កិត្តិយសនៃជីវិត

កិត្តិយសនៃជីវិត

និទានធម្មៈ កិត្តិយសនៃជីវិត…មានរឿងសេចក្ដីដំណាលថា មេស្វាមួយមានកូនពីរក្បាល កូនមួយជាកូនសំណព្វចិត្ត និងកូនមួយទៀតជាកូនសម្អប់ ។   មេស្វាបានចិញ្ចឹមមើលថែកូនដែលខ្លួនស្រឡាញ់ ទុកឲ្យជិះលើខ្នង ឲ្យអាហារដែលល្អៗដល់កូនសំណព្វចិត្តនេះស៊ីជានិច្ច ។ ចំណែកខាងកូនសម្អប់វិញ ចិញ្ចឹមទុកឲ្យនៅតែក្រោមពោះ ឲ្យអាហារគ្នាស៊ីវិញសុទ្ធតែអាក្រក់ៗ ។ ពេលដើរទៅណាឆ្ងាយៗ កូនដែលនៅលើខ្នងមេរបស់វា តែងតែទទួលបានភាពសុខស្រួល ខណៈដែលកូននៅក្រោមពោះមេរបស់វាវិញ ច្រើនតែត្រូវបោកប៉ះនឹងដី មែកព្រឹក្សាលតាវល្លិ៍ ឈ្លក់ទឹក បានទទួលសេចក្ដីទុក្ខវេទនាឈឺចាប់ គ្រប់ពេលវេលា ។ ពេលក្រោយមកទៀត មិនយូរ មេស្វាក៏ស្លាប់ចោលកូន ខណៈដែលកូនស្វាទាំងពីរនោះនៅតូចៗនៅឡើយ ។ ប្រាកដណាស់ថា កូនស្វាដែលបានទទួលការចិញ្ចឹមមើលថែយ៉ាងល្អនៅលើខ្នងម៉ែរបស់វានោះ មិនអាចរកស៊ីអ្វីដោយខ្លួនឯងបាន មិនយូរប៉ុន្មានក៏ស្លាប់ទៅតាមម៉ែរបស់វា ។ ចំណែកខាងកូនស្វាដែលត្រូវចិញ្ចឹមមើលថែនៅក្រោមពោះម៉ែរបស់វាមករហូត ត្រឡប់ជាអាចរកស៊ីចិញ្ចឹមជីវិតខ្លួនឯងបាន មិនស្លាប់ទៅតាមម៉ែរបស់វាឡើយ ។

កិត្តិយសនៃជីវិតៈ ក្នុងការទ្រទ្រង់ជីវិតឲ្យប្រព្រឹត្តទៅបានដោយស្រួលរហូតដល់ត្រើយនោះ ក្នុងខាងដើមគ្រប់ជីវិតច្រើនតែត្រូវពឹងពររកអ្នកដទៃជួយមុនជានិច្ច ក្រោយពីនោះត្រូវព្យាយាមពឹងពាក់លើខ្លួនឯងឲ្យបាន បើសិនជានៅចាំតែពឹងពាក់អ្នកដទៃ ឬចាំទទួលជំនួយពីអ្នកដទៃតែម្ខាងសុទ្ធនោះ ជីវិតរមែងជួបសេចក្ដីក្ដៅក្រហាយក្នុងពេលចុងក្រោយជាក់ជាមិនខានឡើយ ។ ការមិនពឹងពាក់លើខ្លួនឯង ឬធ្វើខ្លួនឯងឲ្យជាទីពឹងមិនបាននោះ មិនមែនតែចំពោះជីវិតរបស់គេប៉ុណ្ណោះទេ នឹងក្ដៅក្រហាយ ថែមទាំងបង្កភាពកង្វល់លំបាកដល់អ្នកដទៃផងដែរ ព្រោះអ្នកដែលត្រូវទទួលខុសត្រូវមនុស្សប្រភេទនេះ រមែងត្រូវការចំណាយកម្លាំងកាយ កម្លាំងចិត្ត កម្លាំងសតិបញ្ញាស្មារតីបន្ថែមឡើងទៀត តាមដែលអាច ដើម្បីពុនរែកបន្ទុកមនុស្សប្រភេទនេះបន្ត ។

ការទីពឹងខ្លួនឯងបាន អ្នកប្រាជ្ញប្រកាន់ថា ជាកិត្តិយសរបស់ជីវិត ។ កិត្តិយសនឹងត្រូវទាបចុះតម្លៃភ្លាមៗ កាលបើត្រូវសុំជំនួយសង្គ្រោះពីអ្នកផងទាំងឡាយ ឬត្រូវមានជីវិតនៅក្រោមការឧបត្ថម្ភរបស់អ្នកដទៃជារឿយៗ ។ លោកទើបអប់រំដំបូន្មានឲ្យលើកតម្កើងកិត្តិយសរបស់ខ្លួនឯង សូម្បីតែរឿងស្រេកឃ្លាន ដែលជាតម្រូវការចាំបាច់របស់រាងកាយពិតមែនក៏ដោយ ក៏លោកអប់រំឲ្យលើកតម្កើង ដូចពាក្យលោកពោលទុកថា ទោះក្រទ្រាំស៊ូខាំមាត់ ស៊ីអំបិលប្រហុក មិនដើរសំកុកលាដៃសុំគេឯង អត់ទ្រាំលំបាកតួយ៉ាងសត្វខ្លារក្សាស័ក្ដិ ស៊ូស្គមស្គាំងគ្មានអ្វីដាក់ រកចាប់សត្វស៊ីដោយខ្លួនឯង ៕

 ប្រែ.គោលគំនិតល្អដើម្បីជីវិត