គំនិតគួរពិចារណាខ្លឹមសារនៃជីវិត (៩៩)

ការបំពេញការងារល្អ មានតែមនុស្សច្រណែនឫស្យា តើទប់ទលជាមួយសភាពបែបនេះយ៉ាងដូចម្ដេច? បុរាណលោកពោលទុកថា ដើមឈើធំរមែងជួបមុខពូថៅមុត ។ មនុស្សល្បី មនុស្សលេចធ្លោក្នុងចំណោមមហាជន រមែងត្រូវមានមនុស្សជេរ រិះគន់ និន្ទា ច្រណែន ឈ្នានីសជានិច្ច អ្នកមានបញ្ញាទើបមានមនុស្សមកសាកល្បង មនុស្សធ្វើការងារល្អ ទើបមានមនុស្សមកច្រណែនឫស្យាសភាពបែបនេះ វាកើតមានឡើងលើលោកនេះជារឿងធម្មតារបស់លោកធម៌ទៅហើយ កាលណាមានមនុស្សមកសរសើរក៏ត្រូវមានមនុស្សមកនិទ្ទា កាលណាមានសុខកើតឡើងហើយ ក្រោយនោះក៏មានទុក្ខកើតឡើងផងដែរ ។ ការបំពេញការងារល្អរហូតដល់មានមនុស្សមកច្រណែន នៅគ្រាន់បើជាងធ្វើការងារមិនកើត ចាំតែអង្គុយមើលបំណាំគ្នា រកចាប់កំហុសគ្នា ច្រណែនគ្នាដែរ ៕