ធ្វើជាកូនសិស្សជីវិត

សុភាសិតចិនមួយឃ្លា បានបង្រៀនថា "សត្រូវទី១ដែលរារាំងអ្នកទៅកាន់ភាពជោគជ័យ គឺភាពខ្ជិល" ។ លីក្វាន់យូ រដ្ឋបុរសប្រទេសសិង្ហបុរី បានបន្ថែមថា " យើងមិនអាចទៅដល់ជោគជ័យដោយគ្មានវិន័យត្រឹមត្រូវបានទេ " ។ ម៉ាកុស អរីលៀស (Marcus Aurelius) គឺជាទស្សនៈវិទូនិងជាអធិរាជ្យចក្រភពរ៉ូម៉ាំង ( ១៦១-១៨០ គ.ស ) បានបន្ដថា " ភាពរីករាយនិងសុភមង្គលក្នុងជីវិតរបស់អ្នកគឺពឹងផ្អែកទាំងស្រុងទៅលើគុណភាពនៃការគិតរបស់អ្នក " ។

តាមពិតជីវិតបង្រៀនយើងច្រើនណាស់ ។ រៀនយំរៀនសើច រៀនដើររៀនដួល រៀនខកចិត្ដរៀនឈឺចាប់ រៀនញញឹមរៀនដើរទៅមុខ ប៉ុន្ដែពេលខ្លះមនុស្សខ្លះបានបោះបង់ខ្លួនឯងចោលទាំងពុំទាន់បានឆ្លងកាត់វិញ្ញាសាជីវិតទាំងនោះទៅវិញ ។ តាមពិតយើងបានឆ្លងកាត់រឿងដំបូងច្រើនណាស់ ហើយរឿងប្លែកៗទាំងនោះបានបង្រៀនយើងពីអ្វីដែលហៅថាជីវិត ។ លំបាកតាមពេល សប្បាយតាមកាល គ្រប់យ៉ាងពុំរាបស្មើឡើយ ហើយក៏ពុំចេះតែដូចចិត្ដគ្រប់ពេលដែរ ។ រៀនទទួល រៀនលះបង់ រៀនឈឺចាប់ រៀនរឹងមាំ ។ គ្រប់យ៉ាងត្រូវចាប់ផ្ដើមពីខ្លួនឯង ។ នឿយហត់ក៏ត្រូវទៅមុខ អស់កម្លាំងក៏ត្រូវទៅមុខ ឬទៅមុខទោះបីពេលខ្លះត្រូវននៀល ឬទៅបានប៉ុនណាយកប៉ុណ្ណឹង ។ មនុស្សម្នាក់ៗកើតមកពុំវេចសំណាងមកជាមួយទេ ប៉ុន្ដែពេលខ្លះពួកគេយកភាពរឹងមាំ ឬភាពខ្លាំងមកជាមួយ ។ មនុស្សទន់ខ្សោយបន្ដដេកពេលដួល មនុស្សខ្លាំងដួលងើបៗ ៕

Cr. Sun Veasna