ចាប់ផ្ដើមពីចំណុចណា?

ទំនាក់ទំនង​ ភាតរភាព​ សីលធម៌​ គុណ​ធម៌​​ ត្រូវលិចអណ្ដែត​ អណ្ដែត​លិច​ រសាត់អន់ថយ​ ហើយបើចង់ឲ្យរឿងទាំងនេះត្រឡប់មកជាល្អប្រសើរវិញ​ តើត្រូវចាប់ផ្ដើមពីចំណុចណា?

យុវជន​ទំនើបទើបរីកដាល​(សម្ភារ​និយម​)​ ទំពាំងភ្លេចខ្លួន​ ថ្ងៃបាក់រសៀលទៅហើយ​ៗបើចង់ឲ្យរឿងទាំងនេះត្រឡប់​មកជាល្អប្រសើរវិញ តើត្រូវផ្ដើមពីចំណុចណា?

សាមគ្គី​បោះបង់​ ព្រលឹងវង្វេង​ មនសិការ​បែកបាក់​ កម្លាំង​ចិត្ត​រង្គោះរង្គើ​ រាងកាយ​មានតែសាច់(គ្មានឆ្អឹង)​ ហើយបើចង់ឲ្យរឿងទាំងនេះត្រឡប់មកជាល្អប្រសើរឡើងវិញ​ តើត្រូវផ្ដើមពីចំណុចណា? ...

ពេលមានជំងឺ​ គេយកគ្រូពេទ្យផ្សំថ្នាំ​ដ៏ចំណានទៅព្យាបាលអ្នកជំងឺ​ តែគេមិនអាចយកអ្នកជំងឺទៅព្យាបាលអ្នកជំងឺបានទេ​។ ដូចគ្នាដែរ​ បើចង់ព្យាបាលសង្គមដែលមានជំងឺ​ ​ជន​ក្នុងសង្គមនោះត្រូវតែកុំមានជំងឺ​ ឬ​កុំធ្វើជាអ្នកឈឺ។ កុំធ្វើជាអ្នកឈឺ​ គឺកុំយល់ព្រមបាក់ទឹកចិត្ត​ កុំវង្វេងស្មារតី​បាត់ព្រលឹង​ កុំបែកបាក់សាមគ្គី​គ្នា​ ហើយចាប់ផ្ដើមប្រឹងប្រែងតទៅ។ តើធ្វើបែបណាកុំឲ្យបាក់ទឹកចិត្ត? ធ្វើបែបណាកុំឲ្យវង្វេងបាត់ព្រលឹង? ធ្វើបែបណាកុំឲ្យបែកបាក់សាមគ្គី?

គ្រួសារ​ដែលក្រីក្រ​ខ្វះខាត​ បើរវល់តែបាក់ទឹកចិត្ត​ រវល់តែឈ្លោះគ្នា​ តើឲ្យអ្នកណាជាអ្នករ៉ាប់រងដោះស្រាយបញ្ហា? សង្គមដែលក្រខ្វះខាត​ បើររវល់តែគិតមុខមាត់​កិត្តិយស​ជាធំ​ តើឲ្យអ្នកណាដែលព្រមយកដៃទ្រមេឃ បាំងព្យុះភ្លៀង? ជំងឺ​ក្នុង​រាងកាយបើបាក់ទឹកចិត្ត​ មិនប្រឹងព្យាបាល​ តើវានឹងអាច​ជាសះស្បើយ​បានទេ?​ ចូរធ្វើជាអ្នកព្យាបាលជំងឺ​ តែកុំធ្វើជាអ្នកឈឺ​។ ចូរធ្វើជាអ្នកសង្គ្រោះ​ តែកុំធ្វើជាជនរងគ្រោះ។ មានតែការក្រាញននៀលមិន​បាក់​ទឹកចិត្ត​ប៉ុណ្ណោះ​ទើបជាចំណុច​អាទិភាព​ទីមួយនៃដំណោះស្រាយ។

វង្វេង​ខ្លួន​គឺដោយសារតែ​ ​មិនដឹងថាខ្លួនឯងនៅទីតាំងណា​ ដើរដល់ចំណុចណា​ ពីមុនយ៉ាងណា? ហើយពេលនេះយ៉ាងណា? វង្វេង​ព្រលឹង​ គឺព្រោះព្រោះតែវង្វេងខ្លួន​ លែងយល់ពីខ្លួនឯង។

ទំនប់​បែកបាក់​ ព្រោះតែស្នាមប្រេះតូចមួយ។ សាមគ្គី​បែកបាក់​ ព្រោះតែការប្រកាន់រឿងតូចមួយ។ ភាពជា​អ្នកដឹកនាំគឺ​ អោបក្រសោប​ ចាប់ដៃចងជាសាមគ្គី​ រឹងមាំផ្ទៃក្នុង​ លះបង់ការតូចចិត្ត​ គិតប្រយោជន៍ជាតិជាងរឿងបុគ្គលផ្ទាល់ខ្លួន។ ភាពជា​អ្នកដឹកនាំគឺ​ មិនយកជនជាតិខ្លួនជាសត្រូវ​ និយម​ការចងសាមគ្គី​ គៀក​ស្មាគ្នាដោះស្រាយបញ្ហា​។ គ្រប់គ្នាគឺសុទ្ធតែអាចបង្ហាញជាគំរូ​ មានន័យថា​ គ្រប់គ្នាត្រូវមានភាពដឹកនាំ​ ហើយ​ក៏មានន័យថា​ គ្រប់គ្នាគឺសុទ្ធតែអាចជាចំណែកនៃដំណោះស្រាយ។ ចូរមើលលើ​ចំណុច​ស្របគ្នា​ ដែលនាំឲ្យយើងមានសាមគ្គីគ្នា​ ហើយកុំមើលលើចំណុចផ្ទុយគ្នាដែលនាំឲ្យយើងបែកបាក់គ្នា។ ចូរធ្វើជាចំណែកនៃដំណោះស្រាយបញ្ហា​ តែកុំធ្វើជាអ្នកបង្កបញ្ហា​ ឬ​បន្ទុកបញ្ហាអី។

មិនថា​ កម្លាំង​ចិត្ត​ គុណធម៌​ សាមគ្គី​ភាព...រឿងទាំងអស់នេះអាចល្អប្រសើរឡើងបានគឺ ផ្ដើមចេញពីបុគ្គលទាំងអស់គ្នាក្នុងសង្គម​ ពោល​គឺ​ ត្រូវ​ចាប់​ផ្ដើម​ចេញពី <ចំណុចខ្លួនឯង​>។ ភាពជា​អ្នកជួយដ៏ពិតប្រាកដគឺ​ បើគេទៅដល់ទីណា​ គេនឹងជួយទីនោះឲ្យរីកចម្រើន។ ហើយប្រសិនបើគេ​ទៅគ្រប់​កន្លែង​ គេនឹងជួយគ្រប់កន្លែង។ សូមផ្ដើមពី​ ចំណុចខ្លូនយើង៕