនអ្នកម្ខាងទៀត មិនមានពេលគ្រប់គ្រាន់
អាចឈានទៅរកភាពមិនចុះសម្រុងនឹងគ្នា រហូតដល់មានចិត្តនឿយណាយ ធុញថប់ ដូចពាក្យមួយថា
កាយកាន់តែឃ្លាត ចិត្តកាន់តែឆ្ងាយ ។ ការមានលុយកាក់ ទ្រព្យសម្បត្តិហូរហៀរប៉ុនណា
ក៏មើលទៅជីវិតគូដូចជាខ្វះរសអ្វីម្យ៉ាង ។ បើអ្នកស្រឡាញ់ អាណិតមនុស្សដែលខ្លួនស្រឡាញ់
អ្នកគួរលៃលករកពេលណាមួយសម្រាប់ពួកគេ ដើម្បីនៅជួបជុំគ្នា ។
២) អ្នកជិតខាង
យើងមិនអាចច្រាលចោលបានជាដាច់ខាត់
ចំពោះអ្នកជិតខាងមួយនេះ ។ ព្រោះថា
អ្នកជិតខាងយើងក៏មានការរួមចំណែកក្នុងការស្ថាបនាសម្ព័ន្ធភាពដូចគ្នា
បើសិនគ្មានអ្នកនៅក្បែរខ្លួនយើងទេ ជាពិសេសមនុស្សសំខាន់ៗ ដូចជា គ្រូសារ ឬមិត្តភក្ដិ
។ បើពួកគេមើលឃើញយល់ស្របគ្នាថាល្អហើយ វាក៏អាចធ្វើឲ្យយើងមានសេចក្ដីសុខ
ក្នុងការចងទំនាក់ទំនង និងរក្សាចំណងមួយនេះបានបន្តទៅមុខទៀត ។
៣) ការផ្ដល់កិត្តិយស
មូលដ្ឋានចម្បងនៃការបានកើតមកជាមនុស្សគឺ
ការផ្ដល់កិត្តិយសឲ្យគ្នាទៅវិញទៅមក ។ គ្មានអ្នកណាម្នាក់មិនថា
មិនចង់បាននូវតម្លៃនៃកិត្តិយសទាំងនេះទេ ព្រោះវាជារឿងមួយ ដែលអាចជួយបន្ថែមតម្លៃឲ្យដល់ជីវិតខ្លួនឯងបាន
។ ជាពិសេសបំផុតនោះ ការទទួលបានកិត្តិយសពីបុគ្គលខ្លួនដែលស្រឡាញ់ ជាចំណែកមួយក្នុងការញ៉ាំងអារម្មណ៍ល្អៗឲ្យកើតឡើងបន្ថែមទៀត
។
៤) ការយល់ចិត្ត
ប្រហែលជាគ្មានអ្នកណាមួយ
ចង់ប្រើជីវិតបែបមិនយល់ចិត្តគ្នាច្រើនប៉ុន្មានទេមើល៍ទៅ ព្រោះថា ការប្រើជីវិតបែបមិនយល់ចិត្តគ្នា
មិនអាចឋិតថេរបានយូរអង្វែងឡើយ ។ ជាទូទៅ មនុស្សណាដែលចង់រួមរស់នៅជាមួយគ្នា
ដោយមិនបានយល់ចិត្តគ្នានោះ គឺជាមូលហេតុនៃការបិទឆាក ឬបញ្ចប់សម្ព័ន្ធភាព
ហើយមូលហេតុនៃការមិនបានយល់ចិត្តគ្នានេះឯង ជាចំណុចចាប់ផ្ដើមឈ្លោះវិវាទទាស់ទែងគ្នា
ដែលឈានទៅរកចំណុចបញ្ចប់នៅទីបំផុត ។ ក្ដីស្រឡាញ់ដែលល្អរីកស្រស់បំព្រង
ទើបពោរពេញទៅដោយការយល់ចិត្តគ្នា ដែលបានឲ្យគ្នាទៅវិញទៅមក ។
៥) ការទុកចិត្ត
ការមានជំហរលើសម្ព័ន្ធភាពដែលពោរពេញទៅដោយ “ការសង្ស័យ”
មិនជារឿងមួយ ដែលមើលទៅល្អប៉ុន្មានទេ
ព្រោះអាចជាមូលហេតុដែលធ្វើឲ្យកើតមានបញ្ហាមិនចេះចប់ កើតឡើងតាមក្រោយមកជាប់គ្នារដឹក ។
ហើយក្នុងលោកនេះ ក៏មានប្រភេទដៃគូជីវិត មិត្តភត្តិ អ្នកជំនួញ អ្នកនយោបាយមិនទុកចិត្តគ្នា
មិនជឿចិត្តគ្នាច្រើនណាស់ ដែលជាការបាត់បង់ឱកាសនូវអារម្មណ៍ល្អៗរបស់ខ្លួន
ក្រៅពីមិនមានការទុកចិត្តគ្នា ដែលជាការមួយ ធ្វើមនុស្សឲ្យខុសអស់ ។
៦) ភាពសមរម្យ
អង្គប្រកបនៃក្ដីស្រឡាញ់មួយប្រភេទនេះ ជួនកាល
អាចកើតឡើងត្រង់មូលដ្ឋាននៃ “ភាពសមរម្យ” ទាំងក្នុងជីវភាព ក្នុងឋានៈតួនាទីការងារ
និងបែបបទក្នុងការទ្រទ្រង់ដំណើរការជីវិត រួមទាំងឧបនិស្ស័យចិត្តគំនិតផងដែរ ។
ភាពសមរម្យនេះ ជាឧបករណ៍វាស់ស្ទង់ ដែលអាចចង្អុលប្រាប់បានថា តើសម្ព័ន្ធភាពរបស់បុគ្គលទាំងពីរហ្នឹង
អាចប្រព្រឹត្តទៅព្រមគ្នាបានស្រួលបួលឬអត់?
៧) ខន្តីអំណត់
ជាមួយរឿងរ៉ាងខ្លះ ចាំបាច់ត្រូវប្រើពាក្យថា
ខន្តីអំណត់ ក្នុងការចំណាយពេលយ៉ាងយូរ ក្នុងការរៀនដឹង
ឬក្នុងការឈ្វេងយល់បាតុភូតិផ្សេងៗ រួមទាំងរឿងរ៉ាវសម្ព័ន្ធភាពនេះផងដែរ ។ ភាពអំណត់
ជាចំណែកមួយ ដែលធ្វើឲ្យមនុស្សគ្រប់គ្នា អាចឈានជើងឆ្លងផុតរាល់ឧបសគ្គទាំងឡាយ
ដែលបានជួបប្រទះដោយការយល់ និងមានហេតុផលជាមួយវាកាន់តែច្រើនឡើង ហើយរឿងដែលសំខាន់ខ្លាំងជាងនេះទៅទៀត
ដែលតម្រូវឲ្យដៃគូគ្រប់គ្នាមានវាច្រើនបំផុតទុកក្នុងចិត្ត ។ ក៏ប៉ុន្តែ
អ្វីដែលមិនអាចខ្វះបាននោះ ត្រូវមានសតិបញ្ញាក្នុងការអត់ធ្មត់ឲ្យត្រូវរឿង
មិនមែនចេះតែអត់ធ្មត់សង្កត់ចិត្តទៅគ្រប់រឿងទាំងអស់នោះទេ ។
៨)
ការចងសម្ព័ន្ធ
បើសិនផ្ដោតអារម្មណ៍ទៅលើកពាក្យថា “ស្រឡាញ់” តែមិនបានសម្ផស្សៈប៉ះពាល់ត្រូវជាមួយនឹងពាក្យថា
“ការចងសម្ព័ន្ធ” ទេ វាតែងតែគ្មានន័យអ្វីទាំងអស់ជាមួយបេះដូងឡើយ
ព្រោះការចងសម្ព័ន្ធនេះឯង
ដែលជារឿងសំខាន់ក្នុងការទប់ស្កាត់ ឬជារនាំងរបងការពារអ្នកទាំងពីរ មិនឲ្យរបូតដាច់ចេញពីគ្នាបាន
។
៩)
ភាពត្រឹមត្រូវ
ព្រោះពាក្យថា “ស្រឡាញ់” នេះ ចាំបាច់ត្រូវមានដំណើរការលើវិថីមួយនៃភាពត្រឹមត្រូវ
ដែលមិនបង្កឲ្យកើតអារម្មណ៍ខុសលើអ្នកណាម្នាក់ បើសិនជាដឹងច្បាស់ខ្លួនឯងថា ខ្លួនកំពុងដើរលើគន្លងខុស
នោះគេមិនអាចហៅថា “ក្ដីស្រឡាញ់ដ៏ប្រពៃមួយ” បានទេ ។
សរុបរួមមកវិញ ដើម្បីឲ្យក្ដីស្រឡាញ់មួយនេះ
ទទួលបានសម្ព័ន្ធភាពមួយល្អ រក្សាបានយូរអង្វែងទៅមុខជាបន្ត ។ ដៃគូជីវិត
ក៏ដូចជាមនុស្សដែលមានដៃគូជីវិតរួចហើយ ត្រូវឈ្វេងយល់បន្ថែមនូវអង្គប្រកប
ឬធាតុផ្សំនៃក្ដីស្រឡាញ់នេះឲ្យបានច្រើនតាមដែលអាចទៅរួច ។
ជាទីបញ្ចប់នេះ
ប្រិយមិត្តអាចទៅឈ្វេងយល់អានបន្ថែមលើសុខដុមគ្រួសារ ដែលដៃគូជីវិតត្រូវមានឲ្យគ្នាទៅវិញទៅមក
មានប្រាំចំណុច និងការសម្រេចដល់ការសង្រ្គោះគ្នាមាន៤យ៉ាង និងគោលការណ៍ធ្វើឲ្យដៃគូជីវិតមិនចេះបែកគ្នាគ្រប់ភពគ្រប់ជាតិ
មាន៤ចំណុចទៀត។ ទ្រឹស្ដីគោលការណ៍ទាំងនេះ សុទ្ធតែនៅក្នុងព្រះពុទ្ធសាសនាទាំងអស់ ៕
ចាន់/គោលគំនិតល្អដើម្បីជីវិត
No comments:
Post a Comment