ការគោរពទិសធម៌ ៦ តាមពុទ្ធោវាទ (កាព្យពាក្យ ៧)

ទី១    ខាងកើតទិសបុព្វា                         ទុកដូចជាមាតាបិតា

          ដែលបង្កើតបុត្រក្នុងលោកា            គូកនស្នេហាអស់ពីចិត្ត ។

          ត្រូវបត្តិបត្តិលោកដោយធម៌ប្រាំ       ដែលអ្នកប្រាជ្ញផ្ដាំមានកំរិត

          កម្រៃថ្លៃគុណលោកអាណិត          ដោយមេត្តាចិត្តជួយកូនថ្លៃ ។

ទី២    ខាងត្បូងទិសទក្ខិណា                    ទុកជាអាចារ្យយើងសព្វថ្ងៃ

          ដែលបង្រៀនធម៌ល្អថ្លាថ្លៃ              ឲ្យបាននិស្ស័យទៅនិព្វាន ។

          ត្រូវប្រតិបត្តិលោកដោយធម៌ប្រាំ      ដែលអ្នកប្រាជ្ញផ្ដាំទុកទូន្មាន

          គឺពាក្យជាច្បាប់ឱវាទាន                   ទាំងនោះត្រូវមានចិត្តជ្រះថ្លា ។

ទី៣    ខាងលិចទិសបច្ឆិមា                       នោះលោកទុកជាបុត្តភរិយា

          ដែលនៅក្រោយខ្នងយើងរាល់គ្នា     នោះគឺជាក្រោមបង្គាប់ខ្លួន ។

          ត្រូវធ្វើសង្រ្គោះដោយធម៌ប្រាំ           ដែលអ្នកប្រាជ្ញផ្ដាំផ្ដាច់មាំមួន

          ថាត្រូវមានចិត្តអាណិតស្ងួន            កុំមានគុំគួនឬគ្នាន់ខ្នាញ់ ។

ទី៤    ខាងជើងទិសឧត្តរា                        លោកទុកថាជាមិត្តសំឡាញ់

          ដែលមានចិត្តស្មើឥតផ្ចាលផ្ចាញ់      រាប់អានស្រឡាញ់ឥតអាក់ឡើយ ។

          ត្រូវប្រតិបត្តិគ្នាដោយធម៌ប្រាំ           ដែលអ្នកប្រាជ្ញផ្ដាំផ្ដាច់មកហើយ

          បើមិត្តមានទុក្ខជួយឲ្យស្បើយ         កុំខានសោះឡើយទើបត្រូវធម៌ ។

ទី៥    ខាងក្រោមទិសហេដ្ឋា                    លោកទុកជាទាសកម្មករ

          ដែលជួយធ្វើការអាក្រក់ល្អ            ដោយចិត្តស្មោះសរនឹងចៅហ្វាយនាយ ។

          ត្រូវនាយសង្គ្រោះដោយធម៌ប្រាំ       ដែលអ្នកប្រាជ្ញផ្ដាំឲ្យខ្វល់ខ្វាយ

          បើមានឈឺចាប់មិនសប្បាយ          ត្រូវឲ្យចៅហ្វាយថែរក្សា ។

ទី៦    ទិសខាងលើឧទ្ធៈ                         ទុកជាសមណៈនិងព្រាហ្មណា

          ដែលយើងទាយកទាយិកា             មានចិត្តជ្រះថ្លាហើយធ្វើទាន ។

          ត្រូវប្រតិបត្តិលោកដោយធម៌ប្រាំ     ដែលអ្នកប្រាជ្ញផ្ដាំទុកទូន្មាន

          លោកអ្នកប្រាប់ផ្លូវសួគ៌និព្វាន         ថាទៅដោយយានគឺសីលអើយ ៕    

រ.ដ. ឯក ញឺម
ស.ស. កម្ពុជសុរិយា ផ្សាយដោយពុទ្ធសាសនបណ្ឌិត ភ្នំពេញ ១៩៤៤ ឆ្នាំ ១៦ ភ.២  ទំ.៣៩៩