៧វិធីសាងសំណាងឱ្យជារបស់ខ្លួនឯង

៧វិធីសាងសំណាងឱ្យជារបស់ខ្លួនឯង

តើអ្នកធ្លាប់ជួបប្រសព្វដែរទេថា អ្នកខ្លះគិតឆោងចាប់ធ្វើអ្វីក៏បានសម្រេច បានជោគជ័យ ជីវិតសមប្រកបទៅដោយសុភមង្គល សមក្ដីប្រាថ្នា ថែមទាំងមើលទៅមានសេចក្ដីសុខបំផុតតែម្ដង ហើយអ្នកដឹងដែរទេថា ជីវិតដែលមើលទៅសំណាងបែបនេះ ពុំមែនព្រោះតែជោគជតាពីកំណើតត្រឹមតែម្យ៉ាងប៉ុណ្ណោះទេ តែកើតមានព្រោះតែពួកគេប្រឹងប្រែងអភិវឌ្ឍខ្លួនឯងបានច្រើនជាង? បើសិនអ្នកមានបំណងប្រាថ្នាចង់មានជីវិតបែបនេះ មិនចាំបាច់ទៅបន់ស្រន់អ្នកតា ទេវតាឯណាទេ គ្រាន់តែធ្វើតាមវិធីទាំង៧នេះ ធានាថា ខ្លួនអ្នកផ្ទាល់សាងលាភសំណាង ហេងៗ ឱ្យធ្វើជារបស់ខ្លួនបានមិនមែនជារឿងអីត្រូវពិបាកឡើយ ។

១. ឈប់ដ្រាម៉ាជាមួយជីវិត តើអ្នកដឹងដែរទេថា រឿងទាំងឡាយនានា ដែលបានកើតឡើងចំពោះជីវិតមនុស្សយើង សុទ្ធតែជាផលមកពីការគិតរបស់យើងខ្លួនឯងទាំងអស់ ដូចជា អ្នកប្រាប់ខ្លួនឯងជារឿយៗថា អ្នកជាមនុស្សកំសាកញី នឹងធ្វើអ្វីមិនល្អលើសអ្នកដទៃ មិនពូកែជាងអ្នកដទៃ មិនថាមានរឿងអ្វីឡើយចាំមើលចុះ បើមិនយូរក៏ឆាប់ អ្នកនឹងក្លាយទៅជាមនុស្សកំសាកបំផុត តាមបែបដែលអ្នកមានចំណុចខ្សោយរបស់ខ្លួនឯងពិតមែននៅថ្ងៃណាមួយ ។ ដូចនោះ ឈប់ដ្រាម៉ាជាមួយជីវិតខ្លួនឯងបានហើយ សាកល្បងប្ដូរផ្លាស់សាជាថ្មី ចូរប្រាប់ខ្លួនឯងជារៀងរាល់ថ្ងៃថា អ្នកមានសក្ដានុពលអាចធ្វើសុបិនរបស់អ្នកក្លាយជាការពិតក្នុងថ្ងៃអនាគតបាន។ ចូរបណ្ដុះកម្លាំងវិជ្ជមានដែលមាននៅក្នុងខ្លួនរបស់អ្នកឱ្យវាកើតមានឡើង ។

២. មានស្មារតីជានិច្ច កុំធ្វើខ្លួនជាមនុស្សសញ្ជក់សញ្ជឹង ត្រមង់ត្រមោចខ្លោចផ្សា ឯកា ឬជាមនុស្សស្ពឹកស្រពន់ខ្ជិលច្រអូស ព្រោះនោះ មិនបានធ្វើអ្វីឱ្យប្រសើរឡើងសោះ ចូរសាកល្បងប្ដូរផ្លាស់ខ្លួនឯងឱ្យប្រែក្លាយជាមនុស្សរហ័សរហួនរវាសរវៃ ស្រស់បស់រីករាយសប្បាយ ជាមនុស្សចង់ដឹងចង់ឃើញ ពូកែសង្ស័យងើយឆ្ងល់ និងព្រមទាំងបើកទទួលយកចំណេះដឹងថ្មីៗជានិច្ច ។ ក្នុងពេលទន្ទឹមគ្នានេះដែរ ចាំធ្វើតេស្ដពិសោធខ្លួនឯងឱ្យបានរឿយៗថា ខ្លួនឯងត្រូវការកែលំអត្រង់ចំណុច ឬអភិវឌ្ឍស្ថាបនាត្រង់ចំណុចណា ដែលមើលទៅខ្លួនឃើញថា មានចំណុចខ្សោយ ។ ចូររៀនដឹង និងដុសខាត់គំនិតទស្សនវិស័យនោះឱ្យបានស្ទាត់ជំនាញខ្លាំងឡើង ហ៊ានធានាថា អ្នកប្រើពេលមិនយូរទេ អ្នកនឹងបានឃើញរឿងល្អៗ កើតឡើងមានចំពោះជីវិតរបស់អ្នកជាក់ជាមិនខានឡើយ ។

៣. នឹកឃើញធ្វើភ្លាម ប្រសិនបើអ្នកកើតមានគំនិតអ្វីមួយឡើង មានគំរោងផែនការថ្មីកើតឡើងក្នុងខួរក្បាល កុំបង្អែរបង្អង់រង់ចាំឱ្យខាត់ពេល កុំចូលចិត្តនិយាយថា “ចាំមើលសិន” ។ ពេលគិតនឹងធ្វើអ្វីមួយហើយ ត្រូវហ៊ានពុះពារធ្វើឱ្យបាន បើសិនអ្នកមិនបានចាប់ផ្ដើមធ្វើអ្វីមូយសោះ យូរៗទៅនឹងមានលក្ខខណ្ឌនេះលក្ខខណ្ឌនោះមានជាហូរហែកើតឡើងជាបន្តបន្ទាប់ រហូតដល់អ្នកមានអារម្មណ៍ធុញទ្រាន់នឿយណាយ លែងចង់គិតលែងចង់ធ្វើតទៅទៀត ហើយក៏លើកគំរោងការនេះទុកមួយអន្លើសិន។ នៅជាទីបញ្ចប់ទៅ អ្នកគ្មានបានចាប់ផ្ដើមធ្វើអ្វីមួយសោះ។ អ្នកត្រូវទន្ទេញឱ្យជាប់ទុកក្នុងខួរក្បាលថា មនុស្សដែលមានទម្លាប់ជោគជ័យ មិនព្រមលែងឱកាសឱ្យរបូតចេញពីកណ្ដាប់ដៃខ្លួនឡើយ ដោយមិនធ្វើអ្វីក្រៅពីនេះទៀតឡើយ ។

៤. បញ្ឈប់ទម្លាប់ចូលចិត្ត “រកលេសអាង” មនុស្សជាច្រើនជាប់ទម្លាប់ចូលចិត្តរកលេសអាងនេះអាងនោះដោយមិនដឹងខ្លួន ជាពិសេសមនុស្សដែលមានប្រាក់ខែ ចូលចិត្តរកលេសអាងថា គ្មានពេល និងរកលេសថា ការងារដែលខ្លួនធ្វើមមាញឹកណាស់ (សឹងតែរកដង្ហើមដកមិនចង់រួច) ដើម្បីជាសំអាងឱ្យមនុស្សដែលនៅជិតខាងយល់ឃើញថា ខ្លួនឯងធ្វើអ្វីផ្សេងទៀតមិនបាន ។ តើមនុស្សទាំងអស់នេះអាចជួបភាពជោគជ័យបានដែរឬទេ? យើងមិនបានប្រាប់ថា មនុស្សជោគជ័យគឺជាមនុស្សមានសេចក្ដីព្យាយាមធ្វើការងារមិនព្រមឈប់នោះទេ ប៉ុន្តែយើងកំពុងតែចង់ប្រាប់ថា មនុស្សជោគជ័យ គឺជាមនុស្សដែលចេះគ្រប់គ្រងចាត់ចែងការងារគ្រប់យ៉ាងក្នុង២៤ម៉ោងបានទៅវិញទេ ហើយនិងចង់ប្រាប់ថា មានពេលកាន់តែតិច កាន់តែល្អ ព្រោះថ្ងៃមួយអ្នកនឹងបានរៀនដឹងអំពីវិធីធ្វើការងារក្នុងលក្ខណៈយ៉រៗ ហើយនឹងងាយស្រួលឡើង ព្រមទាំងមានប្រសិទ្ធភាពខ្លាំងឡើងជាងមុន ។

៥. បើកចិត្តទទួលយកពាក្យរិះគន់ មនុស្សដែលមានចិត្តប្រកាន់តួអត្តាខ្លាំង ធ្វើខ្លួនដូចជាទឹកពេញកែវ មិនព្រមទទួលស្តាប់មតិយោបល់ ពាក្យរិះគន់ និងពាក្យណែនាំទូន្មានអប់រំរបស់អ្នកដទៃ រមែងមិនអាចរៀនយល់ដឹងបាន និងមិនអាចអភិវឌ្ឍអ្វីបានឡើយ ។ អ្នកអាចសាកដាក់បន្ទាបខ្លួនរបស់អ្នកចុះ ហើយបើកចិត្តទទួលស្ដាប់ពាក្យរិះគន់ពីមនុស្សដទៃនោះបាន។ ពេលណាដែលអាចធ្វើបាន អ្នកនឹងបានយល់ថា ពាក្យរិះគន់ហ្នឹងឯងហើយ គឺជាកាដូរដ៏មានតម្លៃសម្រាប់ខ្លួនអ្នក និងបានជាឱកាសសំខាន់បំផុត ដែលអាចធ្វើឱ្យអ្នកបានអភិវឌ្ឍខ្លួនឱ្យកាន់តែប្រសើរទៅទៀត ។

៦. ជួបការបរាជ័យខ្លះក៏ល្អម្យ៉ាងដែរ មិនចាំបាច់ធ្វើខ្លួនឯងឱ្យល្អឥតខ្ចោះពេកនោះទេ ជីវិតមនុស្សគ្រប់រូបសុទ្ធតែធ្លាប់ជួបនូវភាពបរាជ័យ និងការខកបំណងខូចចិត្តនេះទាំងអស់ កុំទៅខ្មាសដែលមានភ្នែកសម្លឹងមើលអ្នកក្នុងន័យចំអក ចូរហាត់រៀនទទួលស្គាល់ពីភាពបរាជ័យ ឬការខកចិត្តនោះវិញទើបជាការល្អ ដើម្បីមិនឱ្យហេតុការណ៍ដ៏អាក្រក់នេះកើតមានឡើងម្ដងទៀត ហើយរឿងដែលសំខាន់ អ្នកមិនត្រូវកាត់ស្មានថា “ដឹងយ៉ាងនេះធ្វើបែបនេះល្អជាង”ទេ ចូររៀនហាត់ឱ្យអភ័យខ្លួនឯងឱ្យបាន ផ្ដល់ឱកាសឱ្យខ្លួនឯងសោកសៅ ខូចចិត្ត តូចចិត្តបានត្រឹម១០នាទីប៉ុណ្ណោះ បន្ទាប់ពីនោះ ចេះរៀនដាក់ចុះនូវសេចក្ដីទុក្ខសោក បែរមុខសម្លឹងទៅខាងមុខ រួចហើយចាប់ផ្ដើមសាជាថ្មីឱ្យល្អជាង ប្រសើរជាងមុនឱ្យបាន ។

៧. ញញឹមទទួលយកការផ្លាស់ប្ដូរ គ្មានអ្វីអាចជាប់គង់បានយូររហូតនោះទេ បើវាមានឡើង វាក៏មានចុះដែរ បើមានថ្ងៃសប្បាយរីករាយ វាក៏មានថ្ងៃកើតទុក្ខសោកដែរ បើមានការចាប់ផ្ដើម វាក៏មានការបញ្ចប់ទៅដែរ។ រឿងសំខាន់គឺមិនត្រូវមានចិត្តភិតភ័យជាមួយការប្រែប្រួលផ្លាស់ប្ដូរនៃវត្ថុទាំងអស់នោះទេ។ ចូរញញឹមទទួលយកអ្វីគ្រប់យ៉ាងដែលវាកំពុងប្ដូរផ្លាស់ ដែលកំពុងកើតមានឡើងចំពោះជីវិត និងចូរសម្លឹងមើលថា ការផ្លាស់ប្ដូរអ្វីផ្សេងៗនេះ វាធ្វើឱ្យខ្លួនយើងបានជួបគប់ប្រសព្វនូវបទពិសោធថ្មីៗ  និងធ្វើឱ្យខ្លួនយើងរីកធំធាត់ឡើង ។ នៅពេលណាមួយ អ្នកនឹងបានយល់ពីសច្ចភាពនៃជីវិតនេះ អ្នកមិនចាំបាច់ភ័យខ្លាចថា ជីវិតនឹងមានរឿងអាក្រក់ៗកើតឡើងឡើយ ។   សំណាងល្អសាងខ្លួនឯងបាន មិនចាំបាច់ពឹងផ្អែកលើជោគជតារាសីឡើយ ៕