បើចង់ជោគជ័យ កុំរកលេសថាគ្មានពេល

បើចង់ជោគជ័យ កុំរកលេសថាគ្មានពេល

មនុស្សដែលចូលចិត្តរកលេសថា មិនមានពេលគ្រប់គ្រាន់

មិនមែនជាមនុស្សដែលជួបប្រសព្វជាមួយនឹងភាពជោគជ័យក្នុងជីវិតនោះទេ។

កុំភ្លេចថា ក្នុងមួយថ្ងៃៗ

មនុស្សយើងគ្រប់គ្នា សុទ្ធតែមានពេលវេលាស្មើគ្នាទាំងអស់គឺ ២៤ម៉ោង

តែចំណុចដែលធ្វើឲ្យមានការខុសប្លែកពីគ្នានោះគឺ

ក្នុងការចេះរៀបចំតារាងពេលវេលាក្នុងមួយថ្ងៃៗឲ្យមានតម្លៃ

មានន័យសម្រាប់ជីវិតបានតិចឬច្រើនទៅវិញទេ ។

មនុស្សធម្មតាទូទៅ ចូលចិត្តប្រើប្រាស់ពេលដោយឥតប្រយោជន៍ទទេៗ

ប្រើប្រាស់ពេលវេលាតាមបែបសម្លាប់ចោល ដុតចោល

ព្រោះថាខ្លួនមិនធ្លាប់បានមើលឃើញពីគុណតម្លៃនៃពេលវេលាក្នុងឆាកជីវិតនេះឡើយ ។

ខណៈដែលមានមនុស្សខ្លះ ប្រើប្រាស់ពេលវេលាយ៉ាងច្រើន ដើម្បីប្រែត្រឡប់ជីវិតឲ្យបានជោគជ័យ។

មនុស្សយើងគ្រប់គ្នា មានពេល ២៤ម៉ោង ក្នុងមួយថ្ងៃៗ មាន១៤៤០ នាទី

ជាគោលការណ៍ មនុស្សយើងត្រូវចេះបែងចែងតារាងពេលវេលាក្នុងជីវិតឲ្យបាន

៨ ម៉ោង ប្រើប្រាស់សម្រាប់បំពេញការងារ ការសិក្សារៀនសូត្រ

៨ ម៉ោង ប្រើប្រាស់សម្រាប់សម្រាក ដេកពួន

៨ ម៉ោង ដែលនៅសល់ ប្រើប្រាស់សម្រាប់នៅជាមួយអ្នកដទៃ

មិនថា ចេញចូលបន្ទប់ទឹក ងូតទឹកលាងជម្រះកាយទេ ។

មនុស្សយើងម្នាក់ៗចូលចិត្តងូតទឹកជាធម្មតា ពីរដងក្នុងមួយថ្ងៃ ចូលបន្ទប់ទឹកយ៉ាងតិចណាស់ក៏បីបួនប្រាំដង

ការទទួលទានបាយមួយពេលៗ ប្រើប្រាស់ពេលកន្លះម៉ោង ទៅមួយម៉ោង ក្នុងមួយថ្ងៃៗយ៉ាងហោចណាស់ក៏បីពេល

ពេលដែលនៅសល់ពីនោះ ទុកសម្រាប់ចំណាយលើបណ្ដាញសង្គម ដូចជា ហ្វេសប៊ូក ឆាត អន់ឡាញ ថែងហ្គោ ។ល។

មើលទូរទស្សន៍ តាមដានរឿងភាគ ជាដើម

បើមានពេលសល់ ទុកធ្វើដំណើរ ។

ការដែលនឹងរកឃើញពីគោលការណ៍ទាំង ៣ ចំណែកនេះ

បើយើងអាចរៀបចំតារាងនេះសាជាថ្មី ឲ្យមានភាពល្អប្រសើរឡើងបាន

យើងអាចនឹងសល់ពេល ដើម្បីសាងអនាគត រត់ទៅដល់គោលដៅកាន់តែមានពេលច្រើនឡើង ។

បើសិនយើងចូលដេកទៀងពេល ហើយរៀងឆាប់ក្រោកឡើងបន្តិច ឲ្យបានមុនកន្លះម៉ោង ដូចដែលខ្លួនដេកសព្វមួយដង

ការញ៉ាំបាយ ចូលបន្ទប់ទឹក ងូតទឹក រៀងឆាប់ជាងមុនបន្តិច

រូតរះចេញដំណើរពីព្រឹកព្រលឹមបន្តិច រត់យន្ដក៏មិនស្ទះ

យើងអាចចំណេញពេលពីសកម្មភាពទាំងនេះបានច្រើនឡើង ។

មើលទូរទស្សន៍មើលតែព័ត៌មានដែលមានប្រយោជន៍

លេងបណ្ដាញសង្គម ដូចជា ហ្វេសប៊ូក ឆាត អនឡាញ វេបផ្សាយ ឲ្យកាន់តែតិចចុះ

យើងនឹងរកឃើញថា ខ្លួនមានពេលវេលាកាន់តែច្រើនឡើងបន្ថែមទៀត

សម្រាប់យកទៅកសាងជីវិតក្នុងពេលអនាគត ។

ពិតមែនហើយ មនុស្សយើងញៀនញ៉ាមទៅជាមួយនឹងការប្រើប្រាស់ពេលវេលាច្រើនពេក ជាមួយនឹងបណ្ដាញសង្គមទាំងនេះ សឹងតែមួយថ្ងៃៗរាប់ម៉ោង

បើលេងៗទៅចុះ មួយថ្ងៃឲ្យលេងមិនលើសពីមួយម៉ោង ឬបើអាច លេងកន្លះម៉ោងបានហើយ

មិនឲ្យចំណាយលើសពីនេះឡើយ ហើយស្មោះត្រង់ជាមួយនឹងខ្លួនឯង ។

ពេលយើងមានវិន័យ និងបានចំណេញពេលវេលាបន្ថែមទៀត

ជំនួសឲ្យការចំណាយពេលវេលាទៅគិតរឿងដែលឥតប្រយោជន៍

រួចហើយយកពេលវេលាទាំងនេះមកអភិវឌ្ឍខ្លួន

យកពេលវេលាទាំងនេះមកសិក្សា ដូចជាការសរសេរនិពន្ធ និងអានសៀវភៅជំនួសវិញ

យកពេលវេលាទាំងនេះមកហាត់ប្រាណ និងយកពេលវេលាទាំងនេះមកធ្វើ

អ្វីដែលមានប្រយោជន៍ផ្សេងៗ​បានច្រើនយ៉ាង

សម្រាប់សង្គមជាតិ សង្គមគ្រួសារ និងខ្លួន ។

តើមួយថ្ងៃៗមានពេលប៉ុន្មានម៉ោង ដែលយើងអាចទាមទារយកមកឲ្យខ្លួនឯងវិញបាន?

សរុបជាម៉ោង សរុបជាថ្ងៃ សរុបជាខែ និងសរុបជាឆ្នាំ

យើងអាចនឹងរកឃើញថា យើងនឹងមានពេលវេលាច្រើនឡើងបន្ថែមទៀត មិនគួរឲ្យជឿ។

កុំនិយាយថា មិនមានពេលទៀតអី

បើយើងនិយាយដូច្នោះ វាជាការឆ្លុះបញ្ចាំងឲ្យឃើញថា

ខ្លួនយើងហ្នឹងឯង ដែលមិនអាចគ្រប់គ្រងពេលវេលាបានទៅវិញទេ ហើយចុះខ្លួន

នឹងទៅទាមទារអ្វីបាន សម្រាប់ជីវិតក្នុងថ្ងៃអនាគត?

“បើចង់ផ្លាស់ប្តូរជីវិតរបស់ខ្លួន

ឲ្យប្រឡប់បានជាជោគជ័យវិញ

ត្រូវឲ្យមានបេះដូងជាអ្នកតស៊ូ

បើមិនចេះតស៊ូ តើភាពជោគជ័យនឹងកើតមានដូចម្ដេចបាន?”

“ទីផ្ដាច់ព្រាត់ខ្លះ អាចប្រព្រឹត្តទៅរួចក្នុងជីវិត

វាស្ថិតនៅលើការសម្រេចចិត្តរបស់ខ្លួនយើងផ្ទាល់” ។

“រឿងដែលខ្លួនយើងត្រូវចងចាំទុកនោះគឺ

ក្នុងលោកនេះសាងមនុស្សឲ្យកើតមក

មិនមែនសុទ្ធតែជួបភាពបរាជ័យអស់មួយជីវិតនោះទេ” ៕

គោលគំនិតល្អដើម្បីជីវិត