ខ្នើយពិសេស តចប់(៥)

ខ្នើយពិសេស តចប់(៥)

ទោះបីជាថ្ងៃនេះ ចិត្តយើងកំពុងកើតទុក្ខ ព្រោះអាចនឹងជាចំណែកមួយក្នុងមនុស្សដែលកំពុងជួបក្ដីវិបត្តិគ្រោះធម្មជាតិ ឬវិបត្តិណានីមួយក៏ដោយ សូមអ្នកសាកល្បងងាកបែរមកមើលសេចក្ដីទុក្ខរបស់មនុស្សដទៃខ្លះៗ ជឿថា នៅមានមនុស្សដែលមានទុក្ខលំបាកជាងយើងច្រើនណាស់ ដែលពួកគេត្រូវវិនាសបាត់បង់ខូចខាតច្រើនជាងយើង ប៉ុន្តែហេតុអ្វីគេនៅតែមានស្នាមញញឹម គេនៅតែស៊ូបាន ។

ក្នុងអំឡុងពេលជួបក្ដីវិបត្តិ យើងត្រូវតាំង “សតិ” ឲ្យបានច្រើនឡើងជាងមុនបន្តិច សាកមកអានពាក្យអប់រំរបស់ព្រះគ្រូ ផៃសាល វិសាលោ ជាព្រះគ្រូដ៏សំខាន់មួយអង្គ ដែលបានចេញមកផ្ដល់កម្លាំងចិត្ត និងមានគោលគំនិតល្អៗ ក្នុងពេលប្រជាជន ឬប្រជាបរិស័ទជួបប្រទះនូវគ្រោះធម្មជាតិ មានពាក្យអប់រំច្រើនឡើង ដែលនាំមកកែលំអប្រើជាមួយស្ថានការណ៍បច្ចុប្បន្ន ។ រឿងនេះកើតឡើង ព្រោះមានស្រ្តីម្នាក់តាំងសំនួរសួរដល់លោក ក្នុងបណ្ដាញសង្គម Facebook ដែលពោលពណ៌នាអំពី “ការភ័យខ្លាច” ។

ស្ត្រីនោះនិយាយថា នាងរស់នៅជាមួយឪពុក បងប្រុស និងក្មួយស្រី ព្រោះតែលោកឪពុកមិនព្រមភាសខ្លួន ហើយនាងមានឆ្កែ ៧ ក្បាល ដែលត្រូវមើលថែ ។ ផ្ទះរបស់នាងនៅលើដីទីទួលខ្ពស់ ទឹកជំនន់លិចមិនដល់ លិចតែជុំវិញផ្ទះប៉ុណ្ណោះ ប៉ុន្តែមនុស្សក្នុងតំបន់នោះ បាននាំគ្នាភាសចេញទៅអស់ ។ ពេលនេះនាងព្យាយាមឈ្វេងយល់រៀនដឹងអ្វីៗដែលមាននៅជុំវិញផ្ទះ នាងទិញទូកមួយមកអុំសម្រាប់ចេញទៅណាមកណា និងចេញទៅជួយអ្នកដទៃ ដែលកំពុងជួបការលំបាក ។

សំនួររបស់នាងគឺ “ប៉ុន្តែពេលខ្លះ នាងខ្ញុំព្រះករុណា ដូចជាមានអារម្មណ៍ខ្លាចថា ទឹកនឹងលិចឡើងរឿយៗ លោកម្ចាស់ល្មមនឹងណែនាំបានត្រូវធ្វើយ៉ាងម៉េចខ្លះ ដែលយើងអាចចាត់ការជាមួយសេចក្ដីខ្លាច ដែលនឹងបានកំពុងកើតឡើងក្នុងពេលនេះ, ទានម្ចាស់ ?

ព្រះគ្រូ លោកចាប់ផ្ដើមឆ្លើយតបសំនួរនាង ដោយសុំអនុមោទនាជាមួយនាងផង ទោះបីមានការលំបាកក៏ដោយ ក៏នៅមានទឹកចិត្តទៅជួយសង្រ្គោះអ្នកដទៃទៀត ។ លោកតបសំនួរនេះថា

“សេចក្ដីខ្លាចនេះ ជារឿងធម្មតាដែលត្រូវកើតឡើង ក៏ប៉ុន្តែសុំឲ្យសង្កេតពិនិត្យមើលថា យើងខ្លាចពេលណាដែលចិត្តមិននៅជាមួយនឹងបច្ចុប្បន្ន តែទៅតាក់តែងដល់រឿងដែលនឹងកើតឡើងក្នុងអនាគត រូបភាពនេះនឹងនាំឲ្យកើតមានសេចក្ដីភ័យខ្លាច និងមានកង្វល់ចិត្ត វាមិនទាន់កើតឡើងទេ តែក៏មានអារម្មណ៍ភ័យខ្លាចបាត់ទៅហើយ ពេលដឹងដូចនេះ ក៏ឲ្យចិត្តត្រឡប់មកនៅជាមួយនឹងបច្ចុប្បន្ននេះវិញ” ។

ប្រិយមិត្តបានអាន ក៏គង់នឹងជ្រួតជ្រាបយ៉ាងច្បាស់ថា លោកកំពុងអប់រំថា “សេចក្ដីខ្លាច” ជាមួយនឹងរឿងអនាគតក៏មានប្រយោជន៍ បើសិនយើងនាំមកប្រើក្នុងការដាក់ផែនការ ដើម្បីទប់ទល់ជាមួយនឹងរឿងដែលបម្រុងនឹងកើតឡើង ក្រឡេកមើលក្នុងជ្រុងមួយនេះ សេចក្ដីខ្លាចនេះនឹងមានប្រយោជន៍ បើសិនខ្លាច ហើយព្យាយាមការពារ ឬត្រៀមវិធីសាស្ត្រកែខៃ តែបើសិនខ្លាច ហើយកប់លិចលង់ជាមួយនឹងសេចក្ដីទុក្ខ ក៏មិនបានជាប្រយោជន៍អ្វីដែរ ។

រឿងទីពីរ “ចំណុចល្អក្នុងហេតុការណ៍អាក្រក់ៗ” ក្នុងសេចក្ដីនេះ លោកមានថេរដីកាថា ហេតុការណ៍អាក្រក់ៗទាំងឡាយ ក៏នៅមានចំណុចល្អ យ៉ាងហោចណាស់ក៏មានពីរប្រការដែរគឺ អប់រំចិត្តយើង និងងហ្វឹកហាត់ចិត្តយើង ។ ការអប់រំចិត្តយើង ឲ្យនឹកគិតដល់សច្ចភាពនៃជីវិត ដែលមានសេចក្ដីប្រែប្រួលផ្លាស់ប្ដូរជានិច្ច ដូចជា របស់បាត់ទៅ ក៏បានអប់រំចិត្តយើងឲ្យដឹងថា ការព្រាត់ប្រាសចាកនិរាសពីមនុស្ស ឬវត្ថុជាទីស្រឡាញ់ទៅជារឿងធម្មតា ពុំមានអ្វីអាចនៅជាប់ជាមួយនឹងយើង ឬក្លាយជារបស់យើងបានជារៀងរហូតនោះទេ ។

ការហ្វឹកហាត់ចិត្តយើង ដែលបានមកពីការជួបក្ដីវិបត្តិ ជាការហ្វឹកហាត់ចិត្តមិនឲ្យមានក្ដីប្រមាទ មានការប្រុងប្រយ័ត្ន ដើម្បីជាការការពារកុំឲ្យមានហេតុភេទអាក្រក់ៗកើតឡើងមកទៀត ឬហ្វឹកហាត់ចិត្តឲ្យដាក់ចុះឬទំនេរ ដើម្បីជាការទប់ទល់ជាមួយនឹងហេតុភេទអាក្រក់ដ៏មានកម្លាំងជាងអនាគត និងដឹងច្បាស់ប្រាកដថា អ្វីសំខាន់បំផុតក្នុងជីវិត “ទ្រព្យសម្បត្តិ” ឬ “ចិត្តរបស់យើង” ។

លោកបានលើកជាឧទាហរណ៍ថា បើសិនអ្នកណាធ្វើឲ្យទូរសព្ទបាត់ ហើយដាក់ចុះមិនបាន ក៏គួរបង្កើតសំនួរសួរខ្លួនឯងថា បើរឿងប៉ុណ្ណឹងដាក់ចុះមិនបានទៅហើយ ចុះនឹងទៅធ្វើចិត្តបានយ៉ាងម៉េចកើត ពេលណាត្រូវបានបាត់បង់មនុស្សជាទីស្រឡាញ់ ដូចជា ម្ដាយឪពុក ប្រពន្ធកូនប្តី ចុះបើហេតុការណ៍ទាំងនោះត្រូវកើតឡើងពិតមែន ។ ហេតុការណ៍អាក្រក់ៗ ឬពិបាកៗ នឹងជួយបង្វឹកចិត្តយើងឲ្យមានសភាពរឹងប៉ឹងឡើង ព្រោះតែត្រូវជួបអ្វីជាអ្វីច្រើនយ៉ាងថែមទៀត ក្នុងពេលខាងមុខ ថែមទាំងត្រូវហ្វឹកហាត់ឲ្យឆ្លាត និងមានបទពិសោធច្រើនឡើង ។

“កុំភ្លេចថា មនុស្សយើងចេះរៀនពីភាពបរាជ័យបានច្រើនជាងភាពជោគជ័យ” ។

ដូចនោះ ក្នុងពេលដែលកំពុងកើតទុក្ខៗតាមផ្លូវកាយ អស់សង្ឃឹម ខកចិត្ត ខូចចិត្ត តានតឹងចិត្ត អផ្សុកឯកា កុំអាលគិតទៅឯណាឆ្ងាយទាល់តែស្ត្រេសអារម្មណ៍ ឬមានក្ដីកង្វល់ចិត្តដល់ជ្រុលហួសហេតុពេក គ្រាន់តែសុំឲ្យជឿជាក់លើខ្លួនឯង និងមានជំនឿយ៉ាងមុតមាំថា

សុំត្រឹមតែមានខ្យល់ដង្ហើមចេញចូល យើងអាចសាងអ្វីគ្រប់យ៉ាងឡើងមកជាថ្មីបានជានិច្ច ដោយដៃទាំងទ្វេរបស់យើងនេះ ៕

សូមរង់ចាំចុចអានរឿងកង្កែបទទួលជ័យលាភី

រូបភាព៖google.com