ប្រឹងឱ្យខ្លាំងច្បាំងឱ្យឈ្នះ

អតីតប្រធានាធិបតីអាមេរិក ចន កេណ្ណឌី (John F. Kennedy) និយាយថា “ចូរយើងកុំបន់ស្រន់សុំជីវិតដែលងាយស្រួល តែត្រូវបន់ស្រន់សុំឱ្យខ្លួនឯងក្លាយទៅជាមនុស្សខ្លាំង”។

ទស្សនវិទូចិន ខុង ជឺ បានឱ្យនិយមន័យ “មនុស្សខ្លាំង គឺសំដៅដល់បុគ្គលទាំងឡាយដែលមានគំនិតចាស់ទុំ ក្នុងខណៈដែលខ្លួននៅមានអាយុក្មេងនៅឡើយ”។ បញ្ហាជីវិតកើតឡើងលើគ្រប់មនុស្សទាំងអស់ មានមនុស្សខ្លះព្រមទទួលបញ្ហា សុខខ្លះ ទុក្ខខ្លះ ដោះស្រាយបានខ្លះ ដោះស្រាយមិនបានខ្លះ តែវាជាច្បាប់ធម្មជាតិ។ ដូច្នេះ យើងគួរតែទទួលស្គាល់នូវការផ្លាស់ប្តូររាល់បាតុភូត និងរឿងរ៉ាវជីវិតក្នុងធម្មជាតិ។ មនុស្សខ្លាចស្លាប់ មិនចង់បែក មិនចង់ឈឺចាប់ មិនចង់ចាស់ អ៊ីចឹងទាល់តែលែងកើត នោះទើបអត់មានបញ្ហាជីវិត។ នេះជាច្បាប់សកលនិងច្បាប់ធម្មជាតិដែលហៅថា “សច្ចៈ”។

ធម្មជាតិបានបង្កើតមនុស្សផង ចិញ្ចឹមមនុស្សផង និងសម្លាប់មនុស្សផង តែសេចក្តីវិនាសមួយចំនួនធំ វាក៏កើតចេញពីស្នាដៃរបស់មនុស្សដោយខ្លួនឯងដែរ។ ដូចជាមនុស្សបំផ្លាញបរិស្ថាន កាប់បំផ្លាញព្រៃឈើ។ល។ គ្រប់យ៉ាងនឹងទៅជាល្អទាំងអស់នៅទីចុងបញ្ចប់ តែបើមិនទាន់ល្អនៅឡើយទេ គឺគ្រាន់តែមានន័យថាមិនទាន់ដល់ទីបញ្ចប់ប៉ុណ្ណោះ។ ដើម្បីជោគជ័យមានវិធី ១០យ៉ាងគឺ៖ ១ប្រឹង ២ប្រឹង ៣ប្រឹង ៤ប្រឹង ៥ប្រឹង ៦ប្រឹង ៧ប្រឹង ៨ប្រឹង ៩ប្រឹង ១០ប្រឹង ដោយកុំបោះបង់ឱ្យសោះ។ ចាប់ផ្តើមដោយការប្រឹងប្រែង ធ្វើដំណើរដោយការប្រឹងប្រែង ហើយបញ្ចប់ទៅវិញក៏ដោយការប្រឹងប្រែងដែរ។ សូមឱ្យការប្រឹងប្រែងស្ថិតក្នុងដួងចិត្តមនុស្សទាំងឡាយក្នុងសង្គមខ្មែរ៕

Cr. ប្រតិទិនទស្សនៈ៣៦៥ថ្ងៃ