ជួយជាតិដោយរបៀបណា?

សម្តីរបស់យុវជនទាំងឡាយ ដែលនិយាយថាស្រឡាញ់សង្គមឬចង់ជួយជាតិ គឺនឹងក្លាយទៅជាសំរាមឥតប្រយោជន៍តាមផ្លូវ ឬក៏ក្លាយទៅជាទឹកស្អុយបង្ហូរតាមលូដ្បិតបើសម្តីទាំងនោះ នៅតែល្អពិរោះជាងការប្រតិបតិ្តជាក់ស្តែង។

យុវជនដែលមានទឹកចិត្តស្រឡាញ់សង្គមមានច្រើន តែយុវជនដែលហ៊ាននិយាយពីបញ្ហាសង្គមនិងនយោបាយគឺមានតិចតូចបំផុត។ យុវជនដែលនិយាយថាស្រឡាញ់ ស្រឡាញ់សង្គមមានច្រើន តែយុវជនដែលប្រឹងចុះដៃចុះជើងជួយសង្គមមានតិច។ តើប្រជាជនគ្រប់វ័យ ត្រូវជួយសង្គមដោយរបៀបណាទៅហ្ន៎?

មនុស្សចាស់ត្រូវបណ្តុះក្មេងនិងផ្ទេរបទពិសោធដល់ក្មេងជំនាន់ក្រោយ ហើយក្មេងៗជំនាន់ក្រោយត្រូវប្រឹងប្រែងរៀន។ មិនត្រឹមតែប៉ុណ្ណោះមនុស្សចាស់ជំនាន់មុននិងក្មេងៗជំនាន់ក្រោយ ត្រូវរក្សាភាពជាគំរូនូវគ្រប់សកម្មភាពរបស់ខ្លួន។

ទ្រព្យសម្បត្តិពិតប្រាកដរបស់ប្រទេសជាតិមួយ មិនមែនវាស់ដោយមាសប្រាក់នោះទេ តែត្រូវវាស់ដោយការសិក្សាអប់រំរបស់ប្រជាជន គតិបណ្ឌិតរបស់ប្រជាជន និងភាពរឹងប៉ឹងមាំមួនរបស់យុវជន។ យុវជនមានមូលដ្ឋានគ្រឹះរឹងមាំមានការតាំងចិត្តសិក្សាខ្ពស់ មានឧត្តមគតិស្នេហាជាតិពិត ស្នេហាទឹកដីប្រាកដ មានឆន្ទៈបម្រើប្រជាជន នោះជាតិនឹងរឹងមាំជាមិនខានឡើយ៕

--------------------------------------------

Cr. ប្រតិទិនទស្សន:៣៦៥ថ្ងៃ