ធម្មៈមុនចូលដេកៈ ស្តីពីមនុស្ស ៤ ប្រភេទ

ធម្មៈមុនចូលដេកៈ ស្តីពីមនុស្ស ៤ ប្រភេទ

ក្នុងប្រទេស សង្គម ក្រសួង មន្ទីរ ស្ថាប័ន ក្រុមហ៊ុន អង្គភាព ពួកក្រុម គណៈ  ត្រូវមានមនុស្សច្រើននាក់ច្រើនលក្ខណៈច្រើនឥរិយាបថ និងមានច្រើនទម្លាប់ ។ ប៉ុន្តែចាស់បុរាណលោកបានបែងចែកមនុស្សនេះទុកជា ៤ ប្រភេទគឺ មនុស្សឆ្លាតហើយឧស្សាហ៍ មនុស្សឆ្លាតតែខ្ជិល មនុស្សល្ងង់ហើយខ្ជិល ហើយមនុស្សចុងក្រោយបំផុតគឺជាមនុស្សល្ងង់តែឧស្សាហ៍ ។ តើមនុស្សទាំង ៤ ប្រភេទនេះ លោកពន្យល់បកស្រាយពីភាពខុសប្លែកគ្នាទុកយ៉ាងណាខ្លះ?

មនុស្សប្រភេទទី ១ មនុស្សឆ្លាតហើយឧស្សាហ៍ ៖ បើលើកស្ទួយអបស្ទបឲ្យបានល្អ អំណើសតទៅមុខ នឹងបានធ្វើជាប្រធានក្រុម ប្រធានអង្គភាព ប្រធានស្ថាប័ន ប្រធានក្រុមហ៊ុន ដែលមានប្រសិទ្ធភាព មានឥទ្ធិពលគួរដល់ការចិញ្ចឹមទុក មិនគួរទុកឲ្យនៅឆ្ងាយពីភ្នែកត្រចៀកទេ ហើយក៏កុំឲ្យជិតស្និតហួសពេកដែរ អាចមានអន្តរាយ ។

មនុស្សប្រភេទទី២ មនុស្សឆ្លាតតែខ្ជិលច្រអូស៖ មនុស្សប្រភេទនេះគួរឲ្យធ្វើការក្នុងរឿងដែលមានការពាក់ព័ន្ធជាមួយការប្រើខួរក្បាល ឬដាក់ផែនការ គឺសក្ដិសមបំផុត ព្រោះជាមនុស្សពូកែគិត គិតរហ័ស ប៉ុន្តែក្នុងការអនុវត្តត្រូវរកមនុស្សមកជួយ ទើបបាន ។

មនុស្សប្រភេទទី៣ មនុស្សល្ងង់ ហើយខ្ជិល ៖ មនុស្សប្រភេទនេះសមគួរដល់ការយកទៅប្រើកម្លាំងពលកម្មបាន ប៉ុន្តែត្រូវចាំក្លំមើល ចាំណែនាំឲ្យធ្វើតាម ឬឲ្យមានតួនាទីអនុវត្តតាមពាក្យបង្គាប់បញ្ជាប៉ុណ្ណោះ ទុកបណ្ដោយឲ្យធ្វើតែម្នាក់ឯងមិនបាន ។

មនុស្សប្រភេទទី៤ មនុស្សល្ងង់តែឧស្សាហ៍ ៖ មនុស្សប្រភេទនេះច្រើនតែបង្កភាពខ្វល់ខ្វាយវរវឹកដល់សង្គម មានគ្រោះថ្នាក់ដល់សង្គម និងអង្គភាព ស្ថាប័ន មិនថាខ្លួនស្ថិតនៅក្នុងតំណែងណាទេ មានតែបង្ករការវរវឹក ភាពក្ដៅក្រាយបានដោយងាយៗ ។

ក្នុងសង្គម ឬអង្គភាព ស្ថាប័នណាក៏ដោយ រមែងមានមនុស្ស ៤ ប្រភេទនេះនៅរួមជានិច្ច ។ ការនឹងប្រើការងារមនុស្សក្នុងសង្គម ឬអង្គភាពនោះៗ ឲ្យសមស្របជាមួយចរិតលក្ខណៈនិស្ស័យ ឬគុណភាពរបស់មនុស្ស ទើបជារឿងសំខាន់ ដូចមានពាក្យមួយឃ្លាពោលទុកថា put the right man on the right job ព្រោះការសម្រិតសម្រាំងមនុស្សបានសក្ដិសមជាមួយការងារ គឺមានតែភាពជោគជ័យ ។ ផ្ទុយមកវិញ  ការរើសប្រើមនុស្សមិនត្រូវនឹងការងារ គឺមានតែភាពបរាជ័យ នឹងកើតមានគ្រោះថ្នាក់ដល់សង្គម ដល់អង្គភាពស្ថាប័ន ក្នុងរង្វង់កាន់តែធំដូចគ្នា ។ ចុះប្រិយមិត្តអ្នកអានគិតថា ខ្លួនអ្នកជាមនុស្សនៅក្នុងប្រភេទណាដែរ? 

ស្រ.ធម្មៈមុនចូលដេក

ប្រែ.គោលគំនិតល្អដើម្បីជីវិត