ជ្រើសយកគុណតម្លៃ

លោកស្រី ម៉ាស៊ែល អូបាម៉ា (Michelle Obama) បាននិយាយថា " ទ្រព្យសម្បត្តិដែលអ្នករកបានមិនអាចកំណត់ពីភាពជោគជ័យរបស់អ្នកបានឡើយ ប៉ុន្តែភាគជោគជ័យគឺការជួយឲ្យមានការផ្លាស់ប្ដូរជីវិតរបស់អ្នកដទៃ " ។ មនុស្សជាច្រើនបានព្យាយាមស្វែងរកភាពជោគជ័យ ហើយពេលខ្លះដើម្បីទទួលបានភាពជោគជ័យលើជីវិតខ្លួនឯង ពួកគេក៏ដើរជាន់ជីវិតអ្នកដទៃ ធ្វើទង្វើខុសពីគុណធម៌ ។ ដ្បិតមនុស្សរស់នៅត្រូវមានតម្លៃ តែពេលខ្លះពួកគេដើរបញ្ច្រាស់គុណធម៌ ដើម្បីប្ដូរយកតម្លៃទៅវិញ ។

បិតារូបវិទ្យា Albert Einstein ក៏ធ្លាប់លើកឡើងក្នុងន័យនេះថា " កុំព្យាយាមធ្វើជាមនុស្សជោគជ័យ ចូរធ្វើជាមនុស្សដែលមានតម្លៃ " ។ យើងអាចជោគជ័យបើយើងប្រឹងត្រូវ យើងនឹងបរាជ័យបើយើងប្រឹងខុស ប៉ុន្ដែពេលខ្លះយើងពុំគួរផ្ដោតតែលើភាពជោគជ័យ តែពេលខ្លះទៀតយើងនឹងមានតម្លៃ ប្រសិនបើយើងចេះរស់នៅដើម្បីខ្លួនឯង និងអ្នកដទៃ ។

ដ្បិតជីវិតត្រូវប្រជែងរស់ តែជោគជ័យដែលមិនបំពាក់គុណតម្លៃ វាគ្រាន់តែជាជ័យជម្នះដ៏ឯកោប៉ុណ្ណោះ ។ សម្ដេចសង្ឃ ដាឡៃឡាម៉ា (Dalai Lama) បានបង្ហាញថា" សព្វថ្ងៃពិភពលោកលែងត្រូវការមនុស្សជោគជ័យទៀតហើយ តែពិភពលោកកំពុងត្រូវការអ្នកសង្គ្រោះ " ។ ជ្រើសយកគុណតម្លៃ ក្នុងរង្វង់គុណធម៌ ទោះយើងបរាជ័យ ក៏យើងនៅតែជាមនុស្សមានតម្លៃ ៕

Cr. Sun Veasna