ស្នេហ៍ស្មោះមិនចាញ់ចម្ងាយផ្លូវ ៥វិធី រក្សាស្នេហ៍មនុស្សនៅឆ្ងាយ យ៉ាងណាក៏ត្រូវឆ្លងផុត

ស្នេហ៍ស្មោះមិនចាញ់ចម្ងាយផ្លូវ ៥វិធី រក្សាស្នេហ៍មនុស្សនៅឆ្ងាយ យ៉ាងណាក៏ត្រូវឆ្លងផុត

ការប្រាប់អំពីវិធី ដែលជាគន្លឹះរបស់គូស្នេហ៍ជាច្រើនគូរួចមកហើយ ។ ថ្ងៃនេះផងដែរ គោលគំនិតល្អដើម្បីជីវិត សូមយកចិត្តទុកដាក់ ផ្ដោតអារម្មណ៍ទៅលើអ្នកដែលកំពុងរាប់អានមនុស្សដែលនៅឯជើងមេឃបន្តិចណ៎ា ហើយជាការយល់ផ្ទាល់ខ្លួន យើងនឹងរាប់អានសេពគប់មនុស្សដែលរស់នៅឆ្ងាយពីខ្លួនភាគច្រើន យូរៗទើបបានមកជួបគ្នាម្ដង តែនៅរក្សាភាពល្អូកល្អើនជាមួយគ្នាបាន ភាគតិចណាស់ ដែលយើងអាចមើលឃើញពីគូស្នេហ៍ អាចយកឈ្នះចម្ងាយផ្លូវឆ្ងាយនេះបាន ពួកគេបានបញ្ចប់ពីសម្ព័ន្ធភាពមួយនេះទៅ ដោយការឈឺចាប់ និងមានវិប្បដិសារីបំផុតក្នុងជីវិត ។ ថ្ងៃនេះ គោលគំនិតល្អដើម្បីជីវិត សូមចូលរួមជាអ្នកផ្ដល់កម្លាំងចិត្ត ដល់ប្រិយមិត្តណា ដែលកំពុងជួបវិបត្តិដូចនេះ ដោយបានលើកយកគោលការណ៍មួយ មកចែករំលែក ។  គោលការណ៍ ៥វិធី យកឈ្នះចម្ងាយផ្លូវ ក្បួនខ្នាតសម្រាប់គូស្នេហ៍នៅឯជើងមេឃ មកអានកំសាន្ដលេង ទុកជាគតិក្នុងការត្រិះរិះពិចារណា ដូចខាងក្រោម៖

១) ស្មើដើមស្មើចុង

ស្មើដើមស្មើចុង ជាចំណុចបញ្ហាចោទមួយដែលគ្រប់គូស្នេហ៍បានជួបសឹងតែដូចគ្នាៗ ជាពិសេសកម្លោះៗ ត្រូវក្រមុំជាច្រើនបានលួចមកខ្សិបប្រាប់ថា ពេលដំបូងដែលមានគេមកសុំស្រឡាញ់ (ញ៉ែ)យើងនេះ និយាយតាមទូរស័ព្ទឆ្លើយឆ្លងជាមួយគ្នា ជួនកាលពេលខ្លះទល់ព្រឹកក៏មាន ប៉ុន្តែកន្លងទៅមួយរយៈពេល ក៏ចាប់ផ្ដើមរកលេសអាងច្រើនប្រការ ច្រើនរឿង ។ តាមពិតនោះ នារីយើងមិនបានទាមទារអ្វីច្រើនណាស់ណាទេ គ្រាន់តែរកពេលនិយាយគ្នាលេងខ្លះ តបសារគ្នាខ្លះ ព្រោះកុំឲ្យភ្លេចគ្នាថា ការនិយាយគ្នាតាមទូរស័ព្ទជាផ្នែកមួយសំខាន់ ដែលអ្នកទាំងពីរមានអារម្មណ៍ថា ខ្លួនបាននៅជិតស្និតគ្នាច្រើនឡើង ក៏ត្រូវមានការអាប់ដែតរឿងរ៉ាវរបស់ខ្លួនម្នាក់ៗខ្លះ មិនដូចនោះទេ វានឹងកាន់តែឃ្លាតឆ្ងាយទៅៗជារឿយៗ រហូតដល់លែងមានអារម្មណ៍អ្វីចំពោះគ្នាតទៅទៀត ។

២) មិនត្រូវភ្លេចថ្ងៃសំខាន់ៗ

បុរសច្រើនណាស់ ដែលមានគំនិតយល់ថា ថ្ងៃណាក៏ដូចជាថ្ងៃណាដែរ សុំត្រឹមតែយើងពីរនាក់នៅស្រឡាញ់គ្នាគឺវាបានបាត់ទៅហើយ ប៉ុន្តែសម្រាប់នារីភេទ ដែលជាភេទល្អិតល្អន់ម៉ត់ចត់វិញ ពួកគេនឹងផ្ដល់ភាពសំខាន់គ្រប់រឿង ជាពិសេសថ្ងៃខួបកំណើត ថ្ងៃគំរប់ខួបអាពាហ៍ពិពាហ៍ ថ្ងៃបុណ្យនៃក្ដីស្រឡាញ់ ។ នារីច្រើនណាស់ ដែលមានក្ដីសង្ឃឹមខ្ពស់បំផុតជាពិសេស ហើយក៏មិនចាំបាច់មានកាដូរ ឬរបស់អ្វីជូនឲ្យនាងក៏បាន សូមកុំបំភ្លេចនៅថ្ងៃទាំងនេះគឺនាងពេញចិត្តគាប់ចិត្តហើយ ។

៣) បន្ថែមរសផ្អែមល្ហែមបន្ដិចជារឿយៗ

ក្នុងរឿងនេះ ជារឿងមួយដែលគ្រប់គូត្រូវធ្វើដាក់គ្នាទៅវិញទៅមកស្រាប់ហើយ ជាពិសេសគូស្នេហ៍ណាមួយដែលកំពុងរស់នៅឆ្ងាយពីគ្នា គឺគួរតែបន្ថែមរសផ្អែមល្ហែមញឹមញាប់ជាងគូស្នេហ៍ដែលនៅជិត ។ អ្វីដែលជាពិសេសនោះគឺពាក្យសម្ដីនេះ ជារឿងចម្បងគេតែម្ដង មានគូស្នេហ៍ជាច្រើនបានផ្ដល់ជាមតិថា កុំប្រើពាក្យសម្ដីគ្រោតគ្រាត ត្រមាំងត្រមោកដាក់គ្នាអីល្អជាង ទន់ភ្លន់ខ្លះក៏ជាការមួយក្នុងការបន្ថែមសោភ័ណភាពដល់ក្ដីស្រឡាញ់ កុំភ្លេចឲ្យសោះថាគូស្នេហ៍យើងមិនមែនដូចជាគូស្នេហ៍ផ្សេងៗទេ ដូច្នោះការនិយាយផ្អែមល្ហែមជាអត្ថិភាពបំផុត ។

៤) កុំនិយាយចែកផ្លូវគ្នាញយៗ

ឈ្លោះគ្នាម្ដងណា មិនបាច់និយាយច្រើនលែងគ្នាតែម្ដងទៅវាស្រួលជាង ទោះជាមានរឿងតូចតាចមិនដល់ថ្នាក់លែងលះគ្នា ក៏យកពាក្យថាលែងគ្នានេះ មកគំរាមសំឡុតស្រីៗដែរ មនុស្សដែលមាននិស្ស័យបែបនេះ សូមផ្ដាំផ្ញើប្រាប់ផងទៅចុះថា ធ្វើឲ្យប្រុសៗបានចិត្តឡើងចាងមិនបានយូរទេ  ដំបូងៗ ចេះតែស្របតាម ទន់ចិត្តតាម តែបើនិយាយដដែលជាដដែល គ្មានហេតុផល មិនមានសតិសម្បជញ្ញៈនៅក្នុងខ្លួន មួយរយទាំងមួយរយ គឺបាយៗ លាសិនហើយ មនុស្សដែលព្រមបែកផ្លូវទៅបែបនេះ នឹងលួងលោមអង្វរករ និងផ្សះផ្សារយល់ចិត្តយល់ថ្លើមគ្នាវិញ ប្រហែលជាលំបាកជាងគូស្នេហ៍ដទៃៗហើយមើល៍ទៅ ។ ដូចនេះ មុននឹងបង្ហើមមាត់បញ្ចេញវាចា សូមអ្នកគិតឲ្យបានច្បាស់លាស់សិនណ៎ា ប្រសិនបើមិនចង់ឲ្យមានវិប្បដិសារី ដល់សម្ព័ន្ធភាពស្នេហារបស់ខ្លួន ។

៥) ជឿទុកចិត្តគ្នា

ការជឿទុកចិត្តគ្នាទៅវិញទៅមកនេះ ជាគ្រឹះរបស់ស្នេហា បើគូស្នេហ៍ណាមួយខ្វះមូលដ្ឋានគ្រឹះនេះហើយ មិនថានៅជិត ឬនៅឆ្ងាយគ្នាទេ មិនអាចប្រព្រឹត្តទៅបានរលូនឡើយ ។ គូស្នេហ៍ដែលមានចម្ងាយផ្លូវជាឧបសគ្គផង ព្រមទាំងនៅឆ្ងាយពីគ្នាទៀតនោះ វាក៏ចាប់ផ្ដើមមានអារម្មណ៍ថា ដូចជារៀងរយាលពីគ្នាជាបណ្ដើរៗហើយ ។ ការមិនទុកចិត្តគ្នា ដោយមានចេតនាគិតថា តើគេលួចមានស្រី លួចមានប្រុសឬទេ? គេក្បត់ចិត្តដែរអត់? ទាល់តែធ្វើឲ្យជីវិតគូលែងមានក្ដីសុខ ក្លាយជាមនុស្សវក់វីក្នុងអារ្មណ៍ មួយថ្ងៃៗ គិតពីមើលគ្នាក្នុងការចាប់កំហុសសង្សារ កើតមានអាការៈធ្ងន់ធ្ងរ ក៏ដល់ថ្នាក់ថា សង្សារខ្លួនទៅជិតស្រីណាលែងបាន ក៏ចាប់ចិត្តសង្ស័យភ្លាមៗ ។ បើមានមនុស្សមានសភាពបែបនេះ ត្រៀមខ្លួនចាំទទួលយកភាពនៅលីវទៅចុះ ។

ជាទីបញ្ចប់ចង់ប្រាប់ថា គោលការណ៍ទាំងប្រាំប្រការនេះ បើសិនជាគូរស្នេហ៍ ដែលកំពុងរស់នៅឆ្ងាយពីគ្នា ត្រូវយកគោលការណ៍ទាំងប្រាំការមកអនុវត្តលើការទំនាក់ទំនងគ្នាឲ្យបានជាប្រចាំ កុំដូចពាក្យចាស់ពោលថា ឃ្លាតឆ្ងាយណាយចិត្ត តែយើងចង់ប្តូរន័យមកវិញថា គូស្នេហ៍កាន់តែនៅឆ្ងាយ​ប៉ុនណា វាហាក់ដូចជានៅជិតគ្នា ព្រោះយើងបានដាក់កាយដាក់ចិត្តឲ្យនៅជិតគ្នា ជាពិសេសយើងបានប្រើគោលការណ៍ទាំងប្រាំខាងលើនេះ ។ សូមជូនពរដល់កម្លោះក្រមុំ ដែលកំពុងស្រឡាញ់គ្នានៅស្រុកឆ្ងាយ កុំឲ្យអន្តរាយដោយសារតែផ្លូវឆ្ងាយនេះឡើយ ៕

រឿង : saipiroon_goodlifeupdate

ប្រែ.ចាន់/គោលគំនិតល្អដើម្បីជីវិត