និទានធម្មៈសម្រាប់ចិត្តៈ ទូកពីរប៉ះទង្គិចគ្នា

និទានធម្មៈសម្រាប់ចិត្តៈ ទូកពីរប៉ះទង្គិចគ្នា

លោកហ្សេនមួយរូប សម្រេចចិត្តរកកន្លែងស្ងប់ស្ងាត់

ដោយការអុំទូកចេញទៅកណ្ដាលទន្លេសាប

អង្គុយបត់ប្រភ្នែនជើងស្ដាំដាក់លើជើងធ្វេង ដៃស្ដាំដាក់លើដៃធ្វេង

ធ្វើដងខ្លួនឲ្យត្រង់ តម្រង់ខ្យល់ដង្ហើមឲ្យត្រូវ ហើយបិទភ្នែកទាំងទ្វេ

រួចចាប់ផ្ដើមចម្រើសមាធិកម្មដ្ឋាន ។

ក្រោយពីគង់អង្គុយចម្រើនចិត្តយ៉ាងស្ងប់ អស់រយៈពេលពីរម៉ោងទៅ

លោកក៏មានអារម្មណ៍នឹកភ្នក់ថា មានទូកមួយគ្រឿងអុំមកប៉ះទូក

ដែលលោកកំពុងគង់ ។ លោកក៏ចាប់ផ្ដើមមានអាការៈមួម៉ៅបន្តិចបន្ដួច

ប៉ុន្តែនៅតែអង្គុយបិទភ្នែកចម្រើនបន្តទៅទៀត ព្រោះគិតថា

បន្តិចទៀត ទូកមួយនោះនឹងអុំចេញទៅហើយ ។

កន្លងផុតទៅច្រើននាទី ទូកមួយគ្រឿងនោះ

ក៏នៅតែប៉ះទូកលោកកំពុងគង់នៅជារឿយៗ

លោករូបនោះ ក៏អស់ភាពអត់ធ្មត់ក្នុងចិត្ត និងបើកភ្នែកឡើង

ដើម្បីនឹងថាស្ដីឲ្យអ្នកដែលមានចិត្តទំនើង

មករំខានលោកធ្វើសមាធិដល់ថ្នាក់នេះ ។

ប៉ុន្តែពេលលោកបើកភ្នែកឡើងមើល

លោកឃើញមានតែទូកទទេ គ្មានមនុស្សណាជិះក្នុងទូកនោះឡើយ ។

ទូករបស់លោកនិងទូកទទេនោះ ប្រហែលជាត្រូវខ្យល់បក់មកតិចៗ

ធ្វើឲ្យប៉ះទង្គិចគ្នាឯកឯង រួចហើយសេចក្ដីក្រោធរបស់លោក

ក៏រលាយបាត់ទៅមួយប៉ព្រិចភ្នែក ។

បន្ទាប់ពីថ្ងៃនោះមក

បើសិនបានជួបជាមួយអ្នកណា

ដែលធ្វើឲ្យលោកខឹងក្រោធ ឬមានអារម្មណ៍មួមៅ

លោកតែងតែប្រាប់ខ្លួនលោកជានិច្ចថា

“នោះមានត្រឹមតែទូកទទេៗ តែសេចក្ដីខឹងក្រោធ

សុទ្ធតែផុសចេញមកពីចិត្តយើងទាំងអស់” ៕

—–

ប្រភព៖ Quora: Raja Sharma’s answer to What’s the best way to react when someone is shouting at you in anger?

ប្រែ.គោលគំនិតល្អដើម្បីជីវិត