អានុភាពវិបស្សនា
វិបស្សនា
គឺជាតួបញ្ញា ។ បញ្ញាជាគុណជាតិមួយដ៏បរិសុទ្ធ ដែលព្រះដ៏មានព្រះភាគទ្រង់សំដែងថា "បញ្ញាយ
បរិសុជ្ឈតិ" ប្រែថា "សត្វបរិសុទ្ធដោយប្រាជ្ញា" ។
សត្វទាំងឡាយដែលមានប្រាជ្ញាកើតឡើងក្នុងខ្លួន
តែងស្គាល់នូវហេតុល្អ និងអាក្រក់ ហើយតែងលះបង់នូវអំពើអាក្រក់ សាងអំពើល្អ ។
តួយ៉ាងដូចជា សត្វណាដែលយល់ឃើញតាមហេតុពិតថា
"អំពើកាប់សម្លាប់នាំឲ្យដល់នូវសេចក្ដីវិនាសក្នុងសង្គម"
កាលបើយល់ឃើញដូច្នេះហើយ សត្វនោះក៏លះបង់នូវអំពើកាប់សម្លាប់ កាត់បន្ថយនូវហឹង្សា
រហូតដល់លះបង់ដាច់ស្រឡះ ចំរើនតែមេត្តាចំពោះសត្វដទៃទាំងឡាយ ។
យល់ឃើញថា
"ការប្រព្រឹត្តនូវអំពើចោរកម្ម នាំឲ្យវិនាសនូវទ្រព្យសម្បត្តិរបស់មហាជន និងជាតិ
បង្កើននូវភាពចលាចល បង្កជំលោះនិងទំនាស់រវាងគ្នានិងគ្នា" កាលបើយល់ឃើញដូច្នេះហើយ
ក៏លះបង់នូវអំពើចោរកម្មនានា សមាទានកាន់យកតែសម្មាអាជីវៈ
គឺការចិញ្ចឹមជីវិតត្រឹមត្រូវតែម្យ៉ាង ។
យល់ឃើញថា
"ការប្រព្រឹត្តល្មើសក្នុងកាម ជាហេតុបណ្ដាលឲ្យកើតរោគធ្ងន់ធ្ងរ
មានជំងឺកាមរោគផ្សេងៗជាពិសេសជំងឺអេដស៍ជាដើម" កាលបើយល់ឃើញដូច្នេះហើយ
ក៏លះបង់នូវការប្រព្រឹត្តខុសក្នុងកាម ។ បើបុរស
ស្រឡាញ់ត្រឹមតែភរិយារបស់ខ្លួនតែប៉ុណ្ណោះ ។ បើស្ត្រី
ត្រេកអរត្រឹមតែស្វាមីរបស់ខ្លួនតែប៉ុណ្ណោះ ។
យល់ឃើញថា
"អំពើភូតភរកុហកជាហេតុនាំឲ្យសង្គមបែកបាក់ប្រេះឆា
បង្កើននូវភាពមិនទុកចិត្តរវាងគ្នានិងគ្នាក្នុងសង្គម
និងជាហេតុនាំឲ្យវិនាសដល់ប្រទេសជាតិ និងសេចក្ដីសុខផ្សេងៗ"
កាលបើយល់ឃើញដូច្នេះហើយ ក៏លះបង់នូវមុសាវាទ ប្រកាន់ពោលតែសច្ចធម៌តែប៉ុណ្ណោះ ។
យល់ឃើញថា
"ការផឹកនូវទឹកស្រវឹងជាហេតុនាំឲ្យកើតរោគផ្សេងៗ មានបូសថ្លើម និងភ្លេចស្មារតី
ដែលជាហេតុនាំឲ្យអស់សេចក្ដីអៀនខ្មាស និងដល់នូវការសាបសូន្យភោគសម្បត្តិ
និងវិនាសសូន្យនគរជាដើម" កាលបើយល់ឃើញដូច្នេះហើយ ក៏លះបង់នូវការផឹកទឹកស្រវឹង
សេពតែភេសជ្ជៈដែលមិនស្រវឹង ។
អ្នកចម្រើនវិបស្សនាពិត
តែងស្រឡាញ់នូវសីល ។ អ្នករក្សាសីល ទើបមានចិត្តស្ងប់ ។ អ្នកមានសីលនិងចិត្តស្ងប់
ទើបកើតបញ្ញាជាក់ច្បាស់ ។
ដូច្នេះ
អ្នកចំរើនវិបស្សនា ឈ្មោះថាមានកាយក៏ស្ងប់ វាចាក៏ស្ងប់ ឯចិត្តក៏ស្ងប់ ។
កាលបើមនុស្សម្នាក់ៗ សាងតែអំពើល្អ ប្រកបដោយសេចក្ដីសុខស្ងប់តែម្យ៉ាង
ឈ្មោះថាមនុស្សក្នុងសង្គមទាំងអស់ នឹងដល់នូវសេចក្ដីចំរើនគ្រប់យ៉ាង៖
ចំរើនទី
១
គឺចំរើននូវអាយុនិងសុខភាព ព្រមទាំងកម្លាំងផង។
ចំរើនទី
២
គឺចំរើននូវភោគសម្បត្តិ និងទ្រព្យសម្បត្តិ ។
ចំរើនទី
៣ គឺចំរើនពលរដ្ឋ
។ កាលបើមនុស្សទាំងឡាយមិនសាងនូវអំពើបាប មានការកាប់សម្លាប់ជាដើម
មនុស្សទាំងឡាយក៏មិនមានអាយុខ្លី សុទ្ធតែជាបុគ្គលមានអាយុវែង ។
ភាពវិកលវិការរបស់មនុស្ស មានកំបុតដៃជើងជាដើម និងមិនមាន ។ ការស្លាប់ដោយប្រការផ្សេងៗ
មានកាប់និងបាញ់ជាដើម ក៏មិនមាន ។
ចំរើនទី
៤ គឺចំរើននូវសាមគ្គីធម៌
។ កាលបើចិត្តមនុស្សមានប្រាជ្ញាកើតឡើង ហើយឃើញធម៌ដោយពិត (ក្នុងលោកនេះ មានតែធម៌ ២
ប៉ុណ្ណោះគឺ រូបធម៌ និងនាមធម៌ ទោះជាគេប្រើពាក្យអ្វីហៅក៏ដោយ)
ក៏លះបង់នូវសេចក្ដីប្រកាន់ជាតិ ត្រកូល ពូជ សាសន៍ វណ្ណៈ ពណ៌សម្បុរ
ហើយក៏រាប់អានគ្នាទៅវិញទៅមក ហើយជិតស្និទ្ធ ។
ចំរើនទី
៥
គឺចំរើននូវសេចក្ដីសុខ ។ សេចក្ដីសុខមាន ២ យ៉ាងគឺ សុខក្នុងបច្ចុប្បន្ន ១
សុខក្នុងបរលោក ១ ។
ក. សុខក្នុងបច្ចុប្បន្ន
-សេចក្ដីសុខអ្វីក្នុងលោក
មិនស្មើនឹងសេចក្ដីសុខក្នុងចិត្តឡើយ ។ ព្រះពុទ្ធទ្រង់សំដែងថា "ធម្មបីតិ
សុខំ សេតិ" ប្រែថា បុគ្គលផឹកនូវធម៌ តែងដេកនៅជាសុខ ។
ការរីកចំរើននៃទ្រព្យសម្បត្តិ និងការសុខស្រួលនៃរាងកាយ នាំឲ្យចិត្តមនុស្សរីករាយសប្បាយ
តែការសប្បាយនេះមិនទៀងទាត់ទេ ព្រោះរបស់ទាំងនេះនឹងត្រូវវិនាសទៅវិញ ។
ឯចិត្តបុគ្គលដែលបានអប់រំគ្រប់គ្រងល្អហើយ បានយល់ឃើញច្បាស់នូវធម៌ថា "ធម្មជាតិណាមិនទៀង
ធម្មជាតិនោះជាទុក្ខ ។ ធម្មជាតិណាជាទុក្ខ ធម្មជាតិនោះមិនមែនជារបស់ខ្លួន" ។
កាលបើប្រាជ្ញាឃើញច្បាស់យ៉ាងនេះហើយ បុគ្គលនោះក៏នៅជាសុខក្នុងឥរិយាបថទាំង ៤ មាន ដេក
ដើរ ឈរ អង្គុយ ។ បុគ្គលនោះមានលក្ខណៈកើតនិងវិនាសជាធម្មតា ។
បុគ្គលដែលឃើញធម៌ច្បាស់ហើយ
តែងមានចិត្តនឹងន ហើយមានសតិតាំងនៅជាប្រក្រតី
ប្រព្រឹត្តទៅរហូតដល់ខណៈចិត្តចុតិ(ស្លាប់) ។
ខ. សុខក្នុងបរលោក -បុគ្គលអ្នកឃើញច្បាស់នូវធម៌
កាលបើនៅសល់កិលេសខ្លះនៅក្នុងខន្ធសន្តាន កាលបើអ្នកបែកធ្លាយនូវខន្ធបញ្ចកៈ
បន្ទាប់អំពីចុតិទៅ រមែងទៅកើតក្នុងសុគតិសួគ៌ ។
សរុបសេចក្ដីទៅ
សុខសន្តិភាពនិងសេចក្ដីចំរើនគ្រប់យ៉ាង ដែលមានដល់សត្វលោកទូទៅក្នុងបច្ចុប្បន្ននេះក្ដី
បរលោកក្ដី ហើយពិតប្រាកដនោះ សុទ្ធតែដោយអានុភាពវិបស្សនាជាហេតុទាំងអស់ ៕
-----------------------------
ស្រង់ចេញពី
ស.ភ. លក្ខន្ធិក សមាគមទ្រទ្រង់វិបស្សនាធុរ.
ភ្នំពេញ ទំ.៣-៧
រូបភាព៖Google.com
រូបភាព៖Google.com
No comments:
Post a Comment