ធម្មៈមុនចូលដេកៈ រឿង ពិភពលោកនាពេលព្រឹក
រឿងពិភពលោកនាពេលព្រឹក… ពិភពលោកក្នុងពេលព្រឹកស្វាងរស្មីនៃព្រះអរុណោទ័យ
មិនថាគយគន់សម្លឹងមើលទៅទិសណា ក៏អាចមើលឃើញអ្វីគ្រប់យ៉ាងបានច្បាស់ៗ
មិនចាំបាច់ទាយស្មានៗព្រាលៗ ឬមើលខុសភ្លាំងភ្លាត់ ដូចជាពេលយប់អាធ្រាត្រ ព្រមទាំងអាកាសធាតុក៏ត្រជាក់ស្រួលសប្បាយ
ធ្វើឲ្យមានសភាពស្រស់បស់ដល់ជីវិតរុក្ខជាតិសត្វមនុស្សផងទាំងឡាយ ។ ពេលល្មមព្រះទិន្នករះឡើងនៅឯជើងមេឃ
សោភ័ណភាពនៅលើផ្ទៃពិភពលោក ដែលយើងមើលឃើញនិងរីករាយក្នុងពេលព្រឹក ក៏ត្រូវបានគ្របដណ្ដប់ដោយភាពងងឹតនៃរាត្រីកាល
ទោះបីជាមានពន្លឺរស្មីនៃព្រះច័ន្ទ ឬផ្កាយជួយបញ្ចេញរស្មីឲ្យភ្លឺស្វាងខ្លះៗក៏ដោយ ក៏ប៉ុន្តែធ្វើឲ្យការមើលឃើញបានស្រពិចស្រពិល
មិនច្បាស់ស្មើនឹងពន្លឺរស្មីព្រះអាទិត្យឡើយ ។
ខាងក្នុងចិត្តរបស់មនុស្សយើងក៏ដូចគ្នា
ពេលណាមានភាពច្បាស់ស្រឡះល្អ គ្មានមន្ទិលសៅហ្មងល្អក់កករ ក៏ដូចជាពិភពលោកក្នុងពេលព្រឹក
ដែលមានរស្មីចែងចាំង មានបរិយាកាសដ៏ស្រស់បស់ មនុស្សដែលមានអារម្មណ៍ ដូចជាពិភពលោកនាពេលព្រឹកដូចនេះ
ទោះបីគេនៅក្នុងផ្ទះខ្ទម ឬនៅក្នុងសភាពដែលស្លៀកពាក់សំលៀកបំពាក់ដាច់ដាចចាស់ៗក៏ដោយ
ក៏មានសេចក្ដីសប្បាយចិត្តរីករាយ ។ ចិត្តដែលសប្បាយរីករាយស្រស់ស្រាយនេះហើយ
មានសភាពជាកុសល ជាផ្លូវនៃបញ្ញា និងចំពោះការចេះទទួលខុសត្រូវ ល្អអាក្រក់
មានការស្អប់ខ្ពើម ខ្មាសបាបខ្លាចបាបចំពោះអំពើអាក្រក់គ្រប់ប្រភេទ ។ បើដរាបណាចិត្តត្រូវបានគ្របដណ្ដប់ដោយភាពងងឹត
ទៅដោយអំណាចរបស់កិលេស មានលោភៈ ជាដើម ក៏ជាចិត្តដែលខ្វះកម្លាំង ធ្វើឲ្យឃើញវត្ថុផ្សេងៗ
បានស្រពិចស្រពិល ឬឃើញខុសឃ្លាតចាកពីសភាវៈពិត ដូចជា ឃើញវត្ថុស្មោគគ្រោកជាស្អាត
ឃើញបាបជាបុណ្យ ឃើញគុណជាទោស ឃើញខុសជាត្រូវបាន ។
ដូចនោះ
ទើបគួរសង្រួមខ្លួនឯងឲ្យបានគ្រប់ខណៈ
ហើយព្យាយាមសម្រួលចិត្តឲ្យដូចជាពិភពលោកនាពេលព្រឹក
ដើម្បីជីវិតនឹងបានជួបប្រទះជាមួយរឿងល្អៗរាល់ថ្ងៃ ៕
No comments:
Post a Comment