ពេលរីករាយមិនចេះតែមានរហូតទេ

យើងមិនអាចហាមដំណក់ភ្លៀងមិនឱ្យស្រក់បានទេ ប៉ុន្ដែយើងអាចរីករាយជាមួយដំណក់ទឹកភ្លៀង ។ ឆាកជីវិតមានរឿងខ្លះ យើងមិនអាចគ្រប់គ្រងបានទេ តែយើងអាចបន្សល់ពេលវេលាបន្ដិចដើម្បីភាពរីករាយ ។ ពេលកើតទុក្ខ គិតឱ្យឆ្អែត ពេលញ៉ាំបាយញ៉ាំឱ្យឆ្អែត ពេលរីករាយសប្បាយឱ្យអស់ចិត្ដទៅ ។ ពេលគេងកុំគិត ពេលសប្បាយកុំគិត ហើយពេលញ៉ាំបាយក៏មិនត្រូវគិតដែរ ព្រោះបើយើងច្របល់រឿងគ្រប់យ៉ាងចូលគ្នា នោះជីវិតយើងនឹងក្លាយជាធុងសំរាមហើយ ។ ជីវិតដើរទៅមុខរហូត ពេលសប្បាយមានតិចឬច្រើន អាស្រ័យលើយើងចេះស្រឡាញ់ខ្លួនឯងកម្រិតណា ។ ពេលវេលារីករាយសម្រាប់ជីវិត មិនចេះតែមានរហូតទេ គ្រប់យ៉ាងត្រូវចេះស្វែងរកដោយខ្លួនឯង ។ ខំធ្វើការហត់ហើយ មកគិតរឿងស្មុគស្មាញច្រើនពេកធ្វើអី ? ពេលចង់ដើរលេងក៏ទៅដើរលេងទៅ ពេលចង់ទៅញ៉ាំអីក៏ទៅៗ ចង់ធ្វើអីធ្វើហ្នឹងទៅ ព្រោះពេលវេលាមិនចេះតែចាំយើងទេ ហើយថ្ងៃស្អែកក៏មិនមានសម្រាប់យើងជានិរន្ដរ៍ដែរ ៕

Sun Veasna