កាន់តែឲ្យ កាន់តែបាន

កាន់តែឲ្យ កាន់តែបាន

ក្នុងជីវិតបំពេញការងារ

បើសិនចង់ធ្វើអ្វីឲ្យសម្រេចបែបមហាសាល

យើងមិនអាចធ្វើអ្វីបានដោយខ្លួនតែម្នាក់ឯងបានទេ ។

យើងត្រូវរៀនដឹងអំពីការបង្កើតក្រុមដែលមានភាពរឹងមាំ

ទាំងផ្នែកចំណេះដឹង សមត្ថភាព និងទស្សនវិស័យ

ព្រមទាំងការចូលរួមចិត្តថ្លើមមានធ្លុងតែមួយ ។

មេក្រុមដែលអាចបានទឹកចិត្តកូនចៅ

រមែងជាក្រុមដ៏រឹងមាំមួយ

ច្បាស់ណាស់ថា ក្រុមធ្វើការ ការងារនឹងដើរ ។

មេដឹកនាំត្រូវចេះដាក់ខ្លួនដើម្បីឲ្យបានចិត្តកូនចៅ

ផ្ដល់ប្រឹក្សាយោបល់ មើលថែ និងផ្ដល់ពាក្យទូន្មាន

ហើយត្រូវហ៊ានបំផុសគំនិតឲ្យកូនចៅហ៊ានគិត និងហ៊ានសម្រេចចិត្ត ។

ដាក់មុខងារឲ្យម្នាក់ៗបានគិត បានសម្រេចចិត្ត

បានស្នើមតិយោបល់របស់ខ្លួនខ្លះ តាមសមគួរ ។

មិនមែនចេះតែឡូឡា ចេះតែមកបញ្ជា

រួចហើយឲ្យកូនចៅធ្វើតាមតែម្យ៉ាង ។

ពេលជំនួបក្រុម ប្រធានក្រុមជាអ្នកនិយាយនាំមុខ

ដោយមិនបើកឱកាសឲ្យកូនចៅបានបញ្ចេញគំនិតទស្សនៈខ្លះ

ការមិនចេះទទួលស្ដាប់មតិយោបល់របស់មនុស្សនៅក្នុងក្រុម

វាពិបាកក្នុងការធ្វើការឲ្យចូលជាធ្លុងតែមួយបានណាស់ ។

ក្រុមហ៊ុនខ្លះ ស្ថាប័នខ្លះ និងអង្គភាពខ្លះ

មិនបានបើកឱកាសឲ្យសមាជិកហ៊ានគិត ហ៊ានសម្រេចចិត្ត និងហ៊ានធ្វើទេ ។

ពេលមានអ្នកណាមួយលេចមុខមកធ្វើអ្វីថ្មី ហើយមានកំហុស

ត្រូវបានគេធ្វើទោស ត្រូវបានគេជេរស្តី

សកម្មភាពបែបនេះកើតមានយូរៗទៅ

ប្រហែលជាលែងមានអ្នកណាហ៊ានផ្ដល់មតិគំនិតយោបល់អស់ ។

ពេលយូរៗទៅ ក្រុមហ៊ុន ស្ថាប័ន អង្គភាព

ក្លាយទៅជាក្រុមហ៊ុន ស្ថាប័ន អង្គភាពមានតែឈ្មោះ

លែងមានសកម្មភាព រង់ចាំតែថ្ងៃរំសាយចោល ។

ផ្ទុយមកវិញ បើសិនយើងស្ថាបនាឲ្យមនុស្ស

ដែលនៅក្នុងក្រុមហ៊ុន អង្គភាព ស្ថាប័ន

ប្រគល់មុខងារឲ្យទទួលខុសត្រូវ

មុខងារឲ្យជាអ្នកសម្រេចដោយចិត្តខ្លួនឯង

ខុសភ្លាំងភ្លាត់ខ្លះ ក៏បានរៀនដឹង

មិនមែនខុសក្នុងរឿងដដែលៗ ។

ពេលកើតមានបែបនេះ អ្នកធ្វើការងារសប្បាយចិត្តបំផុត

មេដឹកនាំក៏សប្បាយចិត្ត

កូនចៅក៏មានអារម្មណ៍ល្អជាមួយដែរ ។

ថាមេដឹកនាំដាក់កាយដាក់ចិត្ត ផ្ដល់អំណាច ចាំគាំទ្រ

គេធ្វើការងារបណ្ដើរ មានអារម្មណ៍ថាខ្លួនឯងធំៗឡើង

មិនមែនធ្វើការងាររាប់ឆ្នាំ ឋានៈតួនាទីនៅកន្លែងដើមនោះទេ ។

ធម្មជាតិរបស់មនុស្ស

ត្រូវការធំធាត់រីកចំរើន

ខ្លួនឯងត្រូវមានអារម្មណ៍ថា ខ្លួនមានអនាគត

ហើយយើងក៏ត្រូវយល់ពីអារម្មណ៍របស់លោកផងដែរ ។

ខ្លួនយើងរៀនចប់មកថ្មីៗ ក៏រមែងចង់បានធំ

កូនចៅរៀនចប់មកថ្មីៗ ក៏មានអារម្មណ៍បែបនេះដូចគ្នា

មេដឹកនាំមិនត្រូវមានចិត្តចង្អៀតចង្អល់ទេ

ត្រូវយកចិត្តទុកដាក់ចំពោះកូនចៅតាមសមគួរ ។

មិនមែនមានត្រឹមតែម៉ោងធ្វើការងាររួមគ្នាប៉ុណ្ណោះ

ត្រូវចេះរកមួយម៉ោងសម្រាកសម្រាន្ត

គឺសម្រាករួមសប្បាយជាមួយគ្នា

ត្រូវធ្វើឲ្យដូចជាគ្រួសារតែមួយ ។

មេដឹកនាំ មិនត្រូវមើលលើកូនចៅ

ថាត្រឹមតែស្ពានចម្លងធ្វើឲ្យខ្លួនឈានជើងទៅដល់គោលដៅនោះទេ ។

កុំមើលងាយមើលថោកអ្នកដទៃថាទាបជាងខ្លួន

ប៉ុន្តែត្រូវសម្លឹងមើលថា មនុស្សគ្រប់គ្នាគឺជាក្រុមតែមួយ ។

នៅពេលថ្ងៃមួយ

បើបានក្លាយខ្លួនធ្វើជាចៅហ្វាយគេ កុំបោះបង់កូនចៅ ។

គិតថា ភ្នាក់ងារគឺគ្រួសាររបស់យើង

គេមកជួយធ្វើការងារឲ្យយើង គេមិនហ៊ានថា

យើងធ្វើអ្វីមិនកើតទេ

មិនមានយើង គេលំបាក

ដូចនោះ ត្រូវឈ្នះជាមួយគ្នា

ត្រូវដើរទៅជាមួយគ្នា។

ជឿចុះ មេក្រុមដែលមានទឹកចិត្តទូលាយ

ហើយមនុស្សដែលធ្វើជាប្រធានកាន់តែឲ្យ កាន់តែបាន ។

“កុំក្អេងក្អាងអំនួតពេក កុំអួតអឿថាខ្លួនល្អ

ក្នុងលោកនេះមនុស្សដែលពូកែជាងយើងមានច្រើនណាស់” ។

“គ្រប់ក្ដីសុបិន

វាក្លាយជាការពិតបាន បើយើងហ៊ាន

ចេញដើរតាមរកវា……” ៕

 គោលគំនិតល្អដើម្បីជីវិត