និទានសាងកម្លាំងចិត្តៈ ទេសភាពដែលនៅក្រៅមាត់បង្អួច

និទានសាងកម្លាំងចិត្តៈ ទេសភាពដែលនៅក្រៅមាត់បង្អួច

ថ្ងៃនេះ គោលគំនិតល្អដើម្បីជីវិត

បានជ្រើសរើសរឿងនិទានមួយមកសរសេរទុកជាការអានកំសាន្តលេង

នៅពេលសម្រាកពីការសិក្សារៀនសូត្រ ធ្វើការរកស៊ី

និងបំពេញកិច្ចការអស់ពេញមួយថ្ងៃមកនោះ ដើម្បីទុកជាកម្លាំងចិត្ត

ប្រឹងប្រែងស៊ូបន្ដដំណើរទៅមុខទៀត ដើម្បីគោលដៅ

សម្រេចក្ដីបំណងបង់ប្រាថ្នា នៅក្នុងសុបិនរបស់ខ្លួន ឲ្យក្លាយជាការពិត ។

រឿងមិត្តភាពរវាងបុរសពីរនាក់នេះ ឬទេសភាពដែលនៅក្រៅមាត់បង្អួច

បើបានអានហើយ អ្នកគួរឲ្យស្ញើចសរសើរបុរសម្នាក់នោះជាក់ជាមិនខានឡើយ ។

តើបុរសនោះមានភាពអស្ចារ្យយ៉ាងណា សម្រាប់ការលើកទឹកចិត្តដល់មិត្តរបស់គេ

ដែលដេកឈឺងើបពីគ្រែមិនរួចផងនោះ?

នៅក្នុងមន្ទីរពេទ្យមួយ មានបុរសឈឺធ្ងន់ពីរនាក់

បានមកសម្រាកព្យាបាលជំងឺខ្លួនក្នុងបន្ទប់តែមួយ

ដោយមានត្រឹមតែស្បៃវាំងននស្តើងៗបាំងបិទ

រវាងគ្រែអ្នកទាំងពីរប៉ុណ្ណោះ ។

ដើម្បីដោះស្រាយភាពតានតឹងអារម្មណ៍

អ្នកទាំងពីរក៏បបួលគ្នានិយាយលេងពីនេះពីនោះសព្វបែបយ៉ាង

ទាំងរឿងគ្រួសារ រឿងផ្ទះសម្បែង រឿងការងារ និងរឿងការធ្វើដំណើរ។ល។

បុរសដែលដេកសម្រាកគ្រែនៅជាប់មាត់បង្អួច

បានទទួលការអនុញាតពីពេទ្យ ឲ្យក្រោកអង្គុយមួយថ្ងៃបានមួយម៉ោងរាល់ថ្ងៃ

ដើម្បីឲ្យសារជាតិពុលហូរចេញពីសួត ។

ចំណែកឯបុរសនាក់ទៀតនោះ ត្រូវដេករាបស្មើនឹងគ្រែប៉ុណ្ណោះ ។

រាល់ៗពេល

ដែលបុរសដេកគ្រែនៅជាប់មាត់បង្អួចក្រោកឡើងអង្គុយ

គេតែងតែពោលបរិយាយរឿងរ៉ាវផ្សេងៗ ដែលគេបានឃើញ

ឲ្យដល់មិត្តរបស់គេរួមបន្ទប់ស្ដាប់ផងដែរ ។

គេនិយាយថា

ផ្នែកខាងក្រៅមានសួនច្បារជាប់ជាមួយនឹងបឹងដ៏ធំមួយ

ដែលមានក្ងានហែលទឹកលែងជាហ្វូងៗ

មានគ្រួសារច្រើនណាស់នាំគ្នាមកជិះទូកលេងកំសាន្ត

គូសេ្នហ៍កម្លោះក្រមុំដើរចាប់ដៃគ្នាយ៉ាងស្អិតរមួត

មានដើមឈើធំៗខ្ពស់ស្កឹមស្កៃមានស្លឹកពណ៌ខៀវស្រងាត់ជាជួរៗ

គយគន់មើលទៅត្រជាក់ភ្នែក និងមានសភាពរស់វើកជានិច្ច ។

កំឡុងពេលបុរសដេកគ្រែជាប់មាត់បង្អួច ពិពណ៌នាអំពីទេសភាពខាងក្រៅ ។

ឯបុរសម្នាក់ទៀត ក៏បិទភ្នែកទាំងគូនឹកស្រមៃ និងបញ្ចេញស្នាមញញឹមទៅជាមួយដែរ ។

ក្នុងពេលរសៀលថ្ងៃមួយ

ពេលដែលមានអាកាសធាតុល្អមេឃស្រឡះ

បុរសដែលដេកគ្រែនៅជាប់មាត់បង្អួច បានបរិយាយពីក្បួនព្យុហយាត្រា

ដែលធ្វើដំណើរឆ្លងកាត់ទីនោះ

ទោះបីថាបុរសម្ខាងទៀតមិនបានឮសូរសំឡេងតន្ត្រី

និងមើលមិនឃើញក្បូនដង្ហែនោះក៏ដោយ

គេក៏នៅតែបិទភ្នែកនឹកសញ្ជឹងគិតដល់ទិដ្ឋភាព

និងបានឮសំឡេងយ៉ាងច្បាស់ក្នុងខួរក្បាលរបស់គេ ។

ជាច្រើនសប្ដាហ៍កន្លងផុតទៅ

នៅថ្ងៃមួយពេលនាងគិលានុបដ្ឋាយិកាដើរចូលមកក្នុងបន្ទប់ស្នាក់

ក៏បានឃើញរាងកាយដែលវិញ្ញាណរបស់បុរស

ដែលដេកសម្រាកព្យាបាលនៅជាប់មាត់បង្អួច

គេបានលាចាកលោកនេះទៅដោយស្ងប់ស្ងៀម ។

នៅសប្ដាហ៍បន្ទាប់មក

បុរសដែលនៅមានជីវិត

ទើបសុំដូរគ្រែទៅដេកឯគ្រែជាប់មាត់បង្អួចវិញម្ដង

នាងគិលានុបដ្ឋាយិកា

ទើបរៀបចំប្តូរគ្រែឲ្យគេដោយត្រេកអរ ។

អាការៈជំងឺរបស់បុរសម្នាក់នោះបានល្អប្រសើរឡើងជាលំដាប់

រហូតដល់ល្មមក្រោកឡើងអង្គុយខ្លួនឯងបាន

គេទើបជ្រោងខ្លួនដោយកែងដៃរបស់ខ្លួនឡើងសន្សឹមៗថ្នមៗ

រួចហើយបោះភ្នែកសំឡឹងមើលទៅខាងក្រៅតាមមាត់បង្អួច

ដើម្បីឲ្យខ្លួនឯងបានមើលឃើញពិភពខាងក្រៅ ដោយផ្ទាល់ភ្នែកជាលើកដំបូង

តែគេត្រឡប់ជាមិនឃើញមានអ្វីសោះ ក្រៅពីកំផែងជញ្ជាំងទទេប៉ុណ្ណោះ ។

គេទើបបែរមកសួរគ្រូពេទ្យថា

 “ក្រៅពីបន្ទប់នេះមិនមានអ្វីទេឬ?

ហេតុអ្វីបានជាបងម្នាក់នោះ អាចនិយាយរឿងរ៉ាវបានប្រទាក់ក្រឡាគ្នា

មានភាពណែងណងស៊ីគ្នាដល់ថ្នាក់នេះ បាទ?”

“គាត់ប្រហែលជាចង់ផ្ដល់កម្លាំងចិត្តឲ្យលោកហ្នឹង ច៎ា 

តាមពិតគាត់មើលអ្វីមិនឃើញទាំងអស់ ព្រោះគាត់ជាមនុស្សពិការភ្នែក

តាំងពីពេលចូលមកសម្រាកព្យាបាលមន្ទីរពេទ្យនេះម្ល៉េះ” ។

—-

ប្រែ.គោលគំនិតល្អដើម្បីជីវិត