គិតអ្វីៗឲ្យប្រាកដប្រជា

គិតអ្វីៗឲ្យប្រាកដប្រជា

ភាពប្រាកដប្រជា

គឺជាអង្គប្រកបដ៏សំខាន់ចំពោះភាពជោគជ័យនៅក្នុងឆាកជីវិត

ការគិតខុសពីអ្នកដទៃ គិតមិនដូចអ្នកដទៃគិត

គឺជាផ្នែកមួយទៀត ដែលធ្វើឲ្យយើងមើលឃើញពីឱកាស

ក៏ខុសពីអ្នកដទៃគេមានដែរ ។

ចុះហេតុអ្វីបានជាមនុស្សភាគច្រើនគេគិត

និងមានជំនឿដូចៗគ្នាអ៊ីចឹង?

ក៏ព្រោះថា មនុស្សយើងមើលទូរទស្សន៍ដូចៗគ្នា

អានសៀវភៅស្រដៀងគ្នា និងដូចៗគ្នា

មើលរឿងកុនដែលខ្លួនចូលចិត្តដូចៗគ្នាទៀត ។

ប៉ុណ្ណឹងហើយ នៅមិនទាន់គ្រប់គ្រាន់

យើងថែមទាំងទទួលទានអាហារអ្វីៗក៏ដូចៗគ្នា

ស្លៀកពាក់ តុបតែងខ្លួនក៏ប្រហែលគ្នា

មានវិថីជីវិតក៏ប្រហែលគ្នាទៀត ។

ដោយម្នាក់ៗមិនដឹងខ្លួនថា

ការធ្វើអ្វីដូចគ្នា ជាមួយមនុស្សភាគច្រើនធ្វើនោះ

ស្មើនឹងរារាំទប់ស្កាត់ខ្លួនឯង ឲ្យបាត់បង់ឱកាស

ផ្សេងៗយ៉ាងច្រើនទៀត ។

ការគិតផ្ទុយគ្នា

បើសិនយើងសម្លឹងមើលជីវិតពីជ្រុងខុសៗគ្នា

ក៏នឹងមើលឃើញឱកាស និងសមត្ថភាពខុសៗគ្នាផងដែរ ។

ព្រោះក្នុងតថភាពនៃជីវិត

យើងអាចនឹងត្រូវជួបជាមួយខ្យល់ព្យុះ

ជួបជាមួយចំណោទបញ្ហាយ៉ាងច្រើនលើសលុប

ហួសពីការនឹកស្មានដល់របស់ខ្លួន ។

ចង់លើកឧទាហរណ៍ជាក់ស្តែង ដូចជាអ្នកប្រដាល់

ពេលឡើងរិញប្រដាល់ បើមិនចេះក្បាច់គេច

មិនចេះឆកយកឱកាស ដើម្បីខ្ចីកម្លាំងគូប្រកួតមកប្រើទេ ។

ទុកណាជាមានកម្លាំងខ្លាំងប៉ុនណាក៏ដោយ

ប្រឹងយកមុខរងកណ្ដាប់ដៃគេដាល់ពេញរឿយៗ

ខ្សែជីវិតយើងក៏មិនខុសពីរឿងនេះប៉ុន្មានដែរ……

ប្តូរផ្លាស់មកមើលជីវិត ដូចជាមិត្តជិតស្និត មិនមែនជាសត្រូវ

មើលជីវិតដូចជាមើលឱកាសក្នុងភាពភ័យអាសន្ន ។

មើលជីវិតដូចជាការធ្វើដំណើរ

ត្រង់មានភ័យអាសន្នម្ដងៗ រមែងមានឱកាសបានរៀនដឹង

បានសប្បាយ បានបទពិសោធថ្មីៗ ។

បើមើលឃើញបែបនេះបន្តិច ពិភពលោកនេះ

នឹងមានការប្រែប្រួលទៅមួយរំពេច ។

ជាការជាក់ស្ដែង រឿងដែលខ្លួនមិនប្រាកដប្រជា

មិនព្រមកែលំអខ្លួននោះ មិនត្រឹមតែជីវិតមនុស្សប៉ុណ្ណោះទេ

អង្គភាពធំ ក៏មិនអាចទៅរួចដែរ ។

ដូចជា Kodak ជាម្ចាស់ភាគហ៊ុនទីផ្សារ

មានលេខតែមួយខ្ទង់ ស្ទើរតែចងរបូត ក្នុងសម័យប្រើហ្វិលថតរូប

នៅមិនទាន់សប្បូរបែប ។

ពេលមិនចាប់អារម្មណ៍លើការមកដល់បច្ចេកវិជ្ជាឌិជីថលជាឱកាស

ភ្លេចខ្លួនតែមួយប៉ប្រិចភ្នែក ក៏ក្លាយជាអស់អនាគតភ្លាម

រលាយបាត់ពីទីផ្សារឈឹង ។

បញ្ហានេះក៏មិនខុសពី Nokia ក្រុមហ៊ុនទូរសព្ទចល័ត

ដែលមិនព្រមកែលំអ​ តាមសម័យនិយមនៃអេក្រង់ថាច់គ្រីន

មិនចាប់អារម្មណ៍ពីការកើតឡើងនៃប្រព័ន្ធប្រតិបត្តិការ Android

ថែមទាំងចេញមកមើលងាយមើលថោកដៃគូប្រកួតមកពីកូរ៉េ

ដូចជា Samsung ជាដើម ។

កាលបើមានសេចក្ដីប្រមាទតែបន្តិច

រលាយរលត់បាត់ ក៏ក្លាយជារឿងអតីតកាលទៅហើយ ។

រឿងរ៉ាវបែបនេះ

ស្តែងឲ្យឃើញគ្រប់ពេលវេលា

និងកើតឡើងគ្រប់សម័យកាល ។

ជោគជ័យថ្ងៃនេះ

មិនមែនមានន័យថា យើងនឹងនាំ

ឬជោគជ័យទៅគ្រប់ពេលទេ ។

បើមិនចេះសម្របសម្រួលខ្លួន

និងមិនប្រាកដប្រជាឲ្យបានសមស្របទេ

ហើយការផ្លាស់ប្ដូរ និងប្រែប្រួលក្នុងពេលដែលគួរធ្វើ

ប្រមាទតែបន្តិច អាចក្លាយទៅជាអតីតកាលបានយ៉ាងងាយ ។

ពេលណាក៏ដោយ ដែលយើងមិនប្រាកដប្រជាជាមួយនឹងការគិត ជាមួយវិធីគិត

ឬវិធីប្រតិបត្តិដែលមានការពិបាកនឹងសម្របសម្រួលខ្លួនបាន

នោះជាសញ្ញាដែលខ្លួនយើងត្រួវមានការប្រុងប្រយ័ត្ន

ព្រោះថាយើងអាចក្លាយទៅជាអតីតកាលបាន ។

“ហ៊ានគិត ហ៊ានសុបិន  និងហ៊ានធ្វើ

គឺជាមាគាដែលយើងមានសេចក្ដីសុខ

ព្រមទាំងមានភាពជោគជ័យផងដែរ” ។

“ចង់ធ្វើកិច្ចការងារធំ

ត្រូវចេះប្រគល់ការងារឲ្យ

ត្រូវបង្កើតជាក្រុម ដែលមានបេះដូងឆន្ទៈដូចគ្នា” ។

“ភាពជោគជ័យក្នុងអតីតកាល

មិនមែនជាគ្រឿងទទួលធានាថា

យើងនឹងជោគជ័យនៅថ្ងៃអនាគតបានដែរ” ៕

គោលគំនិតល្អដើម្បីជីវិត