Wednesday, July 22, 2015
ម្រះអាចព្យាបាលជំងឺមហារីក និងទឹកនោមផ្អែម
ម្រះអាចព្យាបាលជំងឺមហារីក និងទឹកនោមផ្អែម
ការសិក្សាស្រាវជ្រាវមួយបានរកឃើញថាផ្លែម្រះដែលប្រិយមិត្តចំណាំយកទៅធ្វើម្ហូបយ៉ាងឆ្ងាញ់ពិសានោះ អាចកម្ចាត់ជំងឺមហារីកលំពែង និងអាចព្យាបាលជំងឺទឹកនោមផ្អែមផងដែរ។
លទ្ធផលនៃការស្រាវជ្រាវដែលដឹកនាំដោយវេជ្ជបណ្ឌិត Frank Shallenberger មកពីសាកលវិទ្យាល័យ University of Colorado នោះ បានរកឃើញថា នៅក្នុងម្រះមានសារធាតុរាវ ៥% ដែលអាចជួយកម្ចាត់កោសិកាមហារីក និងថែរក្សាលំពែងរបស់មនុស្សយើងបានល្អសឹងតែមិនគួរឲ្យជឿ។ អ្នកស្រាវជ្រាវបានពន្យល់ថាទឹកម្រះល្វីងៗនោះអាចសម្លាប់កោសិកាមហារីកប្រហែល៩០%។
ក្រុមអ្នកស្រាវជ្រាវនៅសាកលវិទ្យាល័យរដ្ឋ Colorado បានសាកល្បងផ្លែម្រះនោះ នៅលើសត្វកណ្ដុរហើយលទ្ធផលត្រូវបង្ហាញថាមានប្រសិទ្ធភាព ៦៤% ដែលអាចកាត់បន្ថយទំហំនៃដុំមហារីកលំពែង ហើយថែមទាំងមិនមានផលប៉ះពាល់ថែមទៀតផង។
ក្រៅពីអាចកម្ចាត់មេរោគមហារីកលំពែង ម្រះក៏ត្រូវបានគេរកឃើញថាអាចព្យាបាលជំងឺទឹកនោមផ្អែមបានផងដែរ។
ប្រភព៖ ហ្វេកបុក
Tuesday, July 21, 2015
ការអប់រំមនុស្សដោយព្រះធម៌
រៀងរាល់ថ្ងៃ កុំភ្លេចនិយាយឃ្លាចំនួន ១៥ នេះចេញមកដើម្បីក្រើនរំលឹកខ្លួនអ្នកឲ្យបានច្រើន!
ចំណុច៣យ៉ាងដែលអ្នកត្រូវធ្វើជាប្រចាំដើម្បីនាំទៅរកភាពជោគជ័យក្នុងជីវិត
មនុស្សគ្រប់រូប កើតមកតែងប្រាថ្នាចង់ទទួលបានជោគជ័យក្នុងជីវិត។ ជោគជ័យដែលមនុស្សទូទៅសំដៅលើនោះ ភាគច្រើនជាសម្ភារៈ ប្រាក់កាស ផ្ទះសម្បែង និងឋានៈក្នុងសង្គមជាដើម ប៉ុន្តែ ការឲ្យនិយមន័យនៃពាក្យ “ជោគជ័យ” នេះខុសប្លែកពីមនុស្សម្នាក់ទៅមនុស្សម្នាក់ទៀតអាស្រ័យលើគោលបំណងរបស់ពួកគេ។ ឥឡូវនេះ Cool News សូមលើកយក ចំណុច ៣ យ៉ាង ដែលអាចជួយអ្នកឲ្យ ខិតកាន់តែកៀកជោគជ័យ មិនថាជាការងារណានោះទេ។
១. ធ្វើអ្វីជា “សក្ដានុពល” របស់អ្នក
គ្មាននរណាអាចដឹងថា អ្នកខ្លាំងលើអ្វី ពូកែអ្វីក្រៅពីខ្លួនអ្នកនោះទេ ។ ក្នុងន័យនេះ អ្នកជាមនុស្សតែម្នាក់ដែលកំណត់អ្វីដែលអ្នកចង់ធ្វើ និងគិតថា អ្នកអាចធ្វើបានប្រសើរ។ ឧទាហរណ៍ថា ឪពុកម្ដាយរបស់អ្នកចង់ឲ្យអ្នករៀនជំនាញវេជ្ជសាស្ត្រដើម្បីក្លាយខ្លួនជាវេជ្ជបណ្ឌិត និងរកចំណូល បានខ្ពស់ ប្រសិនបើអ្នកមិនចូលចិត្ត ឬសូម្បីតែចាប់អារម្មណ៍ផងនោះ ការសិក្សានោះ ក៏មិនផ្ដល់ឲ្យអ្នកនូវលទ្ធផលជាវិជ្ជមានណាមួយនោះទេ ផ្ទុយទៅវិញ ធ្វើឲ្យខ្ជះខ្ជាយដល់ពេលវេលា និងទឹកចិត្តរបស់អ្នក។
២. រៀបគម្រោងជាប្រចាំ
គ្រប់ការងារទាំងអស់ ការរៀបចំគម្រោងអាចជួយឲ្យអ្នកប្រមើលមើលឃើញច្រើនទាំងចំណុច វិជ្ជមាននិងឧបសគ្គដែលអ្នកនឹងជួបប្រទះ។ ការសិក្សា ធ្វើគម្រោងបានលម្អិត នឹងជួយដល់អ្នក អាចព្យាករណ៍ឧបសគ្គ ដែលនឹងត្រូវជួបប្រទះ និងស្វែងរកដំណោះស្រាយជាបឋម ដ៏ប្រសើរមុននឹងធ្វើដំណើរទៅរកជោគជ័យរបស់អ្នក ហើយចំណុចនេះទៀតសោត ជួយឲ្យចំណេញពេលវេ លា និងបង្កើនជំនឿជាក់កាន់តែខ្ពស់។ សុភាសិតអង់គ្លេសមួយពោលថា “Fail to plan, plan to fail.” ដែលមានន័យថា ការមិនបានរៀបចំគម្រោងជាមុន អាចនាំទៅរកបរាជ័យ។
៣. ការតាំងចិត្ត
គ្មានជោគជ័យណា ដែលអាចសម្រេចបានដោយងាយស្រួលនោះឡើយ។ ប្រសិនបើគ្មានការតាំងចិត្តខ្ពស់នោះ អ្នកអាចនឹងរារែក ឬបោះបង់គោលដៅ ឬសកម្មភាពរបស់ខ្លួន នៅពេលដែលជួបនឹងឧបសគ្គ ។ ប្រសិនបើអ្នកបានប្រឹងប្រែងអស់ពីកម្លាំងកាយ កម្លាំងចិត្តហើយ បើទោះជាលោកអ្នកមិនទទួលបានជោគជ័យក៏អ្នកសប្បាយចិត្តនឹងអ្វីដែលអ្នកបានខិតខំប្រឹងប្រែងហើយដែរ។ កម្លាំងចិត្ត ជាកម្លាំងចលករដ៏ខ្លាំងក្នុងការកំណត់ជោគជ័យរបស់លោកអ្នក៕
អត្ថបទ៖ ដេវីដ
ប្រភព៖ cool1007.com
Monday, July 20, 2015
នារីខ្មែរសម័យថ្មី មិនសម្លាប់ខ្លួនដោយសារតែរឿងរ៉ាវបែកបាក់ស្នេហាឡើយ
ស្ដាប់ដំបូន្មានមហាសេដ្ឋីចិន Jack Ma តើលោកអ្នកគួរធ្វើអ្វីខ្លះទើបល្អនៅចន្លោះពីវ័យ ២០ ឆ្នាំទៅ ៦០ ឆ្នាំ?
អ្នកវិទ្យាសាស្ត្របង្ហាញសញ្ញាណចំនួន ៨ បញ្ជាក់ថា អ្នកជាមនុស្សឆ្លាតខុសពីមនុស្សធម្មតា
តើអ្វីទៅដែលជាកត្តាធ្វើឲ្យលោកអ្នកឆ្លាតជាងអ្នកផ្សេងទៀត? ឆ្លើយតបទៅនឹងសំនួរនេះ អ្នកវិទ្យាសាស្ត្របានចំណាយពេលជាច្រើនទសវត្សដើម្បីស្រាវជ្រាវរកមូលហេតុនៅពីក្រោយបញ្ហានេះ តែមិនទាន់បានគ្រប់ជ្រុងជ្រោយនៅឡើយ។
ទោះបីជាបែបនេះក្តី ជាលទ្ធផល ក្រុមអ្នកស្រាវជ្រាវទាំងនោះបានបង្ហាញហេតុផល និង សញ្ញាណសំខាន់ៗចំនួន ៨ ខាងក្រោមនេះដែលបញ្ជាក់ថា លោកអ្នកមានភាពឆ្លាតវៃជាងមនុស្សផ្សេងទៀត។
១) មិនជក់បារី
យោងតាមការស្រាវជ្រាវរបស់ក្រុមវេជ្ជសាស្ត្រអ៊ីស្រាអែលលើបុរសពេញវ័យចំនួន ២០ ០០០នាក់បានបង្ហាញថា បុរសដែលជក់បារីមានអាយុចន្លោះពី ១៨ ទៅ ២១ ឆ្នាំ មានពិន្ទុ IQ ៩៤ ពិន្ទុ ខណៈដែលបុរសដែលមិនជក់បារីមានពិន្ទុ IQ ចំនួន ១០១ ពិន្ទុ។ លទ្ធផលនេះបញ្ជាក់ថា អ្នកមិនជក់បារីឆ្លាតជាងអ្នកជក់បារី។
២) ចូលរៀនវគ្គដូរ្យតន្ត្រី
យោងតាមការស្រាវជ្រាវរបស់អាមេរិកនៅក្នុងឆ្នាំ ២០១១ បានបង្ហាញថា តន្ត្រី ឬ ឧបករណ៍ភ្លេងបានជួយឲ្យសមត្ថភាពខួរក្បាលរបស់កុមារលូតលាស់បានល្អ ជាពិសេសចំពោះក្មេងៗដែលមានអាយុពី ៤ ទៅ ៦ ឆ្នាំមានសមត្ថភាពនិយាយបានល្អប្រសើរជាងមុន។ រីឯការស្រាវជ្រាវនៅក្នុងឆ្នាំ ២០០៤ វិញ ក៏បានបង្ហាញផងដែរថា ក្មេងៗដែលមានអាយុ ៦ ឆ្នាំ ហើយបានចូលរៀនលេងព្យាណូចំនួន ៩ ខែ មានពិន្ទុ IQ កើនឡើងខុសពីក្មេងៗធម្មតា។
៣) ជាកូនច្បងក្នុងគ្រួសារ
តាមរបាយការណ៍ចេញផ្សាយធ្វើឡើងដោយសារព័ត៌មាន The New York Time បានរកឃើញថា កូនច្បងនៅក្នុងគ្រួសារភាគច្រើនឆ្លាតជាងកូនប្អូន។ នេះមិនមែនមកពីហ្សែន ( genetics) នោះទេ តែជាអន្តរកម្មផ្លូវចិត្តទៅវិញទៅមករវាងឪពុកម្តាយ និង កូនៗតែប៉ុណ្ណោះ។
៤) មានរាងស្តើងស្អាត មិនធាត់ពេក មិនស្គមពេក
ដោយបានធ្វើការស្រាវជ្រាវអស់រយៈពេល ៥ ឆ្នាំលើមនុស្ស ២ ២០០នាក់ ក្រុមអ្នកស្រាវជ្រាវរបស់បារាំងបានបង្ហាញលទ្ធផលជាផ្លូវការមួយនៅក្នុងឆ្នាំ ២០០៦ ដែលថា អ្នកដែលមានរាងស្តើង ចង្កេះអង្ក្រង មិនធាត់ពេក ឬ ស្គមពេក មានសមត្ថភាពខាងបញ្ញាស្មារតីល្អជាងមនុស្សធាត់ ឬ មនុស្សស្គមរីងរៃ។ នេះបញ្ជាក់ថា អ្នកមានរាងស្អាត មានសុខភាពល្អ ហើយសុខភាពល្អនេះហើយដែលធ្វើឲ្យខួរក្បាលដុះលូតលាស់ល្អ។
៥) ចូលចិត្តសត្វឆ្មា
យោងតាមការស្រាវជ្រាវរបស់អាមេរិកដដែលនៅក្នុងឆ្នាំ ២០១៤ កន្លងទៅបានបង្ហាញផងដែរថា មនុស្សដែលស្រលាញ់សត្វឆ្កែចូលចិត្តដើរលេងខាងក្រៅច្រើន ខណៈដែលមនុស្សដែលចូលចិត្តសត្វឆ្មាចូលចិត្តសម្ងំនៅផ្ទះ។ ប៉ុន្តែអ្នកដែលចូលចិត្តសត្វឆ្មាមានភាពវ័យឆ្លាតជាងដោយហេតុថា មនុស្សប្រភេទនេះចូលចិត្តអានសៀវភៅហើយឆ្មានឹងនៅកំដរ ពីព្រោះវាកម្រចេញទៅក្រៅផ្ទះណាស់ ផ្ទុយពីសត្វឆ្កែដែលចូលចិត្តចំណាយពេលច្រើនដើរលេងខាងក្រៅជាមួយម្ចាស់របស់វា។
៦) បៅទឹកដោះម្តាយ ជាជាងបៅទឹកដោះគោ
ផ្អែកលើរបាយការណ៍ស្រាវជ្រាវធ្វើឡើងនៅអង់គ្លេស និង នូវែលហ្សេឡង់លើក្មេងៗចំនួន ៣ ០០០នាក់បានបង្ហាញថា ក្មេងដែលបៅទឹកដោះម្តាយ មានភាពវ័យឆ្លាតជាងក្មេងដែលបៅទឹកដោះគោ។ យោងតាមការលើកឡើងរបស់សាស្ត្រាចារ្យចិត្តវិទ្យាមកពីសាកលវិទ្យាល័យ Illinois លោក Julia Kim-Cohen បានពន្យល់ថា ទឹកដោះម្តាយមានសារធាតុចិញ្ចឹមពិសេសសម្រាប់ការអភិវឌ្ឍប្រព័ន្ធខួរក្បាលធ្វើឲ្យក្មេងៗឆ្លាតពីធម្មជាតិ។
៧) ប្រើដៃឆ្វេង
យោងតាមរបាយកា៤រណ៍ស្រាវជ្រាវនៅក្នុងឆ្នាំ ១៩៩៥ របស់អាមេរិកបានបង្ហាញថា មនុស្សដែលចេះដៃឆ្វេង (ចូលចិត្តធ្វើអ្វីៗដោយប្រើដៃឆ្វេង) មានភាពឆ្លាតវៃជាងមនុស្សដែលប្រើដៃស្តាំ។ មនុស្សប្រើដៃឆ្វេងមានភាពស្ទាត់ជំនាញច្រើន ជាពិសេសខាងសំណង់ស្ថាបត្យកម្ម និងលេងតន្ត្រីជាដើម។
៨) មានកម្ពស់ខ្ពស់
មនុស្សដែលមានរាងខ្ពស់ក៏ត្រូវបានគេរកឃើញផងដែរថា មានភាពវៃឆ្លាតជាងមនុស្សរាងទាបផងដែរ។ នៅក្នុងអាយុ ៣ ឆ្នាំ ក្មេងដែលមានកម្ពស់ខ្ពស់ មានសមត្ថភាពខួរក្បាលល្អជាជាងក្មេងមានកម្ពស់ទាប ឬ ក្រិន។ ក្មេងមានកម្ពស់ខ្ពស់ បង្ហាញពីសញ្ញាណនៃការលូតលាស់ល្អ ដែលនេះជាកត្តាធ្វើឲ្យខួរក្បាលលូតលាស់ល្អដែរ៕
ប្រែសម្រួល៖ ខេវិន
ប្រភព៖ thebnews.com
អ្នកដែលមានជំនាញពិតប្រាកដ នឹងមានហាងឆេងខ្ពស់ចំនួន ៦ ចំណុចនេះ
ជំនាញ គឺជាកិច្ចការសំខាន់ខ្លាំងណាស់ដែលមនុស្សគ្រប់រូបនៅក្នុងសតវត្សទី២១ នេះត្រូវតែមានសម្រាប់ភាពជោគជ័យនៅក្នុងអាជីពការងារ។ អ្នកដែលមានជំនាញ ជាអ្នកដែលលេចធ្លោនៅក្នុងចំណោមសាធារណជន ជាពិសេសពីការពឹងពាក់អាស្រ័យរបស់មនុស្សគ្រប់មជ្ឈដ្ឋាន។ សម្រាប់ប្រិយមិត្តអ្នកអានវិញ សូមគិតគូរពីចំណុចនេះឲ្យបានម៉ត់ចត់បំផុត ត្បិតអីជំនាញដ៏ប៉ិនប្រសព្វនេះធ្វើឲ្យលោកអ្នកទទួលបានអត្ថប្រយោជន៍យ៉ាងច្រើនដូចខាងក្រោមនេះ៖
១) នៅពេលអ្នកចេះប្រាកដ ពួកគេនឹងរត់មករកអ្នកដោយខ្លួនឯង
សុភាសិតខ្មែរតែងក្រើនរំលឹកថា នៅពេលដែលអ្នកចេះប្រាកដ ប្រាក់នឹងរត់តាមហៅជាមិនខាន។ សម្រាប់ចំណុចនេះវិញ វាមិនខុសអ្វីពីពាក្យមួយឃ្លានេះទេ ព្រោះថានៅពេលដែលអ្នកមានជំនាញអ្វីមួយ អ្នករមែងជាទីពឹងអាស្រ័យរបស់អ្នកដទៃ។ ជាឧទាហរណ៍បើអ្នកចេះជំនាញសហគ្រិនភាពពិតប្រាកដ អ្នកនឹងក្លាយជាផ្ទាំងស៊ីបពីអ្នកចង់បោះដើមទុនរកស៊ី សហគ្រិន និស្សិត និង អ្នកដែលចង់ប្រឡូកក្នុងអាជីវកម្មតែម្តង។
២) ជំនាញរបស់អ្នកនឹងធ្វើឲ្យអតិថិជនមានទំនុកចិត្ត
ជាឧទាហរណ៍ថា អ្នកបានទៅពឹងពាក់មេធាវីមួយរូបដែលមិនសូវមានជំនាញច្បាស់លាស់ចន្លោះប្រហោងក្នុងការក្តោបក្តាប់រឿងក្តីច្រើន។ នេះនឹងធ្វើឲ្យអ្នកមានការមន្ទិលសង្ស័យ និង មិនសូវមានទំនុកចិត្តទៀតផងនៅពេលតតាំងនៅតុលាការ។ យ៉ាងណាមិញ បើសិនជាអ្នកគឺជាមេធាវីដ៏ចំណានម្នាក់វិញ អ្នកនឹងអាចជួយធ្វើឲ្យអតិថិជនរបស់អ្នកអស់ចម្ងល់ មានភាពកក់ក្តៅ ជាពិសេសមិនអាចធ្វើឲ្យពួកគេចាប់កំហុស ឬសង្ស័យមកលើអ្នកជាដើម ដែលនេះជាការផ្តល់ទំនុកចិត្តខ្ពស់ពីពួកគេនេះឯង។
៣) អ្នកនឹងមានឥទ្ធិពលក្នុងទីផ្សារការងាររបស់អ្នក
នៅក្នុងសង្គមមួយ បុគ្គលល្បីៗ អ្នកជំនាញ ឬ អ្នកវិភាគជាច្រើនមានមុខមាត់ និង ដឹងឮពីសាធារណជនច្រើនក៏ដោយសារតែបុគ្គលទាំងនោះមានជំនាញចេះយ៉ាងស្ទាត់ជំនាញនេះឯង។ ឧទាហរណ៍ថា អ្នកមានជំនាញខាងវិភាគទីផ្សារអចលនទ្រព្យយ៉ាងច្បាស់លាស់មួយចុះ។ ជំនាញនេះ នឹងធ្វើឲ្យអ្នកបានយល់ដឹងគ្រប់ស្ថានការណ៍ ការវិវត្តនានានៃទីផ្សារអចលនទ្រព្យនៅក្នុងក្រុង ឬ តំបន់នានា។ បែបនេះ អ្នកនឹងទទួលបានឥទ្ធិពល និង ភាពទាក់ទាញពីអតិថិជន ជាពិសេសស្ថាប័ននានា ដែលចង់ស្វែងយល់ពីវិស័យនេះតែម្តង។
៤) អ្នកអាចបង្កើនតម្លៃសេវាកម្មរបស់អ្នកបានគ្រប់ស្ថានភាព
នៅពេលដែលអតិថិជនម្នាក់បានពឹងពាក់ដោយហេតុថា អ្នកមានជំនាញច្បាស់លាស់ពីអ្វីដែលពួកគេកំពុងត្រូវការ នោះអ្នកក៏មានទឹកមាត់លេបច្រើនដែរ។ អ្នកកាន់តែចេះ កាន់តែមានជំនាញ អ្នកកាន់តែអាចដំឡើងថ្លៃសេវាកម្មរបស់អ្នកបានដែរ។ ជាទូទៅអតិថិជនដែលយល់ថា អ្នកបានផ្តល់សេវាកម្មល្អយ៉ាងគាប់ចិត្តដល់ពួកគេ ពួកគេមិនសូវស្តាយស្រណោះប្រាក់ថ្លៃសេវាកម្មរឿងមួយកាក់មួយសេននោះដែរ ហើយអាចមានច្រើនលើសពីអ្វីដែលអ្នករំពឹងទុកទៀតផង។
៥) អ្នកនឹងក្លាយជាផ្ទាំងស៊ីបលើបណ្ដាញផ្សព្វផ្សាយ
ដូចអ្វីដែលបានលើកឡើងនៅក្នុងចំណុចទី៣ នៅក្នុងសង្គមនីមួយៗតួយ៉ាងដូចជានៅក្នុងប្រទេសកម្ពុជា អ្នកជំនាញ អ្នកវិភាគ ទាំងនយោបាយក្តី សេដ្ឋកិច្ចក្តី ឬ អាជីវកម្មក្តី តែងមានមុខមាត់នៅលើកញ្ចក់ទូរទស្សន៍ វិទ្យុ រួមទាំងការប្រមាញ់ពីអ្នកកាសែតជាដើម។ នេះជារឿងមួយមិនអាចប្រកែកបាន ដែលធ្វើឲ្យអ្នកកាន់តែមានប្រាក់ចំណូល ប្រជាប្រិយភាព និងកេរ្តិ៍ឈ្មោះលេចមុខមាត់ជាទីចាប់អារម្មណ៍របស់សាធារណជននៅក្នុងសង្គម។
៦) អ្នកនឹងមានទំនាក់ទំនងល្អជាមួយអាជ្ញាធរ និង អ្នកជំនាញដូចគ្នា
បើនិយាយជាទូទៅ បុគ្គលដែលមានជំនាញពិតប្រាកដ ត្រូវបានគេមើលឃើញថា មានទំនាក់ទំនងកាន់តែស៊ីជម្រៅជាមួយអាជ្ញាធរ ក្រុមហ៊ុន អង្គការនានា ជាពិសេសអ្នកជំនាញដូចគ្នាតែម្តង។ នៅត្រង់ចំណុចនេះនៅពេលដែលអ្នកមានជំនាញពិតប្រាកដ អ្នកកាន់តែមានគ្រឹះទំនាក់ទំនងកាន់តែរឹងមាំជាទីចាប់អារម្មណ៍របស់បុគ្គលល្បីៗជាច្រើន ហើយមិត្តភាព និង មុខមាត់របស់អ្នកក៏កាន់តែល្បីសុះសាយឡើងទៅតាមនេះដែរ។ សូមចាំថា ចង់ធ្វើជាអ្នកជំនាញ មិនមែនធ្វើជាអ្នកចេះសព្វគ្រប់បែបយ៉ាងនោះឡើយ ពោលគឺត្រូវចេះជំនាញមួយឲ្យពិតប្រាកដ។ យ៉ាងណាមិញ បើអ្នកមិនធ្វើបែបនេះ វាគ្រាន់តែដូចពាក្យសុភាសិតបុរាណខ្មែរមួយពោលថា “ចេះដល់មិនស្មើអ្នកប្រសព្វមួយ” តែប៉ុណ្ណោះ៕
ប្រែសម្រួល៖ ខេវិន
ប្រភព៖ http://thebnews.com
មូលដ្ឋានគ្រឹះទាំង៨ នៃសុភមង្គលដែលអ្នកមិនគួរមើលរំលង
តើអ្វីទៅជាសុភមង្គល? មនុស្សមួយចំនួនបានឲ្យតម្លៃសុភមង្គលនៅពេលដែលមនុស្សយើងមានមាសប្រាក់សម្បូរហូរហៀរ។ទន្ទឹមនឹងនេះក៏មានទស្សនៈផ្ទុយពីនេះដែរដែលថា សុភមង្គលរបស់មនុស្សមិនស្ថិតនៅលើមាសប្រាក់នោះទេ តែវាស្ថិតនៅលើចិត្តរបស់យើងទៅវិញទេ។ ប្រិយមិត្តអាចយល់ខុសៗគ្នាពីនិយមន័យសុភមង្គលនេះ ប៉ុន្តែខាងក្រោមនេះនឹងអាចផ្ដល់ជាពន្លឺដល់លោកអ្នកពីមូលដ្ឋានគ្រឹះនៃសុភមង្គលរបស់អ្នកបានថា តើត្រូវធ្វើដូចម្ដេចដើម្បីទទួលបានសុភមង្គល?
១) សុភមង្គលគឺជាអ្វីដែអ្នកត្រូវមាន មិនមែនជាការស្រមើស្រមៃទេ
ចង់កសាងសុភមង្គល ប្រៀបដូចជាការអានសៀវភៅប្រលោមលោកមួយក្បាលដូច្នេះដែរ។ លោកអ្នកត្រូវអានវាចាប់តាំងពីដើមទំព័រ រហូតដល់ចប់ទើបដឹងថា ប្រលោមលោកនៅក្នុងសៀវភៅនេះនិយាយពីអ្វី។ យ៉ាងណាមិញ សុភមង្គលរបស់អ្នកគឺជាអ្វីដែលអ្នកត្រូវធ្វើដំណើរទៅមុខប្រៀបដូចជាអានសៀវភៅពីទំព័រមួយទៅទំព័រ និង កត់ត្រាចំណុចសំខាន់នេះ ទើបអ្នកអាចសម្រេចគោលដៅរបស់អ្នកបាន។
២) រៀនដោះស្រាយបញ្ហាខកបំណងទាំងឡាយ
សូមចាំថា ជីវិតរបស់មនុស្សយើង មិនមែនសុទ្ធតែធ្វើអ្វីៗស្របតាមបំណងរបស់ខ្លួននោះឡើយ ពោលគឺអ្នកនឹងជួបប្រទះបញ្ហាផ្សេងៗដែលអាចធ្វើឲ្យអ្នកខកចិត្ត។ ហេតុដូច្នេះ អ្នកត្រូវប្រាកដថា បញ្ហាទាំងនោះនឹងមិនមកបំផ្លាញសុភមង្គលរបស់អ្នកនោះទេ។ ប្រការដែលល្អ អ្នកត្រូវចេះគ្រប់គ្រងបញ្ហាទាំងនោះឲ្យបាន និង ចេះចិញ្ចឹមភាពរីករាយឡើង។
៣) ចេះរស់នៅជាមួយបច្ចុប្បន្នកាលរបស់អ្នក
មនុស្សដែលរស់នៅជាមួយអតីតកាល មិនអាចធ្វើឲ្យពួកគេជោគជ័យក្នុងឆាកជីវិតនៅថ្ងៃនេះ ឬ ថ្ងៃស្អែកបានឡើយ។ ម៉្លោះហើយអ្នកមិនត្រូវដេករង់ចាំថ្ងៃស្អែក ឬ រង់ចាំឱកាសល្អមកដល់នោះទេ ពោលគឺត្រូវប្រើប្រាស់ពេលវេលា និងរៀនរស់នៅជាមួយថ្ងៃនេះធ្វើអ្វីៗដែលមានតម្លៃបំផុតដែលនាំមកនូវសុភមង្គល និង ភាពជោគជ័យ។
៤) យល់ឲ្យច្បាស់ពីគោលដៅជីវិតរបស់អ្នក
គោលដៅជីវិត គឺជារឿលងសំខាន់ខ្លាំងណាស់ ព្រោះវានឹងកំណត់ថាតើជីវិតរបស់អ្នកនឹងក្លាយជាអ្វីនៅពេលអនាគត? សម្រាប់អ្នកដែលមានគោលដៅច្បាស់លាស់ រមែងមានភាពជឿជាក់ និង ទំនុកចិត្តឈោងចាប់យកគោលដៅនេះ ដែលនេះនឹងធ្វើឲ្យជីវិតរបស់ពួកគេទទួលបានភាពរីករាយជានិច្ច។ ផ្ទុយទៅវិញបើអ្នកមិនដឹងថា តើតម្លៃ និង គោលដៅជីវិតជាអ្វី មិនខុសអ្វីពីទូកនៅកណ្ដាលទន្លេគ្មានកោះគ្មានត្រើយនោះទេ។
៥) ធ្វើសកម្មភាពសាមញ្ញប្រចាំថ្ងៃដែលនាំមកនូវសុភមង្គល
ពេលវេលា ២៤ ម៉ោងរបស់អ្នកនឹងផ្ដល់តម្លៃអ្នកពិតៗនៅពេលដែលអ្នកចំណាយពេលធ្វើរឿងសាមញ្ញៗ តែមានតម្លៃដល់ជីវិតរបស់អ្នក។ អ្នកប្រហែលគិតថា លុយគឺជារឿងសំខាន់ ប៉ុន្តែសម្រាប់មហាសេដ្ឋីមួយចំនួនគិតថា មានលុយមិនមែនមានអ្វីៗទាំងនោះទេ។ ការចំណាយពេលបង្កើតភាពរីករាយជាមួយគ្រួសារ មិត្តភក្តិ ឬ សកម្មភាពមនុស្សធម៌ផ្សេងៗទៀតនឹងនាំមកនូវសុភមង្គលដល់អ្នក ដែលមនុស្សមួយចំនួនមើលរំលង។
៦) ចែករំលែកឲ្យបានច្រើន
ពាក្យមួយឃ្លាបានពោលថា “ឲ្យរបស់ស្រណោះដៃ” ដែលនេះមានន័យថា បុគ្គលមួយចំនួនបើឲ្យរបស់អ្វីទៅគេហើយ តែងចង់បានអ្វីជាថ្នូរមកវិញ។ ប៉ុន្តែ សម្រាប់អ្នកវិញ ការជួយអ្នកដទៃ ចែករំលែកចំណេះដឹង ធ្វើមនុស្សធម៌ទៅកាន់អ្នកដទៃកាន់តែច្រើនឡើងដោយមិនចង់បានអ្វីតបស្នងមកវិញ គឺជាអ្វីដែលធ្វើឲ្យអ្នកទទួលបានសុភមង្គលបំផុតមួយ។ ចំណុចនេះ សូម្បីតែអ្នកមិនចង់បានការតបស្នង ក៏ពួកគេឲ្យតម្លៃអ្នកជាមិនខាន។
៧) មាសប្រាក់មិនអាចទិញសុភមង្គលបានទេ
អ្នកអាចសង្កេតបានថា មានគ្រួសារមួយចំនួនមានទ្រព្យសម្បត្តិច្រើនហូរហៀររស់នៅវិឡាថ្លៃៗ ជិះរថយន្តទំនើបៗ មានប្រាក់រាប់ម៉ឺនដុល្លារ តែបែរជារកសុភមង្គលមិនឃើញ។ នេះប្រហែលជាពួកគេបានមើលរំលងសុភមង្គលមួយចំនួនរួចស្រេចទៅហើយ។ ការចំណាយពេលយកចិត្តទុកដាក់មើលថែដល់មនុស្សដែលអ្នកស្រលាញ់ ជាពិសេសក្តីស្រលាញ់ និង ការថ្នាក់ថ្នមជាដើម គឺជាចំណែកនៃសុភមង្គលដ៏ធំធេង។
៨) សូមកុំឲ្យអតីតកាលបំផ្លាញអនាគតរបស់អ្នក
អតីតកាលរបស់អ្នកបានកន្លងផុតទៅហើយ ហេតុដូច្នេះអ្នកមិនអាចកែប្រែវាបានទេ តែអ្នកបានត្រឹមតែរៀនសូត្រពីវាតែប៉ុណ្ណោះ។ នេះជាអ្វីដែលបុគ្គលរីករាយបានដឹងពីចំណុចនេះ។ សម្រាប់អ្នកវិញ ត្រូវបង្កើតភាពរីករាយ និង ធ្វើអ្វីដែលល្អនៅក្នុងថ្ងៃនេះ ព្រោះថាអនាគតដ៏ល្អមួយនឹងរៀបចំឲ្យអ្នក៕
ប្រែសម្រួល៖ ខេវិន
ប្រភព៖ thebnews.com
បើមិនបានរៀននៅសាលា បង្រៀនខ្លួនឯងតាមវិធីសាស្ត្រទាំង៧នេះក៏មានចំណេះដឹងកើនឡើងដែរ
មនុស្សគ្រប់គ្នា ជាពិសេសសិស្សនិស្សិតដែលបញ្ចប់ថ្នាក់វិទ្យាល័យ មិនប្រាកដថាមានលទ្ធភាពគ្រប់គ្រាន់អាចបន្តការសិក្សារបស់ខ្លួននៅថ្នាក់មហាវិទ្យាល័យបានដែរ។ ទោះបីជាបែបនេះក្តី ប្រភពនៃចំណេះដឹងមានច្រើនណាស់មិនមែនមាននៅតែសាលានោះទេ។ ខាងក្រោមនេះគឺជាវិធីសាស្ត្រ ៧ ចំណុចដែលអ្នកអាចបង្រៀនខ្លួនឯងបានដោយមិនចាំបាច់ទៅអង្គុយនៅក្នុងសាលានោះឡើយ។
១) អានសៀវភៅ
នេះគឺជាវិធីសាស្ត្រមួយដែលអ្នកមិនអាចប្រកែកបាននោះឡើយ ត្បិតវាអាចជួយឲ្យអ្នកបានរៀន សូត្រ និង ក្រេបចំណេះដឹងថ្មីៗកាន់តែច្រើនដោយមិនចាំបាច់ទៅអង្គុយនៅក្នុងថ្នាក់រៀន។ ហេតុដូច្នេះហើយ បើអ្នកយល់ឃើញថា សៀវភៅដែលអ្នកអានគួរឲ្យចាប់អារម្មណ៍ និង មានប្រយោជន៍ សូមកុំនៅបង្អែបង្អង់អី ឆ្លៀតពេលអានបានកាន់តែច្រើនកាន់តែល្អ។
២) ទំនាក់ទំនងឬ យកបុគ្គលជោគជ័យធ្វើជាគំរូ
ទំនាក់ទំនងដ៏ល្អរបស់អ្នកជាមួយមិត្តភ័ក្ដិនៅខាងក្រៅសាលា ជាពិសេសជាមួយបុគ្គលជោគជ័យនៅជុំវិញខ្លួនអ្នកបានកាន់តែច្រើន គឺកាន់តែធ្វើឲ្យអ្នកជោគជ័យកាន់តែច្រើន ព្រោះថាពួកគេអាចផ្ដល់ជាត្រីវិស័យ ឬ ចែករំលែកបទពិសោធន៍ល្អៗអ្នកបាន។ បើនេះជារឿងលំបាកបន្តិចសម្រាប់អ្នក អ្នកអាចស្វែងរកប្រវត្តិបុគ្គលជោគជ័យនៅជុំវិញពិភពលោកមកធ្វើជាគំរូ ដើម្បីពិនិត្យមើលដំណើរជីវិត និង សកម្មភាពរបស់បុគ្គលទាំងនោះសម្រាប់ធ្វើជាថ្នាលបណ្ដុះភាពជឿជាក់ និង ជួយលើកទឹកចិត្តរបស់អ្នកឲ្យកាន់តែប្រសើរឡើង។
៣) ទស្សនាចរឲ្យបានច្រើន
នេះវាគន្លឹះមួយទៀតដែលផ្ដល់ចំណេះដឹងដល់អ្នក។ ប្រជាជននៅលោកខាងលិចចូលចិត្តដើរកម្សាន្តខ្លាំងណាស់ ពីព្រោះវាបានផ្ដល់ចំណេះដឹងយ៉ាងច្រើនដល់ពួកគេតាមរយៈការសិក្សាស្វែងយល់ពីបរិបទរស់នៅ វប្បធម៌ ការអភិវឌ្ឍនានានៅតាមប្រទេសនីមួយៗនៅជុំវិញពិភពលោក។អ្នកក៏ដូច្នេះដែរ ឆ្លៀតពេលទំនេរណាមួយដើរលេងកម្សាន្តផង សិក្សារៀនសូត្រផងទើបជីវិតរបស់អ្នកស្រស់ស្រាយ និង មានចំណេះដឹងកើនឡើង។
៤) អាន Wikipedia និង ស្រាវជ្រាវឯកសារតាម Googleឲ្យបានច្រើន
ការស្រាវជ្រាវឯកសារតាមរយៈគេហទំព័រដ៏ពេញនិយមសម្រាប់អ្នកសិក្សារៀន សូត្រដូចជា Wikipedia និង Google គឺជាជម្រើសដ៏ល្អមួយនៅយុគសម័យបច្ចេកវិទ្យានេះ។ វាជាបណ្ដុំនៃឯកសារដ៏ច្រើនលើសលប់សម្រាប់ផ្ដល់ចំណេះដឹងដល់អ្វីដែលអ្នកចាប់អារម្មណ៍ ឬ មិនបានដឹង។ ចំណេះដឹងរបស់អ្នកនឹងកាន់រីកចម្រើនពីមួយថ្ងៃទៅមួយថ្ងៃ បើអ្នកព្យាយាមក្រេបជញ្ជក់ចំណេះដឹងតាមគេហទំព័រទាំងនេះ។
៥) មើលប៉ុស្តិ៍ទូរទស្សន៍ដែលផ្ដល់ចំណេះដឹង
នៅពេលបច្ចុប្បន្ននេះ ស្ថានីយទូរទស្សន៍ល្បីៗមានច្រើនណាស់ទាំងទូរទស្សន៍ខ្សែកាបក្តី ផ្សាយផ្ទាល់ក្តី តាមអនឡាញក្តី មានច្រើនស្អេកស្កះ។ យ៉ាងណាមិញ ការជ្រើសរើសប៉ុស្តិ៍ទូរទស្សន៍ដែលផ្ដល់ការអប់រំដូចជា BBC CNN CNBC Bloomberg គឺសុទ្ធតែទូរទស្សន៍លំដាប់ពិភពលោកផ្ដល់ចំណេះដឹងគ្មានដែនកំណត់។ វាជាប្រភពចំណេះដឹងដែលនាំអ្នកឆ្ពោះទៅកាន់ពិភពលោកមួយដែលអ្នកមិនធ្លាប់ឃើញមិនធ្លាប់ជួបពីមុនមកជាពិសេសព្រឹត្តិការណ៍នយោបាយ សេដ្ឋកិច្ច ចំណេះដឹង វប្បធម៌ជាដើម។
៦) សិក្សាតាមវគ្គខ្លីៗលើបណ្ដាញអ៊ីនធឺណិត
នៅតាមសាកលវិទ្យាល័យល្បីៗនៅជុំវិញពិភពលោក គេសង្កេតឃើញថា មានសាស្ត្រាចារ្យជាច្រើនបានបង្រៀនជាវគ្គខ្លីៗ ជំនាញបច្ចេកទេសផ្សេងៗ បង្ហោះតាមអនឡាញ ដូចបង្រៀនផ្ទាល់នៅតាមសាកលវិទ្យាល័យដែរសម្រាប់ឲ្យនិស្សិត ឬ សាធារណជនបានសិក្សារៀនសូត្រ។ វីដេអូទាំងនេះ អ្នកអាចរៀនសូត្របានដោយចូលទៅបើកមើលកម្មវិធីបង្រៀនទាំងនោះត្បិតអីវាមិនអស់ប្រាក់ច្រើន។
៧) ស្រាវជ្រាវឲ្យបានច្រើននៅតាមបណ្ណាល័យនានា
បណ្ណាល័យជាសាធារណៈ ជាឯកជននៅតាមគ្រឹះស្ថានសិក្សារបស់រដ្ឋ ឯកជន គឺសុទ្ធតែប្រភពនៃចំណេះដឹងមិនចេះរីងស្ងួត។ អ្នកត្រូវចាំថា ការអង្គុយរៀននៅក្នុងថ្នាក់វាគ្រាន់តែជាផ្នែកតូចមួយប៉ុណ្ណោះនៃការផ្ដល់ចំណេះដឹងដល់អ្នក តែអ្វីដែលពិសេសជាងនេះទៅទៀតគឺការសិក្សាស្រាវជ្រាវខ្លួនឯងនៅខាងក្រៅឲ្យបានច្រើនឲ្យអស់ពីលទ្ធភាពរបស់អ្នកទើបចំណេះដឹងរបស់អ្នកកាន់តែរីកចម្រើនជាងមុន៕
ប្រែសម្រួល៖ខេវិន
ប្រភពៈ http://www.thebnews.com/
ឧបាយបង្កើតសេចក្តីសុខ
សព្វសត្វទាំងឡាយ សុទ្ធតែស្វែងរកសេចក្ដីសុខគ្រប់ ៗ ប្រាណ តែមិនងាយនឹងបានជួបប្រទះនូវសេចក្ដីសុខនោះ ដូចយ៉ាងខេមរៈជនយើងនេះ ច្រើនតែជួបប្រទះនូវសេចក្ដីទុក្ខលំបាក ច្រើនជាងជនជាតិនានា នោះមិនមែនមកពីយើងកាន់ព្រះពុទ្ធសាសនាទេ ប្រាកដជាមកពីយើងមិនដឹងច្បាប់ ព្រះពុទ្ធសាសនាឲ្យច្បាស់លាស់ ឬក៏យើងដឹងដែរ តែយើងមិនប្រតិបត្តិតាមឲ្យសព្វគ្រប់ បានជាយើងឃ្វាងចាកសុខ ដែលគួរបានអំពីផ្លូវព្រះពុទ្ធសាសនា ។ ពាក្យថាសុខ ៗ នេះបានដល់សេចក្ដីសប្បាយ រីករាយ ធូរទូលាយ ស្រួលនៃកាយ-និងចិត្ត ។ ឯសុខ សម្រាប់មនុស្សជាតិក្នុងសកលលោកនេះ លោកចែកចេញជា ៦ ពួកគឺៈ
១- សុខរបស់អ្នកគ្រប់គ្រងផ្ទះ ។
២- សុខរបស់មនុស្សមួយរូប ៗ ។
៣- សុខរបស់អ្នកមានប្ដីប្រពន្ធ ។
៤- សុខរបស់អ្នកជាមាតាបិតា នឹងកូនប្រុស-ស្រី ។
៥- សុខរបស់អ្នកជានាយ ចៅហ្វាយ នឹងកូន-ក្មួយ ។
៦- សុខរបស់គ្រូអាចារ្យ នឹងកូនសិស្ស ។
សូមអធិប្បាយមួយពួកម្ដង ៗ ដោយសេចក្ដីសង្ខេបដូចតទៅនេះ.....ចុចទីនេះដើម្បីទៅអានអត្ថបទទាំងស្រុង
ប្រភពៈ khmerbuddhism.wordpress.com
តើត្រូវត្រៀមខ្លួនយ៉ាងណាឱ្យក្លាយជាឪពុកម្ដាយដ៏ល្អ?
ក្លាយជាឪពុកម្ដាយគឺជារឿងដ៏លំបាក ប៉ុន្តែមនុស្សភាគច្រើនយល់ថា វាជារឿងដែលមិនអាចគេចផុតបានឡើយ។ បើសិនជាអ្នកជ្រើសរើសផ្លូវបង្កើតគ្រួសារ មានកូន និងប្រពន្ធ ខាងក្រោមនេះគឺជាគន្លឹះសំខាន់ៗសម្រាប់ត្រៀមខ្លួនធ្វើជាឪពុកម្ដាយ ល្អ៖
១. អ្នកត្រូវតែមានសេចក្ដីអត់ធ្មត់ជាងមុន
អ្នកត្រូវចងចាំថា នៅពេលដែលក្មេងៗចង់បានអ្វី ពួកគេតែងតែរំពឹងថា លោកអ្នកអាចនឹងផ្ដល់គ្រប់យ៉ាងឱ្យពួកគេបាន។ អ្វីដែលកូនរបស់អ្នកចង់បាន វាមិនប្រាកដថា លោកអ្នកអាចបំពេញ បំណងពួកគេគ្រប់យ៉ាងនោះឡើយ។
២. អ្នកត្រូវតែមានសណ្ដាប់ធ្នាប់ជាងមុន
នៅពេលដែលលោកអ្នកមិនទាន់មានកូន លោកអ្នកតែងតែមានពេលវេលាច្រើនសម្រាប់ខ្លួន ឯង ប៉ុន្តែក្រោយពេលដែលលោកអ្នកមានកូនហើយ លោកអ្នកត្រូវតែរៀបចំពេលវេលាលោកអ្នកឱ្យមានសណ្ដាប់ធ្នាប់ជាងមុន ដើម្បីឱ្យកូនៗរបស់លោកអ្នកមានពេលវេលាគ្រប់គ្រាន់។
៣. អ្នកត្រូវតែធ្វើការមានប្រសិទ្ធភាពជាងមុន
ភាពជាម្ដាយ និងភាពជាឪពុកគឺជាការងារពេញម៉ោង។ ដូច្នេះហើយការខិតខំប្រឹងប្រែងក្នុងការងាររបស់អ្នកត្រូវបន្ថែមឡើងទ្វេរដង បើប្រៀបធៀបទៅពេលដែលអ្នកមិនទាន់មានកូន។
៤. អ្នកត្រូវចេះគាំទ្រដល់កូនៗរបស់លោកអ្នក
ការដែលក្លាយទៅជាឪពុកម្ដាយគេអាចជាផលលំបាកមួយដ៏ធំ។ ដូច្នេះហើយសូមអ្នកព្យាយាម រៀនសូត្រអំពីរបៀបនៃការគាំទ្រកូនៗរបស់អ្នក ដែលអាចធានាបានថា ពួកគេនឹងក្លាយទៅជាមនុស្សល្អនៅក្នុងពេលអនាគត។
៥. អ្នកត្រូវតែចេះទទួលស្គាល់
បើសិនជាលោកអ្នកមិនទាន់ក្លាយទៅជាឪពុកម្ដាយគេទេ សូមផ្ដោតការយកចិត្តទុកដាក់ចំពោះការទទួលស្គាល់នូវការទទួលខុសត្រូវរបស់អ្នកចំពោះកូនៗរបស់អ្នក។
៦. អ្នកត្រូវតែមានទំនាក់ទំនងល្អ
ក្លាយជាឪពុកម្ដាយជោគជ័យឬអត់គឺពឹងផ្អែកលើទំនាក់ទំនងរបស់អ្នកជាមួយនឹងកូនៗ។ ការឃ្លាតឆ្ងាយពីកូនដោយសារបញ្ហាអ្វីមួយនោះ គឺជារឿងដែលលោកអ្នកគួរជៀសវាងឱ្យបាន។
៧. អ្នកត្រូវតែចេះគ្រប់គ្រងអារម្មណ៍
ភាពឆេវឆាវ ឆាប់ខឹងច្រើន មានះរឹងត្អឹង សុទ្ធតែជាអារម្មណ៍មួយដែលអ្នកអាចផ្ទេរដល់កូនអ្នក ពេលពួកគេធំឡើង។ ដូច្នេះសូមលោកអ្នកព្យាយាមគ្រប់គ្រងអារម្មណ៍របស់អ្នកឱ្យបានល្អ។
៨. អ្នកត្រូវតែមានទំនួលខុសត្រូវ
កាលអ្នកគ្មានកូន អ្នកមិនសូវមានការទទួលច្រើនឡើយ ប៉ុន្តែនៅពេលកូនៗរបស់អ្នកបានឃើញពន្លឺថ្ងៃហើយ បន្ទុកនៃការទទួលខុសត្រូវបានធ្លាក់មកលើអ្នកយ៉ាងច្រើន។ ដូច្នេះសូមអ្នកចងចាំក្នុងចិត្តផងថា ការចិញ្ចឹមកូនគឺអញ្ចឹងឯង។
៩. អ្នកត្រូវតែថែរក្សាសុខភាពរបស់អ្នក
អ្នកគួរតែកត់សម្គាល់ថា អ្នកគឺជាយានសម្រាប់ចម្លងកូនរបស់អ្នកដល់គោលដៅ។ ដូច្នេះការថែរក្សាសុខភាពឱ្យបានល្អ ជៀសវាងជំងឺតម្កាត់ធ្ងន់ៗទាំងឡាយ គឺជារឿងដ៏សំខាន់បំផុត។
១០. អ្នកត្រូវតែមានស្ថេរភាព
សូមអ្នកស្ថិតនៅលើគោលដៅចម្បងរបស់អ្នកឱ្យបានយូរបំផុត ដើម្បីឈានទៅដល់ការសម្រេចគោលដៅនោះ និងបានជាប្រយោជន៍ដល់កូនអ្នក។
ប្រែសម្រួលដោយ៖ ប៊ុន លាភ
ប្រភពៈ http://www.cool1007.com/
ដំណោះស្រាយបញ្ហាប្តីប្រពន្ធ
រឿងប្តីប្រពន្ធ ជារឿងធម្មតារបស់អ្នកគ្រប់គ្រងផ្ទះ ។ ព្រះអរិយបុគ្គល ២ ពួក គឺព្រះសោតាបន្ន និងព្រះសកទាគាមីដែលមិនបានបួស ក៏នៅគ្រប់គ្រងផ្ទះដែរ ។ បើប្តីប្រពន្ធជាទូទៅ មានកល្យាណសីល និងកល្យាណធម៌ហើយ គ្រួសារនោះឯង ក៏រមែងមាននូវសេចក្តីសុខតាមលោកិយវិស័យ ។
ជាធម្មតារបស់បុថុជ្ជន តែងមានល្អផង មិនល្អផង ព្រោះហេតុដូច្នេះ ទើបមានការអាក់អន់ចិត្តនឹងគ្នា ឬប៉ះខ្ទប់គ្នាដូចអណ្តាតនិងធ្មេញ ។ ប្តីប្រពន្ធដែលនៅជាមួយគ្នា មានសេចក្តីសុខ ឬមានទុក្ខនោះ វាអាស្រ័យហេតុ គឺស្នេហ៍ និង ស្នៀត ។
-ស្នេហ៍ គឺជាជ័រស្អិតធ្វើឲ្យប្តីប្រពន្ធស្រឡាញ់ ដូចជាពាក្យពីរោះ ពាក្យពិត និយាយក្នុងរឿងដែលគួរនិយាយ ស្លៀកពាក់តែងខ្លួនស្អាតបាត រៀបរយជានិច្ច ព្យាយាមក្នុងការងារដែលជាតួនាទីរបស់ខ្លួនជាដើម ។
ជាប្តីប្រពន្ធត្រូវធ្វើការដាំស្ល បោកគក់ខោអាវ បោសផ្ទះសម្បែង សម្អាតបន្ទប់ មិនហួងហែងហួសហេតុ មិនមានចិត្តចង្អៀតពេក មិនទាស់ទែងជាមួយញាតិមិត្តរបស់ប្តី គោរពប្រណិប័តន៍ចំពោះឪពុកម្តាយក្មេក និងប្តីជានិច្ច ចេះក្រែងចិត្តអ្នកដទៃ ស្មោះត្រង់ចំពោះប្តី ដាច់ខាតគឺកុំលេងល្បែងស៊ីសង និងត្រូវចេះដឹងក្នុងការចាយវាយជាដើម ។
ជាប្តីវិញ ត្រូវព្យាយាមធ្វើការរកទ្រព្យសម្បត្តិ វៀរចាកគ្រឿងញៀន អបាយមុខសព្វគ្រប់ ធ្វើខ្លួនឲ្យជាប្តីល្អ និងជាឪពុកល្អ ស្មោះត្រង់ព្រមដោយក្តីអាណិតចំពោះភរិយាខ្លួនរហូត យ៉ាងនេះជាដើមដែរ ។
ប្តីប្រពន្ធ ត្រូវសិក្សាឲ្យយល់ដល់ចិត្តគ្នាទៅវិញទៅមក ហើយព្យាយាមថ្នមចិត្តគ្នា ជាមនុស្សយល់ហេតុផង កុំចេះតែតាមចិត្តរបស់ខ្លួន ជាពិសេសត្រូវចេះនឹករលឹកដល់គុណ គឺ សេចក្តីល្អរវាងគ្នានឹងគ្នា ។
-ស្នៀត គឺជាល្បិចកិច្ចកល មាយាលាក់ពុត នាំឲ្យមាននូវអពមង្គល រហូតដល់ពេលជួបគ្នាមានតែជេរ ឬមុខក្រញូវ រអ៊ូរទាំដាក់គ្នា គេចមុខមិនចង់ជួបគ្នា មិនចង់ចូលផ្ទះ … ។
វិធីបដិបត្តិ
ជាដំបូង ត្រូវសង្កេតពិនិត្យខ្លួនឯងជាមុនថា ហេតុដែលកើតឡើងនេះ កើតមកពីអ្វី ? អ្នកណាជាអ្នកបង្កឡើង ? បើឃើញថាមកពីយើង ក៏ត្រូវព្រមទទួលនិងប្រញាប់សម្រេចចិត្តកែខៃឲ្យបានទាន់ពេល ។បើបញ្ហានោះ ទាក់ទងនឹងម្ខាងទៀត ក៏សូមឲ្យប្រឹក្សារកការដោះស្រាយ ម្នាក់ៗ ជាមនុស្ស គឺត្រូវតែជាអ្នកយល់ហេតុយល់ផល តែបើដោះស្រាយមិនបាន គឺអាចប្រឹក្សាជាមួយអ្នកចេះដឹងតទៅទៀត ។
ឧបសគ្គសំខាន់ ដែលធ្វើឲ្យប្តីប្រពន្ធបែកបាក់គ្នា ឬនៅជាមួយគ្នាមិនបានសុខ ក៏គឺទិដ្ឋិមានះ រឹងរូស ឃើញតែពីខ្លួនឯងពេករហូតដល់ខ្វះមេត្តា ខ្វះការប្រាថ្នាល្អដល់គ្នា ។
ម្យ៉ាងទៀត គឺការមិនចេះទទួលកំហុស ចេះទទួលត្រូវតែម្យ៉ាង ហើយច្រើនតែបន្ទោសអ្នកដទៃដែលខុសនោះមិនដា់ច់ពីមាត់ និយាយដដែលៗ បើខ្លួនឯងធ្វើខុសវិញមិនព្រមទទួលឡើយ ហើយបិទបាំងទៀតផង ។
ចំពោះបុថុជ្ជន ថាឲ្យធ្វើអ្វីមិនចេះខុសនោះគ្មានឡើយ លើកលែងតែមិនធ្វើអ្វីសោះ ឯការមិនធ្វើអ្វីសោះនោះ វាជាកំហុសមួយដោយឡែកផ្សេងទៀត ។វិស័យមនុស្សល្អ កាលបើធ្វើខុសហើយ រមែងទទួលកំហុស និងព្រមកែប្រែ មិនឲ្យខុសដដែលៗ ឡើយ ។
មនុស្សដែលធ្វើខុសហើយ មិនព្រមទទួលកំហុស ជាមនុស្សខូចសុខភាពផ្លូវចិត្ត នៅទីណា ជាមួយអ្នកណា ក៏ក្តៅក្រហាយទីនោះ ព្រោះបើមានកំហុសអ្វីមួយកើតឡើង ចេះតែបន្ទោសអ្នកដទៃប៉ុណ្ណោះ លុះដល់មានត្រូវ មានល្អវិញ ក៏ប្រញាប់ទទួលខ្លួនឯង មនុស្សប្រភេទនេះ មាននៅក្នុងគ្រួសារណា គ្រួសារនោះ រកសន្តិសុខបានដោយលំបាក ។
ព្រោះហេតុដូច្នោះ គូប្តីប្រពន្ធណាត្រូវការសេចក្តីសុខក្នុងការគ្រប់គ្រងផ្ទះរួមគ្នា ត្រូវបណ្តុះគុណធម៌ក្នុងការគ្រប់គ្រងផ្ទះ ឲ្យមានទៅវិញទៅមក យ៉ាងនេះ ជីវិតគូស្នេហ៍រមែងដើរទៅតាមផ្លូវ ដែលរោយទៅដោយត្របកផ្កាកុលាប ពោលគឺមង្គលជីវិតជាពិតប្រាកដហោង ។
គោលធម៌បដិបត្តិ
ត្រូវបដិបត្តិគោលធម៌ ៣ គឺត្រូវមានសីល ៥ ព្រមដោយកល្យាណធម៌ ត្រូវវៀរចាកអបាយមុខ ៦ យ៉ាង និងត្រូវមាននូវឃរាវាសធម៌ ៤ យ៉ាង ។ក្រុមទី ១
សីល ៥ ព្រមដោយកល្យាណធម៌ក្រុមទី ១ ត្រូវហ្វឹកហាត់ឲ្យបាន ៖
១. មិនសម្លាប់សត្វគ្រប់ជីវិតទាំងអស់ ហើយចម្រើននូវមេត្តាករុណាឲ្យដល់ព្រម ។
២. មិនធ្វើចោរកម្មគ្រប់យ៉ាង ហើយដល់ព្រមដោយការចិញ្ចឹមជីវិតដោយប្រពៃ ។
៣. មិនប្រព្រឹត្តខុសក្នុងកាម ដល់ព្រមដោយក្តីសន្តោស គឺព្រមល្មមចិត្តតែជាមួយនឹងគូគ្រងរបស់ខ្លួនប៉ុណ្ណោះ មាននូវកាមសំវរ គឺការសង្រួមក្នុងកាមគុណទាំងឡាយ ។
៤. មិននិយាយកុហក ព្រមទាំងមាននូវសច្ចៈ ។
៥.មិនបរិភោគទឹកស្រវឹងគ្រឿងញៀន អប់រំស្មារតីសេចក្តីមិនប្រមាទឲ្យដល់ព្រម ។
ក្រុមទី ២
អបាយមុខ ៦ យ៉ាងក្រុមទី ២ នេះ ត្រូវវៀរឲ្យបានជាដាច់ខាត ៖
១. សេពគ្រឿងញៀនស្រវឹងបំផ្លាញស្មារតី ។
២. ការប្រព្រឹត្តអនាចារក្នុងរឿងមេថុនធម្ម ។
៣. លេងល្បែងភ្នាល់ ។
៤. ដើរលេងមិនស្គាល់ពេលវេលា ។
៥. សេពគប់មនុស្សអាក្រក់ជាមិត្ត ។
៦. ខ្ជិលច្រអូសក្នុងការងារ ។
ក្រុមទី ៣
ឃរាវាសធម៌ ៤ យ៉ាងក្រុមទី ៣ នេះ គួរឲ្យមានជាប្រចាំចិត្ត ៖
១. សច្ចៈ ស្មោះត្រង់ពិតប្រាកដដល់គ្នា ។
២. ទមៈ ហ្នឹកហាត់ទូន្មានចិត្តរាល់ថ្ងៃ ។
៣. ខន្តិ ចេះអត់ធន់ តស៊ូមិនខ្លាចលំបាក ។
៤. ចាគៈ ចេះឲ្យទាន និងចេះលះបង់ ។
បើគ្រួសារណា ទាំងប្តី ទាំងប្រពន្ធបដិបត្តិបាននូវធម៌ ៣ ក្រុមនេះ គឺក្រុមទី ១ ហ្វឹកហាត់សម្រេចបាន ក្រុមទី ២ វៀរចាកបាន និងក្រុមទី ៣ កើតមានជាប្រចាំចិត្ត ជីវិតពិតជាមាននូវសេចក្តីសុខ តាមវិស័យរបស់បុថុជ្ជនដែលជាមនុស្សល្អ ។
សូមត្រួតត្រាពិនិត្យមើល តើអាត្មាអញបដិបត្តិមានការខ្វះខាតក្នុងធម៌៣ក្រុមនេះដែរឬទេ ឬក៏សង្កេតឃើញមានបញ្ហាចេញពីប្រភពផ្សេងទៀតដូចជា ៖
-ការរអ៊ូរទាំ និយាយច្រើន
ចំណុចនេះដោយច្រើនគឺមាននៅលើស្ត្រីជាភរិយា ឬជាមាតា ចំណែកបុរសជាស្វាមី ឬជាបិតាក៏មានដែរ តែតិចតួចទេ ។ ដើមហេតុព្រោះមនុស្សក្នុងផ្ទះមិនរួមដៃជួយ អ្វីៗ ត្រូវធ្លាក់មករកតែម្នាក់ ទាំងការក្រៅ ការក្នុង ដោះស្រាយមិនចេញកើតរោគសរសៃប្រសាទ ។
ដំណោះស្រាយ
ទាំងម៉ែទាំងឪទាំងកូន ត្រូវរួមដៃគ្នា អ្វីគួរជួយបានធ្វើបាន ក៏ជួយទៅធ្វើទៅ ។ មេផ្ទះដែលឆ្លាត មិនត្រូវចងការងារក្នុងផ្ទះសម្រាប់តែខ្លួនឯង អ្នកណាៗ ធ្វើមិនត្រូវចិត្តនោះទេ គួរបង្រៀនកូនៗ ឲ្យចេះដឹង ហើយឲ្យកូនធ្វើនូវកិច្ចការនោះជំនួសខ្លួន ។គ្រប់គ្នាត្រូវយល់ដឹងថា ការងារអ្វីក៏ដោយ បើយើងធ្វើទៅហើយមានផលឲ្យបានសុខទាំងអស់គ្នា ការងារនោះយើងត្រូវរីករាយនឹងធ្វើ ព្រោះជាបុណ្យក្នុងជីវិតប្រចាំថ្ងៃ ។
-ការធ្វើអ្វីស្រេចតែចិត្តខ្លួនឯង
ចំណុចនេះ គឺចូលចិត្តធ្វើអ្វីផ្តាច់ការ មិនប្រឹក្សាគ្នាជាមុន ។ ប្តីប្រពន្ធ ទោះបីថាមានរូបរាងផ្សេងគ្នាតែគួរមានបេះដូងជាមួយគ្នាទើបក្នុងផ្ទះមានសន្តិសុខ។ ប្តីប្រពន្ធត្រូវតែជាមនុស្សយកហេតុផលជាសំខាន់ កុំធ្វើអ្វីៗ ស្រេចតែចិត្តចង់ កុំអាងខ្លួនឯងឲ្យជ្រុល ពិតមែនតែមិនបានធ្វើឲ្យគ្រួសារបែកបាក់គ្នា តែត្រូវដេកបែរខ្នងដាក់គ្នា ព្រោះហេតុមិនសប្បាយចិត្ត ។
ដំណោះស្រាយ
ត្រូវគ្រប់គ្រងចំណង់ មុនធ្វើឬនិយាយ ត្រូវមានសតិនិងបញ្ញាគ្រប់គ្រងជានិច្ច ត្រូវចេះក្រែងចិត្ត ក្រែងរឿង អ្វីដែលរង្កៀសហើយត្រូវកុំធ្វើកុំនិយាយ ត្រូវលះទិដ្ឋិមានះ និងឧបានទានចេញពីចិត្ត ដោយយកហេតុផល និងភាពត្រឹមត្រូវជាគោលបដិបត្តិ ។( មេរៀនជីវិត )
ប្រភពៈ http://www.5000-years.org/
បុគ្គលជោគជ័យ និងបរាជ័យខុសគ្នាអ្វីខ្លះ សូមមើលចំណុចទាំង ១០នេះ!
មានមនុស្សមិនតិចទេ នៅលើភពផែនដីនេះ អាចនិយាយបានថា ភាគច្រើនបានបរាជ័យក្នុងជីវិតរបស់ខ្លួន ហើយលាចាកទៅវិញដោយភាពស្តាយក្រោយ ទាំងមិនអស់ចិត្ត និងមិនបានបន្សល់ទុកអ្វីសោះនោះឡើយដល់មនុស្សជំនាន់ក្រោយ។
ប្រិយមិត្តអាចសង្កេត បានពីភាពខុសគ្នារវាងបុគ្គលជោគជ័យ និង បុគ្គលបរាជ័យត្រង់ថា បុគ្គលជោគជ័យឲ្យនាំមកនូវសមិទ្ធផលល្អៗសម្រាប់ខ្លួនឯង និងអ្នកដទៃមានដូចជា ទ្រព្យសម្បតិ្ត សុភមង្គល ឬ ចែករំលែកទស្សនៈ មានតម្លៃយ៉ាងមហាសាលរាប់មិនអស់ដល់មនុស្សជុំវិញខ្លួន។
ចុះបុគ្គលបរាជ័យ វិញមានអ្វីខ្លះទៅ? នេះហើយជាមូលហេតុដែល The BNEWS លើកយកសញ្ញាណសំខាន់ៗចំនួន ១០ នៃភាពខុសគ្នារវាងបុគ្គលជោគជ័យ និងបុគ្គលបរាជ័យមកចែកជួនប្រិយមិត្តស្វែងយល់ដូចខាងក្រោមនេះ៖
១) បុគ្គលជោគជ័យទទួលយកការផ្លាស់ប្ដូរ តែបុគ្គលបរាជ័យភ័យខ្លាចការផ្លាស់ប្ដូរ
គេហាក់សម្លឹងមើលមិនឃើញឡើយដែលថា បុគ្គលជោគជ័យភ័យខ្លាចការផ្លាស់ប្ដូរ។តាមពិត បុគ្គលប្រភេទនេះបានយល់ខ្លួនឯងរួចស្រេចទៅហើយថា គ្មានអ្នកណាម្នាក់អាចគេចចេញពីការផ្លាស់ប្ដូរបានឡើយ។ បរាជ័យ ការបាត់បង់វត្ថុដែលខ្លួនស្រលាញ់ ភាពទុក្ខព្រួយ សប្បាយ សេចក្តី ស្លាប់ ឬ ត្រៀមខ្លួនទទួលយកអ្វីដែលថ្មីៗ គឺជាអ្វីដែលមនុស្សគ្រប់រូបជួបប្រទះ។ ប៉ុន្តែ មានតែមនុស្សល្ងង់ និង មនុស្សបរាជ័យទេដែលភ័យខ្លាចបញ្ហាទាំងនេះជាទីបំផុត។
២) បុគ្គលជោគជ័យចង់ឲ្យអ្នកដទៃជោគជ័យដូចខ្លួន តែបុគ្គលបរាជ័យចង់ឲ្យអ្នកដទៃបរាជ័យដូចខ្លួនដែរ
ចំណុចដែលជាទម្លាប់អាក្រក់មួយទៀតរបស់មនុស្សបរាជ័យ គឺការបន់ស្រន់ ឬ រង់ចាំឲ្យអ្នកដទៃបរាជ័យដូចខ្លួនដែរ។ ព្រោះហេតុអ្វី? ព្រោះថា បុគ្គលបរាជ័យមិនចូលចិត្តធ្វើអ្វីឲ្យកើតចេញជាដុំកំភួននោះឡើយ ហើយចូលចិត្តចំណាយពេលឥតប្រយោជន៍ដូចបំពង់រង់ចាំទឹកភ្លៀង។ សម្រាប់បុគ្គលជោគជ័យវិញ នេះគឺជាទម្លាប់ដ៏គួរឲ្យស្អប់ខ្ពើមដែលមិនគូរមានវត្តមាននៅក្នុងសង្គមមនុស្សនោះឡើយ ត្បិតអីបុគ្គលជោគជ័យ មិនត្រឹមតែបានធ្វើឲ្យខ្លួនឯងឲ្យជោគជ័យប៉ុណ្ណោះទេ ថែមទាំងជួយឲ្យអ្នកដទៃជោគជ័យដូចខ្លួនផងដែរ។
៣) មនុស្សជោគជ័យទទួលខុសត្រូវលើការបរាជ័យរបស់ខ្លួន តែមនុស្សបរាជ័យទម្លាក់កំហុសការបរាជ័យរបស់ខ្លួនលើអ្នកដទៃ
ទំនួលខុសត្រូវរបស់បុគ្គលជោគជ័យ ធ្វើឲ្យគេនឹកឃើញដល់បុគ្គលម្នាក់ទៀត នោះគឺភាពជាអ្នកដឹកនាំ ព្រោះថាអ្នកដឹកនាំគឺជាមនុស្សដែលមានទំនួលខុសត្រូវខ្ពស់គ្រប់ភារកិច្ច ឬ លទ្ធផលអវិជ្ជមានដែលកើតចេញពីសកម្មភាព និង មនុស្សក្រោមបង្គាប់របស់ខ្លួន។ ផ្ទុយពីមនុស្សបរាជ័យដែលចូលចិត្តទម្លាក់កំហុសដល់អ្នកដទៃ បុគ្គលជោគជ័យតែងលើកយកដំណោះស្រាយធ្វើជាស្ពាន ត្រួសត្រាយផ្លូវដល់មនុស្សគ្រប់គ្នាឲ្យមានមុខមាត់ងើបឡើងវិញបាន។
៤) បុគ្គលជោគជ័យរិះរកគំនិតល្អៗសម្រាប់ខ្លួនឯង តែបុគ្គលបរាជ័យរិះរកគំនិតអាក្រក់ៗរិះគន់អ្នកដទៃ
តើលោកអ្នកធ្លាប់អង្កេតដែរទេថា មានមនុស្សមួយចំនួនគ្មានការងារធ្វើយករឿងអ្នកដទៃមកនិយាយ និងរិះគន់ពីនេះពីនោះឥតសំចៃមាត់ ហើយថែមទាំងដេកចាំមើលទង្វើរបស់អ្នកដទៃទៀតផង។ នេះហើយជាសញ្ញាណមួយរបស់មនុស្សបរាជ័យ។ ងាកមកមើលមនុស្សជោគជ័យវិញ សកម្មភាពទាំងនេះគ្មានប្រយោជន៍អ្វីសោះឡើយ តែការដែលរិះរកគំនិតល្អៗជាបំណិនជីវិតទើបជារឿងមួយដែលពួកគេត្រូវធ្វើដោយគ្មានពេលកំណត់នូវអ្វីដែលបុគ្គលប្រភេទនេះយល់ថា អាចធ្វើឲ្យពិភពលោកផ្លាស់ប្ដូរបាន។
៥) បុគ្គលជោគជ័យមានគម្រោងសម្រាប់ជីវិត តែបុគ្គលបរាជ័យគ្មានគម្រោងសម្រាប់ជីវិតនោះឡើយ
វាមិនមែនជារឿងចៃដន្យនោះទេ ដែលបុគ្គលមួយចំនួនបានជោគជ័យស្របតាមគោលដៅរបស់ខ្លួន ព្រោះថាបុគ្គលប្រភេទនេះមិនងាយនឹងងាកចេញពីផែនទីជីវិតរបស់ខ្លួនដែលបានគូសវាសយ៉ាងល្អិតល្អន់នោះឡើយ។ បុគ្គលជោគជ័យដឹងថា ការគូសវាសផែនទី ឬ គម្រោងជាមុនសម្រាប់ខ្លួនឯងដែលត្រូវធ្វើ នោះហើយគឺជាវិថីឆ្ពោះទៅរកជីវិតដ៏ភ្លឺស្វាងបាន។ តែគួរឲ្យស្តាយបុគ្គលមួយចំនួនបានបរាជ័យ ឬ មិនបានទៅដល់គោលដៅរបស់ខ្លួនសុខចិត្តបណ្តែតបណ្តោយឲ្យជីវិតរសាត់អណ្ដែតគ្មានកោះត្រើយ ហើយទីបំផុតខ្សែជីវិតរបស់ខ្លួនប្រៀបដូចជាបញ្ញើក្អែក។
៦) បុគ្គលជោគជ័យមានសុទិដ្ឋិនិយមជានិច្ច តែបុគ្គលបរាជ័យមានទុទ្ទិដ្ឋិនិយមចំពោះខ្លួនឯង និង អ្នកដទៃ
ពិតជាមានរឿងរ៉ាវមិនចេះអស់មែនចំពោះបុគ្គលបរាជ័យ ព្រោះថាក្នុងបេះដូងរបស់ពួកគេ ហាក់មើលឃើញខ្លួនឯង ឬ អ្នកដទៃក្នុងផ្លូវអវិជ្ជមានជានិច្ច។ បើដូច្នេះមាន តើនៅពេលណាទើបខ្លួនឯងអាចចាកចេញពីការបរាជ័យបានទៅ? ពិតមែនហើយសម្រាប់បុគ្គលជោគជ័យបានយល់យ៉ាងច្បាស់ថា ការគិតក្នុងផ្លូវវិជ្ជមានចំពោះខ្លួនឯងនិង មនុស្សនៅជុំវិញខ្លួននឹងធ្វើឲ្យអ្វីៗនៅលើពិភពលោកនេះ អាចឆ្ពោះទៅរកភាពវិជ្ជមានបានដូចគ្នាដែរ។ ផ្ទុយទៅវិញគំនិតទុទ្ទិដ្ឋិនិយម គឺជាអ្វីដែលបុគ្គលប្រភេទនេះមិនយកចិត្តទុកដាក់ ព្រោះវានាំតែខាតបង់ពេលវេលាឥតប្រយោជន៍ និង ធ្វើឲ្យខ្លួនមានអារម្មណ៍ថា មិនមែនតម្លៃសម្រាប់មនុស្សគ្រប់គ្នាទៀតផង។
៧) បុគ្គលជោគជ័យបន្តការរៀនសូត្រដោយឥតឈប់ឈរ តែបុគ្គលបរាជ័យបន្តបោះបង់ឥតឈប់ឈរ
បុគ្គលជោគជ័យបានយល់ថា ចង់ឲ្យជោគជ័យវាជារឿងមួយលំបាកទៅហើយ តែរឿងដែលលំបាកជាងនេះទៅទៀតនោះគឺថា តើត្រូវរក្សាភាពជោគជ័យបានដោយរបៀបណា? នេះហើយជាសំនួរមួយដែលបុគ្គលជោគជ័យត្រូវស្វែងរកចម្លើយមួយយ៉ាងពិតប្រាកដ។ ផ្លូវមួយដែលជាគន្លឹះដល់ល្អនៅពេលនេះគឺការបន្តការរៀនសូត្រដោយឥតឈប់ឈរទោះបីជាដល់វិនាទីចុងក្រោយក៏ដោយ ត្បិតអីខ្លួនយល់ថា នេះនឹងជាឱកាសនាំឲ្យមានការអភិវឌ្ឍខ្លួនឯងកាន់តែប្រសើរឡើង ដែលផ្ទុយពីមនុស្សជោគជ័យចូលចិត្តកំណត់ចំណេះដឹងរបស់ខ្លួនដោយការបោះបង់ និង យកលេសមិនចេះចប់មិនចេះហើយ។
៨) បុគ្គលជោគជ័យសរសើរអ្នកដទៃ តែបុគ្គលបរាជ័យរិះគន់អ្នកដទៃ
ក្នុងទីផ្សារអាជីវកម្មក្តី ការទំនាក់ទំនងប្រចាំថ្ងៃក្តី ការលើកដំកើង ឬ កោតសរសើរអ្នកដទៃពីសមិទ្ធផលរបស់ពួកគេ គឺជាអាវុធដ៏មានថាមពលមួយរបស់បុគ្គលជោគជ័យ។ វាជាអាវុធត្រជាក់សណ្ដំចិត្តឲ្យមនុស្សជុំវិញខ្លួនស្រលាញ់ និងរាប់អាន ព្រមទាំងធ្វើឲ្យសម្ព័ន្ធភាពទំនាក់ទំនងកាន់តែប្រសើរឡើងគ្មានដែនកំណត់។ ទោះបីជាយ៉ាងណាក៏ដោយ ងាកមកមើលបុគ្គលបរាជ័យវ័យ ទោះបីជាអ្នកណាម្នាក់ជោគជ័យ ឬ បង្ហាញសមិទ្ធផលយ៉ាងអស្ចារ្យយ៉ាងណាក៏ដោយ ក៏ខ្លួនគ្មានអ្វីក្រៅតែពីការរិះគន់ពីនេះពីនោះហើយបើបុគ្គលណាម្នាក់បរាជ័យ ឬ មានកំហុសអ្វីនោះគឺច្បាស់ជាជាន់ពន្លិចបន្ថែមជាមិនខាន។
៩) បុគ្គលជោគជ័យលើកលែងទោសឲ្យអ្នកដទៃ បុគ្គលបរាជ័យចងគំនុំនឹងអ្នកដទៃ
វាមិនខុសអ្វីពីពុទ្ធិការដែលព្រះអង្គមានបន្ទូលថា”កាំរម្ងាប់ដោយការមិនចងពៀរ” នោះឡើយ ដែលបុគ្គលជោគជ័យយល់ឃើញថា នឹងអាចរំដោះខ្លួនឲ្យជៀសផុតពីទុក្ខទោស និង គំនុំគំកួនទៅវិញទៅមក។ ការលើកលែងទោសរបស់ពួកគេទៅកាន់អ្នកណាម្នាក់ នឹងបញ្ចប់កំហុសមួយដោយសន្តិភាព ហើយជាផ្លូវដ៏ប្រសើរធ្វើឲ្យស្ថានការណ៍ដ៏អាប់អួរបែរមករកភាពស្រស់ថ្លាឡើងវិញ។ និយាយពីបុគ្គលបរាជ័យវិញ ការសងសឹកមិនព្រមលើកលែងទោសដល់អ្នកដទៃនោះហើយជាវិធីសាស្ត្រជួសជុលផ្លូវអារម្មណ៍របស់ខ្លួនឡើងវិញ តែទីបំផុតមានតែភាពក្តៅក្រហាយ និង ការស្អប់ខ្ពើមតែប៉ុណ្ណោះ។
១០) បុគ្គលជោគជ័យអរគុណអ្វីៗគ្រប់យ៉ាងដែលខ្លួនមាន តែបុគ្គលបរាជ័យចាត់ទុកថាអ្វីៗគឺអយុត្តិធម៌ទាំងអស់
ភាពទុក្ខសោក ការខកចិត្ត ភាពសប្បាយរីករាយ ភាពជោគជ័យ សមិទ្ធផល ទាំងបទពិសោធន៍ល្អក្តី អវិជ្ជមានក្តី គឺជាអ្វីដែលបុគ្គលជោគជ័យអរគុណគ្រប់ពេលវេលា ត្បិតអីចំណុចទាំងអស់នេះគឺជាមេរៀនជីវិតដ៏ថ្លៃថ្លារបស់ពូកគ។ បុគ្គលប្រភេទនេះយល់ថា ជីវិតមួយនឹងគ្មានតម្លៃបើគ្មានឧបសគ្គ ព្រោះថា ឧបសគ្គ និង បទពិសោធន៍ទាំងឡាយសុទ្ធតែបានធ្វើឲ្យពួកគេរឹងមាំមកដល់សព្វថ្ងៃនេះ។ មហាសេដ្ឋី អ្នកជំនួញ បុគ្គលជោគជ័យនៅលើលោកសុទ្ធតែឆ្លងកាត់ឧបសគ្គរាប់មិនអស់ តែពួកគេនៅតែអរគុណជានិច្ច។ចុះបុគ្គលបរាជ័យវិញយ៉ាងម៉េចដែរ? និយាយឲ្យខ្លី បុគ្គលមួយចំនួនបរាជ័យដោយសារមិនរៀនសូត្រពីបទពិសោធន៍ទាំងនេះ និង ខ្វះការតស៊ូ ហើយកាន់តែគ្រោះថ្នាក់ទៀតនោះ គឺការមើលឃើញជាអវិជ្ជមានលើអ្វីៗជុំវិញខ្លួន ដែលជាហេតុធ្វើឲ្យពួកគេមិនស្គាល់រស់ជាតិជីវិតដ៏មានតម្លៃបាន៕
ប្រែសម្រួល៖ ខេវិន
ប្រភពៈ http://www.thebnews.com/
នាយកប្រតិបត្តិដែលទទួលបានប្រាក់បៀវត្សខ្ពស់បំផុតនៅអាមេរិកជាង ២៨៥ លានដុល្លារក្នុងមួយឆ្នាំមានទម្លាប់ធ្វើអ្វីខ្លះរាល់ថ្ងៃ?
លោក Nick Woodman ជាស្ថាបនិក និងជានាយកប្រតិបត្តិក្រុមហ៊ុន GoPro ដែលជាក្រុមហ៊ុនដ៏ល្បីល្បាញនៅសហរដ្ឋអាមេរិក និងជំនាញខាងផលិតកាមេរ៉ាថតវីដេអូ (camcorder) និងមានកម្រិតរូបភាពភ្លឺច្បាស់ត្រជាក់ភ្នែកកម្រិត HD (High Definition) ដែលមានន័យថាកម្រិតរូបភាពច្បាស់និងម៉ត់។
ក្នុងចំណោមនាយកប្រតិបត្តិក្រុមហ៊ុនទូទាំងសហរដ្ឋអាមេរិក មហាសេដ្ឋីវ័យ ៤០ឆ្នាំរូបនេះ ទទួលបានប្រាក់បៀវត្សខ្ពស់ជាងគេកាលពីឆ្នាំ២០១៤ រហូតដល់ ២៨៥,៥ លានដុល្លារក្នុងមួយឆ្នាំ។ លោកជាបុគ្គលដែលខុសប្លែកពីនាយកប្រតិបត្តិដទៃទៀត ព្រោះលោកមានអាកប្បកិរិយាប្លែកពីអ្នកដទៃ និងចូលចិត្តប្រព្រឹត្តទង្វើប្លែកៗ។ ពេលខ្លះ ធ្វើឲ្យអ្នកផងទាំងពួងហួសចិត្ត ព្រោះមិននឹកស្មានដល់។ ខាងក្រោមនេះជាលក្ខណៈពិសេសៗ ដែលលោកតែងតែអនុវត្តប្រចាំថ្ងៃ។
ក្រុមហ៊ុន GoPro ដែលមានលោក Woodman ជាស្ថាបនិក និងជានាយកប្រតិបត្តិនោះ កាលពីពេលចាប់ផ្ដើមបើកក្រុមហ៊ុនដំបូង មានបុគ្គលិកតែប្រាំបីនាក់ប៉ុណ្ណោះ។ កាលពីដំបូងឡើយ ក្រុមហ៊ុនលក់ខ្សែកាមេរ៉ា។ ក្រោយមក ក្រុមហ៊ុនក៏បានពង្រីកសង្វាក់ផលិតកម្មរបស់ខ្លួន រហូតដល់ផលិតជាតួកាមេរ៉ា។ ក្រោយមក បុគ្គលិកបានកើនដល់ ៨០០ នាក់។ GoPro បានពង្រីកខ្លួនទៅជាក្រុមហ៊ុនខ្នាតមធ្យម ហើយលែងមានឈ្មោះតូចកំប៉ិកកំប៉ុកតទៅទៀតហើយ។
ជាមួយនឹងទ្រព្យសម្បត្តិប្រមាណ ២,៣ ពាន់លានដុល្លារ លោក Woodman បានរៀបរាប់អំពីការងារប្រចាំថ្ងៃរបស់លោកយ៉ាងដូច្នេះថា៖ ព្រលឹមឡើង កូនរបស់លោកដាស់លោកពីដំណេក។ បន្ទាប់មក លោកលេងកីឡាវាយកូនឃ្លីផ្ទប់ជញ្ជាំងជាមួយកូនៗរបស់លោក។ លោកប្រាប់ថាលោកផ្ដល់អាទិភាព និងបម្រុងទុកពេលមួយព្រឹកពេញ សម្រាប់ការស្ថិតនៅជួបជុំភរិយា និងកូនៗជាទីស្រឡាញ់។ ដូចនេះ លោកចំណាយពេលពេញមួយព្រឹកនៅជាមួយក្រុមគ្រួសារ ដោយមិនទាន់ទៅកន្លែងធ្វើការទេ។
លោកឆ្លៀតពេលដ៏មមាញឹក ដើម្បីដឹកកូនទៅសាលា ព្រោះបើមិនឆ្លៀតពេលទេ លោកមិនអាចឆ្លៀតឱកាសនៅជួបជុំគ្រួសារបានយូរទេ។ ប្រការសំខាន់នៅត្រង់ថា នៅពេលលោកចូលទៅដល់កន្លែងធ្វើការ គឺលោកជ្រមុជតែរឿងធ្វើការតែមួយមុខគត់ ហើយមិនរវល់រឿងផ្សេងទេ។ មានន័យថា នៅពេលលោកបំពេញកិច្ចការអ្វីមួយ លោកត្រូវតែធ្វើរហូតដល់ចប់ចុងចប់ដើម ទើបលោកទៅផ្ទះ។ ពេលខ្លះ លោកនៅកន្លែងធ្វើការដល់យប់ជ្រៅ សូម្បីអាហារពេលក្បាលព្រលប់ (dinner) ក៏មិនបានបរិភោគជុំគ្នាជាមួយគ្រួសារផង ព្រោះខំប្រញឹកដៃឲ្យចប់ការងារនៅកន្លែងធ្វើការសិន។
នៅកន្លែងធ្វើការ លោកផ្ដោតតែទៅលើមុខជំនាញដែលលោកចេះស្ទាត់ និងដែលជាចំណង់ចំណូលចិត្តរបស់លោក។ មានន័យថាលោកធ្វើការងារណាដែលលោកសប្បាយចិត្តនឹងធ្វើ។ ឧទាហរណ៍ការងារខាងវិស័យផលិតកម្ម – ខាងវិស័យរកទីផ្សារ (marketing) – និងការរៀបចំទស្សនវិស័យ និងយុទ្ធសាស្ត្ររយៈពេលខ្លី និងរយៈពេលវែងនៅក្នុងក្រុមហ៊ុនរបស់លោក។
លោក Woodman មានប្រសាសន៍ថាការងាររបស់លោកពេលខ្លះស្មុគស្មាញ និងពេលខ្លះសាមញ្ញធម្មតា។ ជារៀងរាល់ថ្ងៃ លោកត្រូវអង្គុយស្ដាប់ និងពិភាក្សាគ្នាជាមួយបុគ្គលិកដទៃទៀត ឬអ្នកមកពីខាងក្រៅ ដែលមានគំនិតប្លែកៗ ដែលស្ដាប់គំនិតរបស់គេទៅ សឹងមិនជឿថាវាអាចក្លាយជាការពិតបាន។ ប៉ុន្តែនៅទីបំផុត ក្រុមការងាររបស់លោកអាចធ្វើឲ្យក្ដីស្រមៃក្លាយជាការពិត។ ឧទាហរណ៍ លោកអង្គុយស្រមើស្រមៃជាមួយអ្នកបច្ចេកទេសខាងវិស័យផលិតកម្ម និងអ្នកជំនាញខាងរចនា និងគូសវាសម៉ូត (អ្នក design) រហូតដល់បានជាផលិតផលសម្រេច។
ពេលបំពេញការងារប្រចាំថ្ងៃរួចរាល់ លោកក៏ត្រូវថមថយថាមពលមួយផ្នែកធំ ព្រោះហត់នឿយនឹងការងារ។ ការងាររបៀបនេះ ត្រូវការប្រើថាមពលខួរក្បាលច្រើន។ ដូច្នេះ ទៅដល់ផ្ទះភ្លាម បន្ទាប់ពីងូតទឹកជម្រះកាយ និងទទួលទានអាហារបន្តិចបន្តួចរួចរាល់ លោកក៏ប្រាសខ្លួនគេង៕
ប្រែសម្រួល ៖ អន សំអាង
ប្រភពៈ http://www.thebnews.com/
Sunday, July 19, 2015
មេរៀនជីវិត១៥ ចំណុចដែលលោកគួររៀន មុនឈានចូលដល់អាយុ ៣០
នៅពេលដែលអ្នកឈានចូលដល់វ័យ ៣០ ឆ្នាំ អ្នកអាចនឹងនាំយកទៅជាមួយនូវភាពជោគជ័យមួយចំនួនដែលអ្នកធ្លាប់ឆ្លងកាត់មុនពេលអ្នកឈានចូលដល់វ័យនេះ ។ ដូច្នេះដើម្បីទទួលបានជោគជ័យនៅមុនពេលអ្នកឈានចូលដល់វ័យនេះ តើអ្នកត្រូវដឹងនិងរៀនអ្វីខ្លះ ? ខាងក្រោមនេះជាចំណុចទាំង ១៥ ដែលអ្នកត្រូវស្វែងយល់ ។
១) មានការអប់រំល្អប្រសើរជាងមានសញ្ញាប័ត្រ
អ្នកត្រូវដឹងថាទទួលបានការអប់រំពីសាលារៀនជាមួយនឹងសញ្ញាប័ត្រដែលអ្នកទទួលបានមិនប្រាកដពិតជាអាចធ្វើឲ្យអ្នកជោគជ័យនោះទេ ព្រោះការអប់រំក្នុងសាលាមានដែនកំណត់។ ប៉ុន្តែសម្រាប់ការអប់រំក្នុងជីវិតជាក់ស្តែងវិញគ្មានដែនកំណត់នោះទេ ហើយការអប់រំប្រភេទនេះអាចនាំអ្នកកាន់កាន់ភាពជោគជ័យនូវអ្វីដែលអ្នកចង់បាន ។
២) មានលុយមិនអាចដោះស្រាយគ្រប់បញ្ហាបានទេ
បញ្ហានៅក្នុងជីវិតជាក់ស្តែងដែលកើតឡើងគឺមិនអាចដោះស្រាយដោយលុយបានទាំងអស់នោះទេ ប៉ុន្តែតែគ្រាន់ថាមានលុយអាចផ្តល់ជម្រើសច្រើនដល់អ្នក ។ សុភមង្គលគ្រួសារ ការងារដែលជាចំណូលចិត្ត និងមិត្តភក្តិស្មោះត្រង់គឺមិនអាចប្រើលុយដើម្បីនាំយកមកនោះទេ ។
៣) អ្នកត្រូវដឹងថាពេលវេលាសុទ្ធតែមានកំណត់
ពេលវេលាទាំងអស់នៅលើពិភពលោកដែលដើរទៅមុខគឺជារបស់មួយដែលអ្នកមិនអាចធ្វើឲ្យវានៅនឹងមួយកន្លែងដើម្បីចាំអ្នកនោះទេ ។ ប៉ុន្តែអ្នកត្រូវតែធ្វើឲ្យពេលវេលាទាំងនោះមានតម្លៃគ្រប់វិនាទីទាំងអស់ សម្រាប់ជីវិតរបស់អ្នក ។
…បើអនុវត្តតាមគោលការណ៍ចំនួន ៩នេះ នឹងអាចជួយឲ្យលោកអ្នកក្លាយជាអ្នកមានមុនអាយុ៣០បាន…
៤) ត្រូវដឹងថាទស្សនៈ អ្នកដទៃមកលើខ្លួនអ្នកមិនមែនជាបញ្ហានោះឡើយ
ការដឹកនាំជីវិត និងគ្រប់គ្រងលើផ្លូវដើរទៅថ្ងៃមុខដោយខ្លួនឯងគឺជារឿងប្រសើបំផុតសម្រាប់មនុស្សគ្រប់រូប ជាជាងឲ្យអ្នកដ៏ទៃមកកំណត់គោលដៅជីវិត និងជាអ្នកសម្រេចចិត្តជំនួសអ្នក ។
៥) ពេញចិត្តចំពោះអ្វីដែលខ្លួនមាន
នៅពេលដែលអ្នកកាន់តែធំ និងឈានចូលវ័យកាន់តែចាស់អ្នកនឹងដឹងខ្លួនថាអ្នកជាមនុស្សដែលអាចធ្វើអ្វីៗដោយខ្លួនឯងដោយមិនងាយឲ្យអ្នកផ្សេងមករារាំងអ្នកបាន ។ ភាពលំបាកទាំងឡាយក៏ចូលមកក្នុងជីវិតរបស់អ្នក ដែលអាចធ្វើឲ្យអ្នកកាន់តែឲ្យតម្លៃចំពោះអ្វីដែលខ្លួនមានកាន់តែខ្លាំង ។
៦) អោយតម្លៃលើក្រុមគ្រួសារ
នៅពេលដែលអ្នកធំឡើងអ្នកនឹងដឹងថាគ្រួសារមានតម្លៃជាងអ្វីៗទាំងអស់ ព្រោះថានៅពេលដែលអ្នកប្រព្រឹត្តកំហុសធំប៉ុណ្ណាក៏ដោយ ក៏ពួកគេតែងតែអត់ទោសឲ្យអ្នកជានិច្ច ។
៧) អ្នកត្រូវយល់ពីសារៈសំខាន់នៃការអភ័យទោស
អ្នកត្រូវតែជាមនុស្សដែលមានហេតុផលច្រើនដើម្បីបញ្ចៀសនូវរឿងទាំងឡាយដែលធ្វើឲ្យអ្នកឈឺចាប់រសាយចេញពីចិត្ត ។ ដូច្នេះអ្នកត្រូវដឹងថាការអត់អោននិងការភ័យទោសគឺជារឿងមានតម្លៃបំផុតដែលមនុស្សគ្រប់រូបពិបាកនឹងធ្វើ ។
៨) គោលដៅជីវិត ពិតជាមិនអាចកើតឡើងតាមការគ្រោងទុក
នៅពេលដែលអ្នកនៅវ័យក្មេងអ្នកតែងមានការរំពឹងខ្ពស់ក្នុងការធ្វើអ្វីមួយ ប៉ុន្តែនៅពេលដែលអ្នកឈានចូលវ័យកាន់តែចាស់ អ្នកនឹងអាចដឹងថាភាពជោគជ័យដែលអ្នកចង់បានទាំងនោះមិនមែនសុទ្ធតែអាចកើតឡើងតាមពេលវេលាដែលអ្នកគ្រោងទុកនោះទេ ។
៩) អ្នកមិនអាចផ្លាស់ប្តូអ្វីមួយបានដោយសារតែការព្រួយបារម្ភនោះឡើយ
ការព្រួយបារម្ភពីអ្វីមួយមិនអាចជួយផ្លាស់ប្តូអនាគតបានទេ ប៉ុន្តែការប្រឈមមុខជាមួយបញ្ហាទើបជាដំណោះស្រាយ ដូចជាការលើកទឹកចិត្ត និង ជាការផ្តល់ក្តីសង្ឃឹម ។
១០) រៀនឲ្យទស្សនៈពីភាពជោគជ័យដោយខ្លួនឯង
នៅពេលដែលអ្នកឈានចូលវ័យ ៣០ ឆ្នាំ អ្នកនឹងមាននិយមន័យផ្សេងៗទៅលើភាពជោគជ័យ ដោយអ្នកនឹងយល់ថាវាមិនអាចកើតឡើងដោយសារលុយប៉ុណ្ណោះទេ ដោយផ្នែកខ្លះអាចកើតឡើងទំនាក់ទំនងមិត្តភក្តិ ក្រុមគ្រួសារ និងការមានសន្តិភាពផ្ទាល់ខ្លួន ។
…នៅអាយុក្រោម ៣០ លោកអ្នកគួរតែចំណាយពេលឲ្យមានតម្លៃ វិនិយោគលើបំណងប្រាថ្នា ៥ យ៉ាងនេះ…
១១) មិនត្រូវគិតពីខ្លួនឯងនោះទេ
អ្នកត្រូវស្វែងយល់ពីមូលហេតុថាហេតុអ្វីអ្នកមិនគួរអាត្មានិយមចំពោះខ្លួនឯង ហើយអ្នកត្រូវតែរៀនបើកចិត្តឲ្យទូលាយនិងបង្ហាញទស្សនៈរបស់អ្នកមកក្រៅ និងរៀនសម្របខ្លួនចូលទៅក្នុងសង្គមមនុស្សខាងក្រៅ ។
១២) យកចិត្តទុកដាក់នូវអ្វីដែលអ្នកនិយាយ និងរបៀបនៃការនិយាយ
អ្នកត្រូវដឹងថារាល់ពាក្យដែលអ្នកនិយាយគឺសុទ្ធតែមានឥទ្ធិពល និង មានសារៈសំខាន់ ចំពោះមនុស្សដែលនៅជុំវិញអ្នក ព្រោះសំដីរបស់អ្នកអាចមានទាំងផលវិជ្ជមាន និងអវិជ្ជមានដែលជួយអ្នកស្វែងរកឃើញឥទ្ធិពលក្នុងពាក្យសម្តីរបស់អ្នក ។
១៣) ភាពសប្បាយអាចកើតឡើងពីទីកន្លែងដែលអ្នកមិនបានរំពឹងទុក
នៅពេលដែលអ្នកឈានចូលវ័យកាន់តែចាស់អ្នកនឹងអាចពេញចិត្តចំពោះវត្ថុសាមញ្ញកាន់តែច្រើន គឺជាអ្វីដែលអ្នកមិនធ្លាប់ឃើញនូវភាពសប្បាយរីករាយនៅពេលដែលអ្នកនៅក្មេង ។
១៤) ជីវិតកាន់តែមានតម្លៃនៅពេលអ្នកឈានចូលវ័យកាន់តែចាស់
នៅពេលដែលអ្នកមានលុយនៅក្នុងដៃមួយចំនួនក្នុងវ័យ ២០ ឆ្នាំ អ្នកនឹងមានអារម្មណ៍ប្លែកនូវពេលដែលអ្នកមានលុយចំនួនដដែលនេះនៅក្នុងវ័យ ៣០ ឆ្នាំ ដោយអ្នកនឹងយល់នូវសារៈសំខាន់ និងតម្លៃនៃលុយ ដែលអ្នកត្រូវចំណាយឲ្យត្រូវខ្ទង់ ។
១៥) រៀនផ្តល់តម្លៃឲ្យបានច្បាស់ទៅលើពាក្យថាមិត្តភាព
នៅពេលដែលអ្នកឈានចូលវ័យកាន់តែចាស់ចំណងមិត្តភាពមិនគួជារឿងដែលធ្វើឲ្យមានផលប៉ះពាល់ប្រយោជន៍គ្នាទៅវិញទៅមកនោះទេ ។ នៅពេលដែលអ្នកឈានចូលវ័យ ៣០ អ្នកអាចនឹងចំណាយពេលទៅលើមនុស្សដែលផ្ដល់ប្រយោជន៍ឲ្យអ្នកតែប៉ុណ្ណោះ៕
ប្រែសម្រួល៖ ស៊ាន សំបុក
ប្រភពៈ http://www.thebnews.com/
សីលធម៌ចំពោះស្វាមីភរិយា
សុភមង្គលនៃជីវិតគូស្វាមីភរិយា តាមទស្សនៈពុទ្ធសាសនា គឺស្ថិតនៅលើសេចក្តី សុខនៅក្នុងគ្រួសាររបស់ ខ្លួន ដែលហៅថា សុខកាយ សប្បាយចិត្ត ។ សុខកាយ គឺ ការដែលមិនមានជម្ងឺតម្កាត់ផ្សេងៗ រាងកាយរឹងមាំ អវៈយវៈ ទាំងអស់មានសុខភាព មាំមួន ធើ្វការងារបានគ្រប់យ៉ាងទាំងអស់។ សុខកាយម្យ៉ាងទៀតគឺការដែលមាន បច្ច័យ ៤ គ្រប់គ្រាន់ គឺមានម្ហូបអាហារត្រឹមត្រូវតាមក្បួនអនាម័យ មានសំលៀក បំពាក់ មានផ្ទះសំបែងនិង មានថ្នាំសំរាប់ ព្យាបាលជម្ងឺ។ សេចក្តីសុខខាងកាយនេះ ជាសេចក្តីសុខដែលគេ ស្គាល់គ្រប់គ្នាហើយដែលគ្រួសារនីមួយៗតែងប្រាថ្នា។ តែ សេចក្តីសុខប្រភេទនេះ មិនទាន់គ្រប់គ្រាន់ទៅនឹងសេចក្តីត្រូវការរបស់សុភមង្គល ទេ។ ហេតុបានជាដូចេ្នះ ព្រោះថាបើ គ្រួសារ(ស្វាមីភរិយា)នោះមានបច្ច័យ៤គ្រប់គ្រាន់ មែនតែអ្នកជាមនុស្សដែល ខ្វះសីលធម៌ ខ្វះការកក់ក្តៅក្នុងក្រុមគ្រួសារ ប្តីប្រពន្ធ កូនប្រព្រឹត្តតែអំពើអបាយមុខដែលលោក ហៅ ថា ឆ្កួតស្រា ឆ្កួតស្រី ឆ្កួតល្បែងពាលា នោះជីវិតស្វាមីភរិយា នឹងមិន មានសេចក្តីសុខឡើយ។
អ្នកមានទ្រព្យច្រើន តែជួនកាលអ្នកមិនមានសេចក្តីសុខ ដេកលក់ស្រួលស្មើនឹង ជីវិតគូស្វាមីភរិយាខ្លះដែលក្រទ្រព្យ សម្បត្តិ តែចេះស្រលាញ់គ្នាល្អូកល្អឺន រស់នៅជា មួយគ្នា ក្នុងសុខដុមភាពឡើយ។ ដូច្នេះ សេចក្តីសុខខាង ផ្លូវចិត្តទើបជាសេចក្តីសុខ ដែលសំរាប់បន្ថែមទៅលើសេចក្តីសុខខាងផ្លូវកាយ ដើម្បីឲ្យសុភមង្គលខាងជីវិតគូ ស្វាមី ភរិយាមានតុល្យភាព។
អត្ថបទតទៅនេះ គឺជាកម្រងទស្សនៈពុទ្ធសាសនា ដែលបានដកស្រង់យកអន្លើ ខ្លះ ពីគម្ពីរទីឃនិកាយ សុត្តន្តបិដក អន្លើខ្លះទៀតពីសៀវភៅ «ជីវិតអពាហ៌ពិពាហ៌» របស់លោកធម្មបណ្ឌិតហេង មណីចិន្តានិងពីច្បាប់ផ្សេងៗ មក រៀបរៀង និងពន្យល់ សេចក្តីទុកជាគតិណើរលើវិថីជីវិតដែលសែនលំបាក។ តម្លៃសីលធម៌ចំពោះ ស្វាមី ភរិយា មានអ្វីខ្លះដែល គួរសិក្សា និងអនុវត្ត?
I. នាទី និងសីលធម៌ស្វាមី ចំពោះភរិយា
ភរិយា, តាមអត្ថន័យ, គឺស្ត្រីដែលស្វាមីត្រូវចិញ្ចឹម, ត្រូវអនុគ្រោះ។ ការអនុគ្រោះ របស់ស្វាមីចំពោះភរិយា លោក បានចែកធម្មៈ ៥ប្រការ សំរាប់អនុវត្តគឺៈ
១. ស្រលាញ់ភរិយាដ៏ស្មោះ ដោយប្រើសំដីទន់ភ្លន់ ផ្អែមល្ហែម ទៅកាន់ ភរិយា, មិនប្រើពាក្យសំដីគ្រោតគ្រាត ទៅ កាន់ភរិយា។
២. មិនបៀតបៀន, មិនមើលងាយមើលថោកភរិយា ។
៣. មិនប្រព្រឹត្តកន្លងចិត្តភរិយា (មិនក្បត់ភរិយា) ។
៤. ប្រគល់កិច្ចការសព្វយ៉ាងនៅក្នុងផ្ទះ អោយទៅភរិយាកាន់កាប់។
៥. ផ្គត់ផ្គង់សំលៀកបំពាក់ គ្រឿងអលង្ការសមគួរដល់ភរិយា។
ស្វាមីក៏ត្រូវយល់ដឹង និងជួយរំលែកសេចក្តីទុក្ខលំបាករបស់ភរិយា ក្នុងឋានៈជា ស្រី និង ជាភេទទន់ខ្សោយ គឺៈ ទុក្ខខាងផ្លូវកាយ និងផ្លូវចិត្ត នៅពេលមានគភ៌ មិន អាចប្រើឥរិយាបទទាំង៤ (ដេក ដើរ ឈរ អង្គុយ) និងប្រកបកិច្ច ការបានស្រួល, ទុក្ខនៅពេល ឆ្លងទន្លេប្រសូតបុត្រ...។
II. នាទី និងសីលធម៌ភរិយា ចំពោះស្វាមី
ក) ក្នុងឋានៈជាភរិយា
គប្បីយល់ដឹងសីលធម៌ ៥ ប្រការ សំរាប់អនុវត្តចំពោះស្វាមីខ្លួន គឺៈ
១. ចាត់ចែងការងារក្នុងផ្ទះ មានបាយទឹកជាដើមដោយផ្ចិតផ្ចង់, មើល រៀបចំឥវ៉ាន់ ទ្រព្យសម្បត្តិ រៀបចំផ្ទះ សំបែង ឲ្យមានសណ្តាប់ធ្នាប់រៀបរយស្អាតបាត មានអនាម័យ ដូចសុភាសិតថា «ដំណេកដេកជាខ្នាត អោយ សំអាតសំអាងជា ទើប ទេវតារក្សា ចំរើនសុខស្រីសួស្តី» ។
២. សង្គ្រោះញាតិខាងស្វាមី និងញាតិខាងខ្លួន ឲ្យបានស្មើមុខគ្នា រួមទាំងបដិសណ្ឋារ កិច្ច ចំពោះបុគ្គលដែលស្វាមីរាប់អាន ពេលដែលជននោះមកដល់ផ្ទះ។
៣. ថែទាំទុកដាក់ទ្រព្យសម្បត្តិដែលស្វាមីរកបានមក, របស់បាត់ត្រូវតាមរក, របស់ ចាស់ត្រូវជួសជុល ប្រើ, និងត្រូវចេះប្រមាណ ក្នុងការប្រើទ្រព្យសម្បត្តិ ។
ត្រង់នាទី ទី៣ នេះ នារីជាភរិយាត្រូវចងចាំពាក្យបុរាណថាៈ
«ប្តីជាអ្នករក ទ្រព្យធនបានមក ប្រពន្ធទុកដាក់ចាស់ទុំបូរាណ បានពោលបញ្ជាក់ អោយនាងអោយអ្នក ចងចាំគ្រប់ប្រាណ។ សំណាបយោងដី រីឯស្រីៗ យោងប្រុស សាមាន្យ (សាមញ្ញ) ទោះមារយាទខ្សោយ ក៏ដោយបើបាន ស្រីមានសន្តាន ខ្ជាប់ខ្ជួនមួនមាំ ។ តែងបានចំរើន ទ្រព្យាកើតកើន ព្រោះស្រីថែទាំ ចាត់ចែងទុកដាក់ ចេះលាក់សន្សំ សង្វាតខិតខំ រក្សាឲ្យគង់ » ។ « ខ្លែងហើរដ្បិតខ្យល់ នាយថ្កើងដ្បិតពល រក្សាឲ្យសុខ ទ្រព្យគង់ដ្បិតស្រី ចេះសំចៃទុក ផ្ទះធំស្រណុក ដ្បិតភរិយាជា » ។
៤. មិនប្រព្រឹត្តកន្លងចិត្តស្វាមី ( មិនក្បត់ចិត្តស្វាមី ) ។
៥. ឈ្លាសវៃ ប៉ិនប្រសប់ និងប្រឹងប្រែងជានិច្ចក្នុងកិច្ចការគ្រប់យ៉ាង ព្រោះខ្លួនមាន នាទីជា « មេផ្ទះ, មេកិច្ចការជាធំក្នុងគ្រួសារ» ។
ខ) របៀបរស់នៅរបស់ស្ត្រី (១)
នារីពេលមានស្វាមីគប្បីចងចាំគឺៈ
១) ភ្លើងក្នុងកុំនាំចេញក្រៅ,
២) ភ្លើងក្រៅកុំនាំចូលក្នុង,
៣) ត្រូវអោយបុគ្គលដែលអោយ,
៤) មិនត្រូវអោយដល់បុគ្គលដែលមិនអោយ,
៥) ត្រូវអោយដល់បុគ្គលដែលអោយក្តីមិនអោយក្តី,
៦) ត្រូវអង្គុយដោយស្រួលបួល,
៧) ត្រូវបរិភោគដោយស្រួលបួល,
៨) ត្រូវដេកដោយស្រួលបួល,
៩) ត្រូវបូជាភ្លើង ឬបំរើភ្លើង,
១០) ត្រូវថ្វាយបង្គំទេវតាក្នុងផ្ទះ ។
សេចក្តីពន្យល់ៈ
១) ភ្លើងក្នុងកុំនាំចេញក្រៅ ។ មានន័យថា រឿងរ៉ាវណាដែលសៅហ្មងក្តៅក្រហាយ មិនល្អ អាក្រក់ ដែលជារឿងផ្ទៃក្នុងរបស់ក្រុមគ្រួសារខ្លួន, មាតាបិតាខ្លួន មិន ត្រូវនាំចេញទៅផ្សាយ ដើរប្រាប់គេប្រាប់ឯង ដោយហោចទៅសូម្បី តែសាច់ញាតិខ្លួន ឡើយ។
២) ភ្លើងក្រៅកុំនាំចូលក្នុង ។ មានន័យថា រឿងណាដែលមិនល្អ មិនមាន ប្រយោជន៌ ជារឿងក្តៅក្រហាយ ហើយ មិនទាក់ទងនឹងសាច់រឿងរបស់ខ្លួនទេ មិន គប្បីនាំចូលមកក្នុងផ្ទះ អោយក្រុមគ្រួសារបានទទួលការក្តៅក្រហាយផងដែរនោះ ទេ។ ទោះជារឿង ក្តៅក្រហាយនោះទាក់ទងទៅនឹងកេរ្តិ៎ឈ្មោះ និងផលប្រយោជន៍ របស់គ្រួសារ ឬស្វាមីខ្លួនក្តី ក៏ត្រូវរកឱកាសនិយាយដែរដើម្បីកុំឲ្យក្តៅទាំងរឿង ក្តៅ ទាំងមនុស្សទៀត ។ មានភរិយាខ្លះ ឃើញស្វាមីមកពីធើ្វការហត់នឿយ ឬមានរឿង មុខមិនស្រួលមកដល់ផ្ទះមិនទាន់ទាំងដាក់គូថអង្គុយផង ក៏ស្រាប់តែនាំយករឿង អាក្រក់រឿងក្តៅក្រហាយទៅពិតទូលបញ្ឆេះធ្វើឲ្យស្វាមីដែលកំពុងស្រួលៗនោះ ក្តៅក្រហាយ ឆេះភ្លាមមួយរំពេច ។ ប្រការនេះនាងជាភរិយាគួរយល់ដឹង ។
៣) ត្រូវអោយបុគ្គលដែលអោយ ។ មានអ្នកមកខ្ចីទ្រព្យបើជឿទុកចិត្តថានឹងសងវិញ សឹមអោយខ្ចី ។
៤) មិនត្រូវអោយដល់បុគ្គលដែលមិនអោយ ។ បើមានអ្នកមកខ្ចីទ្រព្យនោះ មិនគួរទុកចិត្តថាសងវិញទេ មិនត្រូវ អោយខ្ចីទេ ។ បើអោយខ្ចីត្រូវគិតថា របស់នោះ ទុកដូចជាបោះចោលទៅក្នុងទឹកទន្លេ ។
៥) ត្រូវអោយដល់បុគ្គលដែលអោយក្តី មិនអោយក្តី ។ ត្រូវតែអោយដោយសង្ឃឹម ថាសងវិញ ឬមិនសងវិញ ដូច ជាបងប្អូនដែលយើងត្រូវតែជួយដោះទុក្ខធុរៈ មួយ ទៀតបានដល់ការដាក់ទានដល់ស្មូមយាចករួមទាំងការធ្វើបុណ្យទាន ដែលត្រូវធ្វើជា ប្រពៃណីរបស់យើង ។
៦) ត្រូវអង្គុយដោយស្រួលបួល ។ ត្រូវអង្គុយដឹងខ្ពស់ដឹងទាប, អង្គុយប្រយ័ត្ន ប្រយែង មិនច្រងេងច្រងាង យះដៃយះជើង... ។
៧) ត្រូវបរិភោគដោយស្រួលបួល ។ ត្រូវមានសុជីវធម៌ក្នុងការបរិភោគអាហារ គឺ បរិភោគអោយដឹងមុនក្រោយ បរិភោគជាមួយ អ្នកណា ពេលណាគួរបរិភោគ...។
៨)ត្រូវដេកដោយស្រួលបួល។ គឺការរៀបចំដំណេកអោយបានសមរម្យស្រួលបួលរួមទាំងការត្រៀមវត្ថុចាំបាច់ ខ្លះ ពេលចូលដេកកុំឲ្យពិបាកងើបដើរឆ្ងាយទៅយក ។ ទំនៀមខ្មែរពីដើម មុនដេកភរិយា ត្រូវមូរបារី អប់ទឹកផ្តិលដាក់ចុងជើង។ ក្នុងរឿងសិរី ៣ប្រការរបស់ធម្មបាលមាណព ដែលដោះប្រស្នាជាមួយកបិលមហាព្រហ្ម បាន អធិប្បាយថាៈ ពេលព្រឹកសិរីនៅមុខ ដូច្នេះត្រូវលុបមុខ, ពេលថ្ងៃសិរីនៅទ្រូង ត្រូវលាបស្រឡាបដើមទ្រូង, ពេលល្ងាច សិរីនៅជើង ត្រូវលាងជើងមុនពេលចូលដេក ។ ម្យ៉ាងទៀតៈ
= មិនត្រូវកន្លងជើងប្តីឬខ្លួនប្តី ព្រោះខ្មែរប្រកាន់ថាប្រុសៗមានគ្រូបាធ្យាយ កំណើត កាន់ ឬបើប្តីជាអ្នករៀន មន្តអាគម ក៏នឹងសាបអស់។
= ត្រូវដេកនៅខាងឆ្វេងស្វាមី ឯក្បាលដំណេក គួរដាក់នៅទិសខាងត្បូង ព្រោះ « ត្បូង » ប្រែថាក្បាល ។
= គួរមើលឲ្យបានច្បាស់ពេលដេក មិនត្រូវបែរជើងទៅរកស្វាមី មាតាបិតា ឬ ព្រះពុទ្ធរូបទេ ព្រោះដូចជាយើងយកជើងទៅធាក់លោកអញ្ចឹង ។
= ត្រូវដេកប្រយ័ត្នប្រយែង ក្រែងលេចកេរ្តិ៍ខ្មាស់ ឬពេលងើបពីដេករបូតសំពត់ ជាដើម ។ ខ្មែរមានទំនៀមថា « ប្រពន្ធត្រូវ ដេកក្រោយប្តី និងភ្ញាក់ មុនប្តី » ព្រោះ លោកយល់ថា ប្តីធ្វើការនឿយហត់ពីថ្ងៃ ហើយឯប្រពន្ធនៅផ្ទះ ដូច្នេះត្រូវមើល ខុស ត្រូវរៀបចំទុកដាក់ចានក្បានឲ្យហើយ, មើលទ្វារបង្អួចក្រែងបិទមិនជិត, មើលភ្លើង ក្រែងរាលឆេះ ។ល។ លុះភ្ញាក់ត្រូវភ្ញាក់មុន ព្រោះម្យ៉ាង ដើម្បីកុំឲ្យឃើញសភាពមិន រៀបរយរបស់សំពត់ខោអាវពេលដេក និងរៀបចំអាហា រពេលព្រឹកសំរាប់ស្វាមីផងព្រមទាំងបោសច្រាសផ្ទះសំបែងឲ្យបានស្អាតបាតស្រេចបាច់ហើយ ម្យ៉ាងទៀត ក៏មិនគប្បីដេកកណ្តាលវាលដែរ ត្រូវមានអ្វីបិទបាំង ឬជាទីកំបាំងភ្នែកអ្នកផង ។
៩) ត្រូវបូជាភ្លើង ឬបំរើភ្លើង ។ ក្នុងទីនេះបានដល់ស្វាមីដែលភរិយាត្រូវគោរពបំរើ ប្រណិប័តន៌ ថ្នាក់ថ្នមរួមទាំងការ បំពេញសេចក្តីត្រូវការខាងភេទផងដែរ ។ ភ្លើងនេះបើយើងបូជា ឬបំ់រើមិនល្អ វានឹងអាចរលាក ឬឆេះដល់នាងជា ភរិយាពិត ប្រាកដ ។
១០) ត្រូវថ្វាយបង្គំទេវតាក្នុងផ្ទះ។ ទេវតាក្នុងផ្ទះនេះ បានដល់មាតាបិតារបស់ខ្លួនក្តី របស់ស្វាមីក្តី ដែលយើងនៅជាមួយ, និងមួយទៀត បានដល់គ្រឿងសក្ការបូជាក្នុងផ្ទះ ដែលយើងជឿគោរពបូជា ។ ការបំរើមាតាបិតា ការគោរព ប្រណិប័តន៍លោក ថ្វាយ បង្គំលោក រមែងបាននូវអានិសង្សនិងសេចក្តីសុខជាពន់ប្រមាណ ព្រោះព្រះសម្មា សម្ពុទ្ធ លោកបានមានពុទ្ធដីកាថាៈ មាតាបិតាជាព្រះព្រហ្មរបស់កូនផង ជាទេវតា ដើមផង ជាគ្រូផង និងជាអហុនេយ្យបុគ្គល របស់កូនផង កូនណាគោរពបូជា បុណ្យ រមែងកើតដល់កូនប្រុសស្រីនោះមិនដាច់ ។
ក្រៅពីឱវាទទាំង ១០ នេះ នៅមានឱវាទផ្សេងៗទៀតជាច្រើន ដែលសុទ្ធសឹងជា ពាក្យទូន្មានចំពោះស្ត្រីដែលនឹង ត្រូវមានស្វាមី ។ ជាពិសេស នៅក្នុងរឿងវិធូរបណ្ឌិត ជាតក នៅពេលដែលនាងវិមលា ដែលជាមហេសីស្តេចនាគផ្តាំដល់បុត្រី គឺនាង ឥរន្ទវតី មុននឹងធ្វើដំណើរទៅជាមួយស្វាមីគឺបុណ្ណកយក្ស។អ្នកប្រាជ្ញបណ្ឌិតយើង បានរៀបរៀងតែងពាក្យកាព្យឡើងឈ្មោះថា « ច្បាប់ស្រី » មានលំនាំជាបទ ភុជង្គ លីលា ដែលខ្មែរយើងនិយមអោយកូនស្រី ទន្ទេញណាស់ ។
ដំណើររួមរស់នៃស្វាមីភរិយា មិនមែនសំរាប់តែសេចក្តីសុខស្រួលទាំងផ្លួវកាយទាំង ផ្លូវចិត្តនៅក្នុងផ្ទះមួយជាមួយ គ្នាប៉ុណ្ណោះទេ ។ គូស្វាមីភរិយា ត្រូវចេះឆ្លៀតទាញ យកប្រយោជន៍អំពីភាពស្និទ្ធស្នាលនៃការរួមរស់ជាមួយគ្នានេះ ជួយណែនាំ រំលឹក ដាស់តឿនគ្នាឲ្យបណ្តុះចិត្តគំនិតមានជំនឿក្នុងព្រះសាសនា, ឲ្យចេះប្រយ័ត្ន មិន បណ្តោយឲ្យធ្លាក់លង់ទៅក្នុងអបាយមុខណាមួយ មាន ស្រី ស្រា ល្បែងភ្នាល់ ការ សេពគប់រកមនុស្សអាក្រក់ជាមិត្ត ជាដើមដែល ជាហេតុ នាំឲ្យវិនាសទាំងទ្រព្យ ទាំង ខ្លួនប្រាណ ។
មានស្វាមីភរិយាចំណាស់មួយគូ ដែលជាប់ឈ្មោះថាជាស្វាមីភរិយាឧត្តមបានទៅ ថ្វាយបង្គំព្រះពុទ្ធ ហើយទូលសួរ ថាៈ បពិត្រពះអង្គដ៏ចំរើន យើងខ្ញុំព្រះករុណាបាន គ្នាជាប្តីប្រពន្ធ ក្រោយពេលដែលបានស្គាល់គ្នាតាំងពីនៅក្មេងៗ ដូចគ្នា ហើយយើង ខ្ញុំស្គាល់តែសេចក្តីសុខពុំដែលមានរឿងហេតុមោះហ្មងអ្វីនឹងគ្នាម្តងណាទេ។ សូមព្រះ អង្គមេត្តាពន្យល់ប្រាប់យើងខ្ញុំផង ថាតើយើងខ្ញុំត្រូវធ្វើយ៉ាងណា ដើម្បីអាចនឹងបាន ជួបគ្នាទៀតនៅជាតិក្រោយ ។
ព្រះពុទ្ធទ្រង់ត្រាស់តបប្រកបដោយគតិបណ្ឌិតថាៈ
បើអ្នកទាំងពីរមានជំនឿសាសនាដូចគ្នាបេះបិទ (សមសទ្ធា), បើអ្នកទាំងពីរទទួល យកសេចក្តីទូន្មានព្រះសាសនាតាមរបៀបដូចគ្នាបេះបិទ (សមសីលា), បើអ្នកទាំង ពីរសាងកុសលទានដូចគ្នា (សមចាគា), បើអ្នកទាំងពីរមានការសិក្សាអប់រំ និងវៃឆ្លាត ប្រហាក់ប្រហែលគ្នា (សមបញ្ញា)... ទៅជាតិក្រោយទៀត អ្នកទាំងពីរនឹងបានប្រកប ដោយចិត្តដូចគ្នាទៀត ពោលគឺ នឹងអាចជួបគ្នាគ្រប់ៗជាតិជាមិន ខាន។
ដកស្រង់រៀបរៀងនិងនិពន្ធដោយលោក ឱម ខែម
(១) ឱវាទ ១០ យ៉ាងរបស់ធនញ្ជ័យសេដ្ឋី ដែលផ្តាំចំពោះនាងវិសាខា នៅពេលដែលធ្វើដំណើរទៅនៅខាង ស្វាមីនាង, ជាឱវាទ ទាក់ទងទៅនឹងចរិយារបស់ភរិយា, សូមនាំមកចុះជាគតិជូនព្រោះជារបស់មានសារៈ សំខាន់ ហើយក៏ជាទីនិយមបំផុតនៃវប្បធម៌ និងអរិយធម៌ខ្មែរ។
ប្រភពៈ http://www.5000-years.org/
Subscribe to:
Posts (Atom)