មានតែត្រីងាប់ប៉ុណ្ណោះដែលហូរតាមបណ្ដោយខ្សែទឹក

មានតែត្រីងាប់ប៉ុណ្ណោះដែលហូរតាមបណ្ដោយខ្សែទឹក

ធម្មជាតិ គឺជាគ្រូដែលបង្រៀនយើងល្អបំផុត

ហើយអាចអប់រំយើងបាន ដោយគ្មានការលាក់លៀមអ្វីទាំងអស់ ។

មេឃ ដី ខ្យល់អាកាស

គឺជាវត្ថុដែលនៅជិតខ្លួន

ដែលព្រមបង្រៀនយើងឲ្យឃើញពីសច្ចភាពនៃជីវិត ។

បើសិនយើងចេះសង្កេតមើល បើកចិត្តព្រមទទួល

ដូចជាការហែលទឹករបស់ត្រី វាអាចបង្រៀនយើងអ្វីម្យ៉ាងបាន

ធម្មជាតិរបស់ត្រី ចូលចិត្តហែលបញ្ច្រាសទឹកហូរ

ទោះបីពួកវាត្រូវការបញ្ចេញថាមពលច្រើនក៏ដោយ ត្រីដែលរឹងមាំគឺជា

ត្រីដែលចូលចិត្តហែលបញ្ច្រាសក្រសែទឹកហូរជានិច្ច

ប៉ុន្តែសាច់ដុំត្រីទាំងនោះ ក៏មានសភាពរឹងមាំ ។

តើអ្នកធ្លាប់ស្គាល់ត្រីឈ្មោះ ហ្សែលម៉ុន ដែរទេ?

ត្រីហ្សែលម៉ុន គឺជាត្រីចម្លែកជាងត្រីផ្សេងៗទៀត ។

ព្រោះត្រីហ្សែលម៉ុន រមែងហែលបញ្ច្រាសទឹកហូរ

ឡើងពីមហាសមុទ្រទៅកាន់ទីកំណើតរបស់ពួកវាវិញ

ដើម្បីទៅពង ផ្ដល់កំណើតឲ្យកូនត្រីតូចៗជាបន្តរាប់ពាន់ម៉ឺនក្បាល

នៅតាមផ្លូវដែលវាហែលទៅ ត្រូវពុះពារគ្រប់ឧបសគ្គយ៉ាងច្រើន ។

ឆ្លងកាត់ច្រអូទឹករាក់ ទឹកជ្រៅ ឆ្លងកាត់តាមចំរែះថ្មតូចធំ

ដើម្បីវិលត្រឡប់ទៅពងនៅឯក្បាលទឹក

ដែលពួកវាធ្លាប់បានទទួលកំណើត ។  

ជីវិតមនុស្សយើងក៏ដូចគ្នា

បើសិនជាយើងគិតតែពីចុះចាញ់

មិនធ្លាប់ហ៊ានបែរមុខតស៊ូ

ឬសម្លឹងមើលឧបសគ្គត្រង់ៗ

ចុះឲ្យទៅយកឈ្នះវាបានយ៉ាងម៉េច?

ប្រាប់ដល់ខ្លួនឯង

ឲ្យមើលត្រីហ្សែលម៉ុនជាតួយ៉ាង

ហើយនឹងដឹងថា ត្រូវបែរមុខរកបញ្ហា

តស៊ូប្រយុទ្ធជាមួយវា

ដោយគ្មានគំនិតចុះចាញ់នៅក្នុងខួរក្បាល

ខាំមាត់សង្កត់ចិត្តពុះពារ ដោយមិនរាថយឡើយ ។

ជីវិតរបស់មនុស្សយើង

តែងតែឆ្លងកាត់ពេលវេលានៃជីវិត

ព្រមទាំងត្រូវចំណាយកម្លាំងយ៉ាងច្រើន

មានទាំងជោគជ័យ

មានទាំងបរាជ័យ

ខកចិត្ត ខូចចិត្ត អស់សង្ឃឹម ព្រមទាំងមានការឈឺចាប់។ល។

ទោះបីជួបប្រទះថ្មរដិបរដុប និងទឹកហូរខ្មួលខ្មាញ់ជាឧបសគ្គក៏ដោយ

ត្រីហ្សែលម៉ុនក៏មិនរាថយក្នុងការហែលឆ្លងកាត់

ព្យាយាមផ្ទាត់ខ្លួនឡើងម្ដងហើយម្ដងទៀត

ដើម្បីឲ្យខ្លួនឆ្លងផុតទៅបាន ។

មនុស្សយើងកាលបើជួបឧបសគ្គ កុំអាលដកថយគេចចេញ

កាលបើមិនព្រមចុះចាញ់ចំពោះឧបសគ្គ

ឱកាសក្នុងការយកឈ្នះនៅមានសង្ឃឹម

ការហែលបញ្រ្ចាសទឹកហូររបស់ត្រីហ្សែលម៉ុន

មិនខុសអ្វីពីការចេញដំណើរតាមរកក្ដីសុបិនអ៊ីចឹងដែរ ។

ទាំងនេះ ដូចជាយើងចេញទៅតាមរកវត្ថុដែលយើងមើលមិនឃើញ

ប៉ុន្តែក្នុងចិត្តយើងដឹងថា វាមានពិត

ហើយវាជារឿងដែលធ្វើឲ្យជីវិតរបស់យើងមានន័យ ។

យើងត្រូវហ៊ានប្រើជីវិតបែបមានគោលដៅ

មានក្ដីសុបិនដ៏ខ្ពស់ ដ៏ធំល្មមនឹងធ្វើឲ្យយើងចាក់បំពេញបាន ។

ព្រោះថា ជីវិតដែលគ្មានក្ដីសុបិន និងគ្មានសង្ឃឹម

ប្រហែលមិនមែនជាជីវិតដ៏គួរឲ្យរីករាយសែនមនោរម្យប៉ុនណាទេ ។

សំឡេងដែលយើងនិយាយឮខ្លាំងៗ

ឲ្យអ្នកដទៃបានឮ

អាចមិនមែនជារឿងកំណត់ជីវិតរបស់យើងឡើយ ។

សំឡេងដែលយើងនិយាយទៅខ្សឹបៗចេញពីបេះដូង

ដែលយើងប្រាប់ដល់ខ្លួនឯងទៅវិញទេ

គឺជារឿងដែលមានកម្លាំងច្រើនជាង

ដែលអាចកំណត់ជោគជ័យឲ្យដល់ជីវិតយើងបាន ។

“ជីវិតដែលមានតម្លៃ

គឺជាជីវិតដែលជឿថា ក្ដីសុបិនអាចក្លាយជាការពិត” ។

“មនុស្សដែលមិនហ៊ានប្រថុយធ្វើអ្វី

ខ្លួនមិនដឹងទេថា គេកំពុងប្រើជីវិតបែបប្រថុយប្រថានបំផុត

ព្រោះគេគ្មានឱកាស

ជួបប្រទះជាមួយភាពជោគជ័យនេះបានឡើយ” ៕

គោលគំនិតល្អដើម្បីជីវិត